Sunday, May 15, 2011

فوائد الثانوية العامة


بعد ما خلصنا إعدادي وجتلنا حالة الذكاء المبكر وإخترنا ندخل ثانوية عامية

وأصابتنا حالة مختلفة على متخلفة لم نشعر بها من قبل

خليط من الاوكتئابات الممتزج بالهيستريا

مكوناً كوكتيلاً عجيباً لم يستطع العلماء تفسيره .


بس إحنا فيها خلينا نبص للجانب المشرق واللي مكناش هنحس بيه لو مدخلناش ثانوي


1-
مكناش هنعرف معنى إن الواحد يجيب 3 في امتحان العربي

ويضحك من هول الصدمة وعادي يعني بيعيش بعديها ليحكي القصة

.

.

2-
مكنتش هشعر بالندم يومياً على اليوم الوايت اللي فكرت أدخل فيه علمي

ويتكرر الندم كل ما ألمح رسمة إستاتيكا أو أشوف تجربة فيزيا

أو أروح الاسكولا والاقي فصلنا هادي عشان بيخلصوا الهوم وورك بتاع الدروس

(عاوزه دوشة يا بشر نفسي أمارس سلطتي كأمينة فصل فوزيعة )

.
.

3-

مكنتش هنام أحلم بحل المسائل سواء الفيزيائية أو الرياضية..

(ويتكرر الحلم بتاع القلم صغير وورقة الامتحان كبيرة

وهسقط يا حنفيييييييي)

ولا آلاء تصحي هاجر أختها عشان تقولها قومي بسرعة اقتلي الدودة
((من أثر الأحياء

ولا إسراء تصحي سارة وتقولها المكبس يا سارة المكبس..

وكنا محسناش بالنوبات الأحيائية المزمنة
والفيزيائية والرياضية اللي بنعاني منها يومياً.

.

.

4-

مكنتش هحب الخروج أوي كده ولا هستمتع بالقراية في عز الامتحانات..

ولا كنت عرفت معنى كلمة النية لله بعد ما بنوي أعمل حاجة ويطلعلي امتحان من حيث لا ادري.


.

.
5-
لم يكن لساننا يتعطر بذكر الله بقول حسبي الله ونعم الوكيل..
وربنا ياخدك ياللي في بالي..واستغفر الله العظيم يارب

(بيكثر الدعاء في الرياضة والأحياء).


6- مكنتش قعدت كتب البتاع ده عشان مقومش اذاكر علم نفس

:)

...........

ع الهامش:

ياااااه العناكيب كانت مسكت ف البلوج ده بس مش فاضية خلاص

ثم إني بدأت أحس باقتراب الامتحانات

وبدأت أستشعر ميول للجريمة كل ما أفكر في اللي المفروض أخلصه

(إحساس زي ما تكون عاوز تاكل دراع حد أو تنط م الدور السادس

أو تلعب مع نفسك استغماية وتفضل تدور عليك..)

بس لازم أبلغكم يا إخوتي المقاهير في الله إن الجريمة لا تفيد..أبداً

وأحب أقول لكل شاب وكل فتاه لا تنحرف ولو المستر ضربك

وخد ورقه الامتحان منك متضربوش وبوس إيدك شعر ودئن لأنه بكده ادالك أجازة بدري


..

البوست من ألش قديم على الفيسبوك مع لمحات جديدة..

والبوست اهداء خاص لكل من هو في موقفي هذا

ويشعر بحالة من الكبت ممزوج بالاشمئزاز ..أعوذ بالله

يللا العواف بقى

Saturday, February 12, 2011

أنا بحبك يا بلادي ..




الصورة اللي فوق صورة ناس احسن مني كتير..

ناس كان نفسي أكون ضمنهم أوي

الفاتحة على أرواحهم النقية :)


............


Paulo Coelho



The world only gets better because people risk something to make it better. Thanks Egyptians

...............



فكرت البوست مكانه في أنهي بلوج

ومعرفتش اقرر بالظبط.. اللي كنت واثقة منه اني مش هكتبه واركنه كالعادة

كان لازم ينزل كبداية جديدة..كبوست فاصل بين ما كان وما سيحدث

اللي حصل في مصر مش نهاية سعيدة..اللي حصل مجرد بداية سعيدة

الألعاب النارية اللي نورت السما امبارح وزمامير العربيات أوحت بآلاف الأفراح..

