يا بخت المجانين!!!

استيقظ في السادسة على صوت زقزقة العصافير..
اللعنة!! حد يصحي حد دلوقتي هقوم ابيع لبن

نظرت من نافذة حجرتي وقلت لهم:

هششش خلي عندكوا دم عاوزة انام...هلاقيها منكوا

ولا من الثانوية العامية

ومن الواضح انهم كانوا يتحدثوا في موضوع هام جدا

فلم يتوقفوا لثانية ولا حتى عبروني...

ووقف امامي عصفور على اقرب فرع من نافذتي

ينظر إليّ بعينين ينطلق منها الشرر كأنه بيقولي

والله ما أنتي نايمة النهارده..علوا يا ولاد الفوليم...

والولاد اشتغلوا سيمفونية الخيار والعنب بصوت زقزقاتي مزعج 
اغلقت النافذة ويأست من امكانية النوم في هذه الضوضاء..

اتعجب ممن يحبون تلك الكائنات المزعجة

اللي فالحة فيه انها تجيب صداع مزمن وانفلونزا طيور !!

انطلقت لمطبخنا لعمل كوب نسكافيه يعدل الدماغ الخربانة

لعلي استطيع ان اذاكر يمكن افلح ولا حاجة

حاولت اشعال الولاعة ولكنها لم تعمل...

وماله برضه امال هما اخترعوا الكبريت ليه

ابحث في الشقة بأكملها عن عود كبريت فلا اجد خشبايه...

وهنا يأتي إلى ذهني صورة جد جد جد جدي الاعظم

أيام العصر الحجري حينما كان يشعل النار بالحجارة...

وعندما لا اجد حجارة في منزلنا

استشيط غضبا وترتابني حالة من الجنون...

على رأي المثل جت الحزينة تصحى ...ملقتش عود كبريت

حاولت ألا افقد اعصابي فالانسان الذكي المتزن

هو من يجيد التعامل في تلك المواقف هذا ما قيل لي سابقاً..

دائما ما كنت اعتقد ان الانسان زي الكوباية
يفضل يشيل يشيل لحد ما يتدلق

لو محدش شرب الكوباية او فضاها بأي شكل

والآن انا كوباية ولازم اشربني 

لهذا سأفتح التليفزيون واتفرج على اي حاجة

تنسيني بداية اليوم الغير مشجعة بالمرة

مهو مفيش مذاكرة على كل حال

وسأبتعد تماماااااااً اكرر تماماً

عن النشرة الاخبارية

(شخصيتي قوية مش كده)

وافتح الاقي التي في شغال على دريم 2

انه خطيبييييي اللي ميعرفش اني خاطباه احمد المسلماني

اشطة جداااااا

خلص المسلماني ووجدت النشرة تطاردني..

مش هيجرا حاجة

لما نشوف فيه ايه ف الدنيا..

(قوية قوية مش اي كلام )

وقفات احتجاجية..عادي

الاسعار ف الطالع..طبيعي

 مهزلة مجلس الشعب..وايه الجديد

نقيب الاطباء بيشكر في بطرس غالي..
نفاق معتاد لجر ناعم مع الوزير..

خطط سياسية لفقع المرارة الشعبية مليش دعوة بيها

كده انا مطمنة عليكي يا مصر...

انتي في أيدي امينة...

امينة مرات سي السيد اللي عمرها ما بتخرج من وراه


تؤ تؤ مش عاوزة اتنرفز بلاش اتنرفز...

محدش يقدر ينرفزني غير بمزاجي 

هيا بنا نخرج..هوا ده الحل...

اي نعم الساعة 8 وشوية وأي نعم ده يوم في وسط الاسبوع

بس..مفيش مانع انزل ..يمكنني احتمال الزحمة

برغم رخامة مربع المدارس أمام منزلي وكثرة الطلاب

اللي بينطوا السور دائماً

(للي ميعرفش نط السور هي

رياضة تشبه القفز بالزانة مع الاختلاف

انهم بينطوا بدون عصا..رياضيون متمرسون)