الناس ضحكت..الناس النهارده في أول صباح للحرية ماشيين متفائلين للغاية..كنت ماشية لدروسي وأنا في قمة السعادة والفخر بالناس

كل الناس اللي كانوا راجعين من الميدان واللي رجعوا امبارح واللي كانوا بيدعوا طول الليل

ماما جت امبارح بعد ما بيان عمر سليمان طلع ونبهت عليا آخد بالي من اللي هكتبه الفترة الجاية كانت خايفة برضه..قلتلها لأ كفاية

30 سنة بنخاف ننطق نقول كلمة حق

لكن من النهارده بالتحديد المبدأ ده انتهى..هنتولد بنتكلم وهنموت بنتكلم..وهنضحي بحياتنا عشان نفضل نتكلم

زي اللي ماتوا عشان نفس المبدأ

كنا بننزل من يوم 25 يناير من البيوت وأرواحنا على كف عفريت ومش خايفين

أطفال اقل من 15 سنة ماتوا عشان بس كان نفسهم يتكلموا

من النهارده مش هيبقى فيه ملايين بتتنهب ولا شباب سيس بتاع فيس بوك وتويتر مش فالح غير في النت..

دلوقتي فيه شباب صنع التاريخ

انا فخورة اني نزلت التحرير وحاربت عشان نزولي ده..

فخورة عشان طول عمري كان نفسي اشوف المدينة الفاضلة

بس المدينة اللي شوفتها بعنيا مكنتش بتاعت افلاطون..كانت بتاعت شباب مصر

شوفت الدفا والحب المستخبيين بقالهم زمن

وكنا بنهتف بقلب وبنكلم بعض اكننا صحاب من 10 سنين واحنا منعرفش اساسا اسامي بعض



الشباب كان محترم اوي وبيحترم البنات بشكل فوق العادي

والناس كانوا بيوزعوا أكل على اللي بيباتوا هناك.. صراحة مكنش كنتاكي يا ظالمين ده كان الهابي ميل بتاعت ماكدونالدز..:P

كان فيه ناس مفقودين من يوم 28 يناير ونصب بالبراويز للشهداء وصور كبيرة ليهم

في كل خطوة كنت بمشيها هناك عينيا كانت بتلمع من الفرحة..انا نفسي مصر تبقى كده..نفسي احلم

احلم من غير قيد من غير ما حد يقتل أحلامي قبل ما تتولد تاني..

انا مش خايفة من بكرة مع اني عارفة انه هييجي صعب عشان مرحلة الهدم اسهل من البناء

بس كفايا علينا الأمل والتفائل اللي حاسينه..احنا اتغيرنا في الكام اسبوع دول..وهنتغير اكتر

كنت حاسة بفرحة وكم ابتسامات بتطاردني مقدرتش اقاومه

باختصار البوست ستلخص في كلمتين

حقيقي حقيقي لو لم أكن مصرية لوددت ونص أن أكون مصرية

احتمال كده مفضلش مقهورة كتير..مع انه لقب قديم معايا معرفش العشرة هتهون ازاي

.....

لينكات صديقة معبرة جداً وبعتذر لو نسيت حد غصب عني

يمكن حاطاهم ليا بالتحديد.. بجمع الفرحة في كوبايات ملونة :)



حرية :) ..مدونة قوس قزح

نصيحة وطنية..بت خيخية وأي كلام

سوزان عليوان..12-2-11

Sentimental Prints in My Life

..اخبارنا من الواشنطن بوست والاندبندنت والجارديان

استاذ خالد همس الأحباب..حرية ديمقراطية

قلب القطة..يوم النصر العظيم انتصار الحلم بفضل الله مبروك لمصر وخلفتها

Tears..وانتصر شعب مصر

حرة من البلاد..ثوب الحرية يا مصر

مونتانا ..مصر يا اطعم اسم

احنا الشعب.......فاتيما الرائعة

..........

فيه مشكلة تقريبا عندي ف البلوج وجاري التظبيط
اسفة ع الكومينتس اللي مسحتها عشان عدت الموضوع تاني

اشوفكوا على خير ان شاء الله
..

طالبة مقهورة

Monday, October 4, 2010

قرش الكابتشينو الخارجي













الزمان: يوم الخميس اللي فات
المكان:على سريري ملتقى المذاكرة والنوم
السبب: نومي بحت
..

ياه اخيرا الواحد خلص الاسبوع وهياكل رز مع الملايكة
رز!! الرز من المحاصيل الصيفية التي تزرع في الدلتــ....هشششششش

ايه اللي بقوله ده انا علمي ..علمي مش ادبي
وبطلنا الجغرافيا من سنتين
اهمدي بقى وكملي أكل


أكل!! الاكل ضرورة من ضروريات بقاء النوع
وهو ما يتعاطاه الانسان والحيوان يوميا من الغذاء
ليستعيد بها طاقته أو يجددها.

يبنتي حراااااام عليكي انتي علمي رياااضة..
رياضة مش احياء
وكويس انك مش حافظة جدول الضرب انا مطمنة عليكي كده
لا حافظة جدول 2 كويس
اي نعم بتلخبط بس حافظاااااه اسمعهولك حتى

تررررررن..ترررررررر...


ايه الغتاتة ديه بقى
الواحد مش هينام ف السنة العثثل ديه شكله كده
رفعت السماعة بكل غيظ وبحالة من الاستفزاز المختبيء


م : ايون يابنتي انتي فين اوعي تكوني ناوية تنامي

انا : النوم قضية سخصية اطلعي منها بس وهيا تعمر 
عاوزة ايه في الانجاز الرز ع النار وممكن يتحرق جوا الحلم

م : ايه الاستهتار ده انتي مش حاسة بكم المصيبة اللي احنا فيها؟

انا : هوا اي نعم انا المفروض اسألك مصيبة ايه
بس مش هسأل وهقولك لأ مش حاسة.. تقومي انتي بقى تديني 
عظة في الادب والاخلاق وانا هقعد اقولك
اها..اها..وانا مش مركزة معاكي وفي الاخر 
تقوليلي فاهماني هقولك اه..قصري بقى

م : نعمممممم يعني انا بتقرطس بقالي كام سنة قولي كده بقى؟؟
،مش هرد عشان عاوزاكي ضروري 
بس ..البسي وانزليلي ..موضوع حياة او موت


انا : طب ما تقولي هنا دلوقتي يمكن اطلع ندلة واقولك لأ

م : لا يا فالحة ممكن التليفون يكون متراقب..

انا : مممممممم

م : بتفكري ف ايه انتي دلوقتي؟

انا : ياترى الرز اللي ع النار مين هياكله غيري؟؟؟؟

م : يللا يا بنتيييييييي..

وهكذا يا اعزائي خرجت مذهولة متجهة نحو بيت م
وانا اتحسر على الرز اللي الملايكة هتاكله 
لوحدها وبانتظار الامر العاجل

اللي ينزلني من بيتنا الساعة 7 المغرب 
واخدتني م بنظرة ملهوفة وهي تتلفت حولها..
يللا هنركب المترو وهنكون هناك على 8 يدوبك 

انا :  انا ليه حاسة انك تبع تنظيم القاعدة؟ 
م : هشششششششش هتفضحينا اسكتي خالص 


وخرجنا من المترو في مكان ضلمة سكتم بكتم..
وانا عونيا في وسط راسي مستعدة لخروج جماعة مسلحة
وهمارس عليها حركتين الكاراتيه اللي ن..فضلت 3 سنين اعدادي بتعلمنا فيهم وبرضه مفلحناش نعملهم صح..لكنها حالة طواريء

وفجأة م..التفتت إلي وشدتني من ايدي على جمب
برغم ان الشارع كان فاضي
(لزوم الساسبينس)

وقالتلي والقلق يملأ عينيها:

اصلي ع..قالي انه هيجيبلنا 10 بس الراجل اللي كان بيتعامل معاه طلع غبي وملحقش يروح يجيبهم من المخزن فراح ع..اتطقس وعرف المورد الرئيسي
واحنا ناقص خطوتين ونوصل عنده عاوزاكي ترفعي راسي ومتنطقيش بولا كلمة فاهمة ولا ارجعك تاني بيتكوا؟؟

انا : 10 مين..ايه اللي انتي بتقوليه ده..لا ياختي رجعيني بعد مغامرات دب الباندا ديه رجعيني..