نزلت باسرع من السرعة السريعة

وعند اخر سلمة في البيت

شعرت باختلاف في قدمي..بعد ان أهلت نفسي للنظر

 وتوقعت انها هلاوس 
ببص لقيت الشوز اتقطع...لااااااااااااااااا

 
ده الشوز الجديد..ابو 50 جنيه..ده انا عانيت على ما اشتريته

..ده اول حاجة اشتريها من حر مالي..لا لا لا لا

حاولت بكل ما املك من قوة

اني افضي الكوباية اللي بتتملي جوايا غضب

وكل شوية اهدي نفسي .. بس الكوباية ناقصلها شوية وتتدلق

ويا خوفي لو اتدلقت 

احتمال تلاقوا خبر ف الاهرام 3 قتلى و55 مصاب

من فعل طالبة ثانوية عامة اصابتها نوبة من نوبات الثانوية العامية

هنا ادركت انه لا فائدة كل شيء يصيبني بالجنون ،

كل صوت بجانبي يعصبني..يوم سئ اخر
كل شيء ضدي النهارده..

في هذه الحالة أفضل البيات الشتوي في شهر 4..

سأنام حتى اشعار آخر
برغم اني اشعر بالرغبة في الاحتراق

بأعواد الكبريت اللي مش موجودة ف البيت

أو بطريقة جد جد جد جدي الأعظم بالحجارة..

آآآه لكم احسد ذوي الأعصاب البارده على برود اعصابهم
واحسد المجانين على غياب عقولهم..

...

سيدي الوزير

سيدي الوزير

انحني لحضرتك احتراماً كما لم افعل لمسئول من قبل

تفاءلت بداية بقدومك..

لمعاناتي مع اتنين من الوزراء

 

ولم اعتقد بوجود الاسوأ

واتخذتك قدوة حينما تكلمت قائلا

 نحن نحسن النية حتى يثبت العكس

قالوا انك زي غيرك وهتوقعنا ونضيع اكتر

بس مصدقتش 

فنحن

لن نسقط أبداً لأننا وصلنا إلى  القاع

بدأت بتفكير إيجابي ومهاجمات عديدة

وهذا هو المطلوب

فالتعليم يحتاج لإعادة ترميم وبناء من جديد

غيّر واحنا معاك عشان نبقى احسن....احسن بكتير

وبرغم وجود الضحايا..فأنا رضيت بكوني ضحية

لأجل مستقبل افضل

ولأي حد هيهاجم حضرتك هسأله

لو كنت مكانه كنت عملت ايه؟؟؟

رسالة جدية من طالبة مصرية

شكلها مش هتبقى مقهورة

_______

عدت من جديد..اعتذر عن الغياب

ومعايا خبرين و واحد اهم م الاتنين ..

الخبر الأول.. حصلت على المركز الأول

في مسابقة الطالبة المثالية على الإدارة

وهي مسابقة بنتسأل فيها عن

معلومات عامة ،أحداث جارية،

القرار الوزاري ،المواهب والتفوق

(شكرا لميس ميرفت وآلاء

أنا دخلتها واجتهدت عشانكوا بس )

وطبعا مش هقولكوا اني كسبت بسبب اني رغاية جدا..

وكانوا بيسكتوني بالعافية عشان يكملوا..بس ابداااااا

بتحلم يا حلمي

الخبر الثاني..

امتحنت الامتحان التجربة هيهيههههيييييييهي واخدنا الدرجات

والغريب اني مش هدخل دور تاني ومسقطتش ف الكيميا 

^_^

اما الخبر الاهم اللي سبته ف الاخر

انا

 

يعني انا

 

اللي هوا موااااا

اللي بكتب الكلام ده

 اطردت م الفصل لأول مرة ف حياتي عشان نسيت كتاب العربي 

وشعرت بالاحساس الاروع على الاطلاق...هييييييه انا عاوزة اتطرد تاني

...

اللي بيكدب بيروح مارينا

منذ نعومة أظافري وأنا أكره تلك المادة المسماة جغرافيا كره العمى

ولكن لغرابة الوضع

ولا اعلم كيف ومتى وأين حدث هذا ..

كانت من المواد القلائل اللي بجيب فيها الدرجات النهائية..

ومؤخراً اكتشفت أنني كنت اكذب اكتر من مسيلمة الكداب

في الامتحان..

فبرغم اني لم اذاكر ولا فتحت كتاب إلا اني حصلت على الخلاصة..