وفجأة اذا برجل يتجه نحونا..:اي خدمة يا آنسات؟

نظرت نحو م..ورأيت على ملامحها علامات ارتباك واضح

ايوه احنا اللي ع باعتنا عشان تدينا الاوردر اللي طلبه وقلت انه عندك

فنظر الرجل بجدية : طيب مش عاوز صوت ورايا


فابتسمت ابتسامة واسعة يبدو انها استفزت انكل.
فرمقتني م.. بنظرة معناها هتموتي يا سوسووو
 فاحترمت نفسيتي وسكت

واخذنا ننتقل بين حواري غريبة وأزقة غامضة
ولا اليكس في بلاد العجائب
واخيرا وصلنا الى مكان يشبه مكتبة في اخر الزقاق

واخرجت م..ظرف ابيض اديته للراجل
واستلمت منه كيس اسود يبدو عليه الثقل والبهدلة
مما يشعرك انه كيس قادم من الضفة الغربية مش من هنا 

بدأ شوشو يلعب ف دماغي واتتني نوبة فزع:

ايه اللي ف الكيس ده انا عاوزة اعرف حالا؟؟
اااااااه اصل انا شوفت الفيلم ده قبل كده
كان شغال على
mbc2
من يومين..وفي الاخر بياع المخدرات اتقبض عليه
ايون.. والبطلة اتحدفت ورا الشمس
وتعرفي مين اللي بلغ عنهم؟؟صاحبتها اللي كانت معاها


لم الحظ ارتفاع صوتي
وفي عز دهشة الرجل اطبقت م..على فمي قائلة:
هششششش مخدرات مين ،انا غلطانة اني اخدتك كنت عاوزة مصلحتك

وفتحت الكيس فاذا بـــ
بـــ
بـــ كتب خارجية طبعة جديدة

فانتابتني هسترية ضحك ملأ صداها الزقاق

انا :هههههههههههههههههههههههههههههههه
كتب؟؟؟ ومحسساني انك تبع تنظيم القاعدة
وتوهتونا في حتت غريبة مش هنعرف نخرج منها
وشغل الساسبينس ده كله..هوا الازمة تفاقمت لهذه الدرجة
وبعدين ملقيتيش غيري يا م..ده انا هعترف عليكوا من قبل اول قلم
يللا يا عمونا رجعنا من مكان ما جبتنا عاوزة انااااااااام
.....


وفي النهاية قامت م برشوتي بكتاب فيزيا
واتفقنا ان اليوم ده محدش هيجيب سيرته

ومن هنا أحب أأكد بدل المرة 20 انا معرفش ع ده  
وم.. ديه قطعت علاقتي بيها من بعد الواقعة
وكتاب الفيزيا اللي اخدته عشان اسكت ..مش مخبياه تحت السرير ولا حاجة

خلاص كده اشطة..انا رايحة انام بقى
وواخدة معلقة عشان ااكل بقايا الرز اللي الملايكة سابوهولي

تصبحوا على خير

:)


Monday, August 30, 2010

ابعد عن الشر..وبطل غنا صدعتنا+مستشفى ابو الريش



فيه مثل مصري قديم..في منتهى الروعة

بيقولك..
"ابعد عن الشر وغنيله"

وهذا المثل لا يعني البتة انه لما يطلع عليك مجموعة قطاعين طرق

مسلحين باسلحة نووية كساطور الجزار بأن تبدأ بغناء سيمفونية لعبد الحليم..أو شادية

و لو حرامية متحضرين..وشايلين مطواة قرن غزال تغنيلهم هيفاء او نانسي مثلا

وتتوقعوا ان هؤلاء الحرامية هيسيبوكوا تنطلقوا..

كده ..نبقى بنغني على نفسنا

واللي يقولك الثانوية العامة مجرد سنة عادية

خاصة في مصر..يبقى بيغنيلك برضه


احكيلكوا انا... كنت اظن قبل دخولي تلك المرحلة

ان الثانوية العامة هي فترة الشباب والصياعة..
عفوا اقصد الشباب والأحلام
قبل أن ادخلها و تتحول لبعبع (نفسيا على الاقل)



تجربتي الأولى مع الثانوية بدأت بدخول
اخي الأكبر الصف الثاني الثانوي
وبدأ شبح المذاكرة وبالطبع يجب تنمية شعور الانتماء لدى الأسرة

فتم اعلان قانون الطواريء وحالة التأهب للحرب
(حالة طواريء جيييييييييييم)

بداية بمنع التليفزيون والكمبيوتر والبلايستيشن..
وما يصاحبها بقى من الاتاري والخروجات والنوادي

عااااااااااا..سبتولي ايه يا جدعان
ظننت ان حالة طواريء ج موجودة في بيتنا فقط
حتى دخلت بنفسي وادركت انه شعار قومي

(في بيتنا ثانوية عامة)..


والمهم عدت سنتين اخويا ف المنفى قصدي الثانوية العامة على خير
ودخل كلية شرطة ..من كام سنة كده


وبالتالي كنت اظن ان دخولي سيكون خفيف خفيف لأن من المعروف

اني مش على عاتقي اي ضغوطات..كما اني نوعا ما بحب اذاكر بعض المواد
فسأنقذ ما يمكن انقاذه والتعليم المصري ماشي بالفهلوة

وفضلت اقول لنفساويتي بت يا مشمهندسة رودي ديه سنة عبيطة عادية
اوعي تستعبطي فيها وبطنك توجعك زي العيال التانيين..

ومن الواضح اني كنت بغني على نفسي وبرد عليا وانا بقول
ابتاااااااااا ثقي فيا..ولن اخذلك ^_^

ولكن ما حدث غير ذلك..فبدأ بقدوم شهر فبراير المدرسين
يدولنا الموشح اياه بتاع لو فشلت في ثانوي

هتفشل طووووول حياتك

ونظام انت مش ابني انت ابن حسن يوووووسف..الخ الخ

لحد ما جالي التهاب في المعدة..فضل اسبوعين محترمين

الفكرة متأصلة بداخلنا المعادلة الحقيرة نفسها


الفشل ف الثانوية = الفشل ف الحياة بأكملها


برغم ان ممكن حد يتخرج من كلية محترمة جدا
وميعرفش يشتغل او يكون غير مؤهل للعمل

الفكرة نفسها غلط...ولو بنبص عليها بحكم الكياسة
ونظرة المجتمع للطبقات التانية

فنبقى بنرتكب جريمة شنعاااء(جهبوزة ف اللغة العربية من يوماتي)

احترامك مش بوظيفتك..احترامك بتعاملك واخلاقك

كفاية غنا على نفسنا صدعتونا....وبصوا للي نجحوا بكل المقاييس
وهما مش دكاترة ولا مهندسين ولا مدينة نصر

فخدوها مني نصيحة..عاوز تعيش مرتاح
شيل 3 حاجات

شيل الزايدة...اسمها زايدة فلماذا نتركها؟؟

شيل اللوز..فلا ينوبنا منها سوى وجع الزور كل شوية..

وشيل دماغك م الثانوية العامة...

(يعني متتعبش اعصابك ولا تضغط
على حد فيها بقولة ذاكر وهتفشل)


ولأني حتى الان لم انعم بالاولى ولا التانية..
فقررت ان انعم بالتالتة بعون الله :)

وانا داخلة على اعتاب 3 ثانوي....وبدأت احس بكهربة الأجواء عند البعض

لا تبالوا يا أعزائي


.........................


ملحوظة للي بيسألوا عليا ومبكونش هنا
غالبا لو مش ف المدونة ديه هتلاقوني ف مدونتي الاصلية التانية
افعصوا اللينك هنــــــــــــا هتروحوا على هناك


...........


حاجة اخيرة

بالنسبة لمستشفى أبو الريش والتجمع الرائع

اللي خالد همس الاحباب عملوا بالاشتراك مع الاستاذة داليا


حقيقي انا مبسوطة لمجرد سماع الاخبار

من عند سوني وفقري

وانه كان يوم رائع

معنى انك تسعد او تريح حد تعبان بشكل مباشر او غير مباشر

فده حاجة كبيرة اوووووووووووي

قلبي كان معاكوا ووالله كان نفسي اجي

بس الدروس ووجع القلب ده منعني (بلا ذكر تفاصيل)

يارب المرة الجاية يكون معادها احسن

وهلغي اي دروس ف يوميها حتى


فاتيما كان نفسي اشوفها..واسلم عليها تاني

وكيكي كنت هقولها خسيييييييييييتي 10 مرات
زي ما اتفقنا ^_^


وفقري كنت هقوله الف سلامة فيس تو فيس

وسوني..كنت هشوفها لأول مرة

ومنونة وخالد ورامي طبعا وناس كتييييييير اكيد راحوا

مكنش فيه نصيب المرة ديه

كان هيبقى تغيير اني احضر حاجة زي ديه مع مدونين

ولأول مرة مش هتكون من تنظيمي وابقى شايلة 3 اضعاف الهم

ومكنتش هتعسب خااااااااالص ده انا مؤتبة(وش بريء)

ربنا يعيننا جميعا على عمل الخير
ويسعدكوا ويكرمكوا

مع اجمل تحياتي المقهورية


Friday, July 23, 2010

3 شعورات




النهارده....23 يوليو

تاريخ يبعث بداخلي 3 شعورات (جمع شعور) في نفس ذات الوقت


الشعور الأول الأكثر بهجة وتفاؤل هو...

ناقص يومين على مصروف الشهر..

في الحقيقة لم اتذكر ذلك لولا اخويا الكبير

ربنا يخليه ليا وميحرمنيش من تي-شيرتاته قادر يا كريم


الشعور التاني على العكس تماما وهو بعنوان
خيااااااااااانة..

فشهر يوليو اشتق من اسم القائد الروماني يوليوس قيصر

عمكوا يوليوس في يوم

والمدام داعية عليه من قلبها..

وصباع رجلها الصغير غضبان عليه

عشان موداش العيال دريم بارك

ودعت عليه في ساعة استجابة

فاتخنق منها وقال اما اروح اشقر على مجلس الشيوخ

فاذ فجأة بمجرد دخوله للمجلس وبيقول يا سااااتر

ينهالوا عليه بالطعنات

واحد واحد لتتفرق دمائه بين القبائل

وجاءت طعنة اقرب اصدقائه بروتوس وبمجرد ما شفه قاله

حتى انت يا بروووووووووووووتوس

وعشان نتماشى مع القصة فطعنة بروتوس كانت بتوجع اكتر

يعني الكام عشرين طعنة موجعوش وديه اللي وجعته

(عدوها زي ما عديتها بالظبط)


وبذلك يا اعزائي وقعت اقبح عملية اغتيال في التاريخ

قبل قدومي لتلك الحياة طبعا..احسن حد يقول انا السبب !!



اما عن الشعور الثالث فهو في قمة التضارب

تقريبا كده تم الغاء الملكية واعلان الجمهورية زي النهارده

ارى انه ليس هناك اي فرق منذ 25 سنة

ملكية ..جمهورية..ملكهورية..

كله محصل بعضه

ده بريستيج مش اكتر

اعتقدت قديما ببراءة الاطفال

ان هناك فرق بين الكيكي والكيوي

عفواً اعني الملكية والجمهورية ..


فأيام الملكية كانت هناك عائلة واحدة

تحكم وتنهب وتصلح وتخرب ولكن(على نووور)

كل شيء معروف للعامة

أموالهم ومصروفاتهم..وما يمتصوه من حق الغلابة

معروف ومدروس في العديد من الكتب الموجوده حاليا

فساد علني مباشر ولا من تحت الترابيزة ولا وجع دماغ

ناس واضحة............



لكن الجمهورية بسم الله ماشاء الله

اللهم بلا حسد..

عدة عائلات تحكم مصر وتنهب خيراتها..ولكن

عندهم حياء فده كله من تحت لتحت

وبالنسبة للغلابة..فعندما يمر مسئول على منطقة فقيرة

يعود و يتركها وهي اكثر فقراً

والأهم من ذلك اننا راضيين

ومش محتاجين ولا ضباط احرار ..ولا ملكيين مساجين

واهو عايشيييييين

الحمد لله

الله يرحمك يا جمال 1 ويبشبش الطوبة اللي تحت راسك


وتحيا ملكهورية مصر حرة مستقلة

_____



Sunday, July 11, 2010

النتيجة جت يا رداااالة... واحنا اللي دهنا الهوا دوكو



صباحكوا/مساءكوا شوكولا





زمانكوا افتكرتوني انتحرت



بس الحمد لله جت سليمة المرة ديه



وانقذنا ما أمكن انقاذه




كنت في النادي لا بيا ولا عليا



بدعي على الكابتن وبقوله افتري يا مفتري



بكرة تخش الجيش وافرح فيك



وبالفعل كما تدين تدان



والدعوة جت بالعكس




خرجت لقيت 10 ميسد من صحابي..



عرفت انها جت ....




اصابتني حالة برود غريبة




وكلمت انتيختي اللدودة


رقمي القومي اللي في البطاقة



(ايوه ما انا من اصحاب البطايق)



ورقم الجلوس المميز بتاعي




والحمد لله جابتهالي..



وجبت 96.1% الحمد لله طبعا



الدرجات كويسة على اساس اني متوكستش



غير في الكيمستري لأني بكرهها وده المتوقع




وجبت الفل مارك في الرياضة حبيبتي فقط



هتقولولي بسطانة يا رضوى؟؟




هقولكوا الحمد لله...بس من جوايا عادي




فيه ظلم جامد..بس ده النصيب بقى :)



واخيرا احب اقول كونجرااااااااااتس لكل اللي نجحوا..



وهارد لاك...بس اياك حد يزعل


الحياة مش ثانوية عامية وبس




واحب اقول لكل شاب وفتاة

لم يوفقهم الله لا تنحرف..ولا تنتحر



فالمشرحة مش ناقصة قتلة والجريمة لا تفيد..




ده اولا عشان العساسيل اللي

اطمنوا عليا والمكالمات اللي جتلي




______________________


ثانيا: رحت حفل توقيع كتاب كيف تبحث عن السعادة


لمحمد غالية...


الكتاب جميل على اساس اني فعلا


ببحث عن اي سعادة اليومين دول


بس واضح انها قليلة في السوق



ولسه بعافر



أجمل اهداء في حياتي


اهداء الى الصديقة التدوينية

ارجو في نهاية الكتاب

ان تعرفي انه لا يوجد ما يدعو للقهر

استعدي وانظري
لكي تكوني مهندسة طموحة


محمد غالية

3-7-2010



_________________




ثالثا سؤال الحلقة

انا بقى استخبيت فييييييين ^_^؟؟





ايوه انت ياللي هنا سامعاك..



لأ لسه بعرف اكتب وكتبت حجات



بس مش هعرف انزلها





بيكوووز مش هقدر اتابع الردود



وديه حاجة بتضايقني



مروركوا بينورني ولازمن ارد عليكوا واحد واحد



اسفة اني مش بعدي عليكوا والله غصبن عني



مش هقول ظروفي لأن الاغلب عارفها



دعواتكوا بس..وقريبا هرجع البيت



وارخم عليكوا بتوبيكات مقهورة تاني

هتروحوا مني فين يعني :)







Monday, June 14, 2010

تفشي ظاهرة البصل...


أعزائي المدونين والمدونات..كح كح

عفواً

معكم من قلب الحدث محدثتكم


تنقل لكم حالة الهيستريا البشعة


التي طرأت على جميع مدارس الثانوية


مسببة بذلك حالة بكاء هستيرية للطلاب


او حالة ضحك مستعصية لا يمكن ايقافها


فيبدوا أن البصل تفشي في البلاد وبين العباد


فاصبحت الشوارع سيول من البكاء لم ارها في حياتي


وبرغم من ذلك وقفت في وسط الجموع الهائلة


لنقل هذا التقرير الاستثنائي


ومن الاشاعات التي صدرت من احد المارة عن هذا النويح..


هي ان الريس _اطال الله في عمره كمان وكمان _مات الله يرحمه


ولهذا بكى الشعب كما لم يبكي بوفاة عبد الناصر والسادات


لذا يا اعزائي....


متصدقوش اللي قالوا ان الامتحان صعب..


فهذه سيمفونية الثانوية ..


و علت اصوات توسلات الطلبة البائسين وأهاليهم الطيبين


موجهين كلامهم للثانوية العامية


اللهي ربنا يرجعلك نظرك ما تعملي ف العيال كده


ربنا يطول في عمرك وما يلغوكي ابدا..


وعندما التقينا مع احد الطلاب ابرز تفاؤله تجاه الامتحان قائلاً


انجليزي ده يا مرسي؟؟؟؟؟؟هع


وطالبة أخرى قالت:

انا اول مرة اعرف اننا بنمتحن هيلوغريفي
عااااااااا



اعزائي المدونين...

انا من هذه المدونة اناشد سيادة الريس

انه يوقف زراعة البصل اللي سبب سيول من الدمع

جوا المدرسة وفي مربع المدارس كله

ويحل الخيار محل البصل

وهكذا يجعل من اغنية الخيار نشيد وطني في المدارس

حتى يتوقف مس الجنون الذي اصاب الطلبة واولياء الامور

عاااااااااااااااااااااااااا




كانت معكم...من أمام باب مدرستنا



طالبة مقهورة


24 ساعة للأخبار الاكسكلوسف


القااااااهرة





_________
ملحوظة: شكرا على سؤالكوا واعتذر عن عدم الرد على البوست اللي فات حتى الان..


ملحوظة تانية
..وحشتوني جدا كلكوا :)