فبمجرد رؤية كلمة معينة استدل على الاجابة ببديهية وبساطة

يعني بمجرد ما الاقي كلمة القطن

أكر الاجابة المحفوظة عن ظهر قلب..

قطن مصر من أجود أنواع القطن في العالم

ويتميز بأنه طويل التيلة..فول ستوب

وتكرر الامر العديد من المرات فعندما كنت اجد كلمة قمح..

قمح مصر من افضل انواع القمح

ومصر أولى الدول المصدرة له...

أما جو مصر يا سلام عليه ..

حار جاف صيفاً لطيف معتدل شتاءاً.

أما في الواقع وعند النظر للموقف من موقعي هذا

بعد ما بطلت الجغرافيا زي ما شعبولا بطل السجاير

فأنا لا استحق الدرجات النهائية بل استحق وسام مارلين في الكذب..

لأن ببساطة كل ما كتبته كذب

*فقطن مصر اصبح قصير التيلة أو بالاحرى معندوش تيلة ...

*اصبحنا من أوائل الدول المستوردة للقمح

بعد ما كنا بنصدره لروما ومنغنغينها

(وده بغض النظر عن القمح المسرطن

فده مجرد اجتهاد خارج المنهج و معاه طابور العيش والانابيب..)

ولأننا مش عاوزين نضرب السياحة فنظل نردد ان جونا ممتاز

وقد صار في الواقع

*مولع نار صيفاً متلج مكهرب شتاءاً..

لا اعلم لماذا يصرون على تدريس الكذب

ومناهج عقيمة واحصائيات من عام 2000 قبل الميلاد؟؟!

ويرجعوا يقولولنا اللي بيكدب بيروح فيييييين..!!

ويرد ابن عم عبده البواب بكل براءة ويقول..

اللي بيكدب بيروح ماريناااااااا

وأحمد الله انهم لم يعيدوا تصحيح امتحاناتي من رابعة ابتدائي

وإلا لوجدت نفسي لسه بعيد في KG 2

. . . .

نظرية 1(النفسنة)

على كل طلاب الثانوية العامية..قتل نفسهم كلياً وخاصة شعبة العلمي

(هما ليه سموها شعبة صحيح؟؟)

مش موضوعنا بس لو حد يعرف يقوللي

لقد ابرزت المفاوضات والمناقشات والمهازل انتشار الحقد الطبقي

(والطبقتين والثلاث طبقات أيضا)

في نفوس الطلاب الشاطرين والدحيحة الغيرانين على مجهوداتهم..

فالطلاب يا أعزائي حسب نظرية النفسنة ينقسموا لتلات انواع

(نظرية النفسنة هي نظرية ستدرس قريبا في الكليات والأندية

وستعتبر من أعظم النظريات التعليمية لفهم طلاب الثانوية)

*أولاً النوع الدحيح اللي بيفطر بالكيميا ويتعشى بالأحياء ..

*ثانياً النوع اللي نفسه يبقى دحيح

(وهوا دائماً ما يتظاهر بالشطارة والتحدي وحب النوع الأول

..ميدخلش عليكوا كلهم كدابين وهذا الحب بااااااااااااااطل )...

*أما الثالث هو النوع اللي داخل الثانوية العامية

عشان يتفرج ع الصراع بين النوعين الاول والتاني ويضحك فقط

(وهو النوع الأليف فيما بينهم)..

أما النوع الأول والثاني فتجد الطالب منهم بمجرد ذكر كلمة المذاكرة

وبكل براءة (ياااااه اسكتي ده انا بقالي اسبوع مبفتحش كتاب)

والغريب ان الاسبوع الذي قبله كان يقول

(يااااااه جتنا نيلة مين اللي دخلنا علمي بس بقالي شهرين ما بذاكرش)

وهكذا اعزائي اكتشفت ان معظم الطلاب مبيذاكروش

من قبل ما الدراسة تبدأ ب 3 سنين

أما النوع الثالث الغلبان فعندما يقول أنا مذاكرتش

يبقى مذاكرش فخد كلامه ثقة

ومن أروع الأحاديث التي يمكن أن تجرى في التاريخ

حديث بين النوعين الأول والثاني

فتشعرك في لحظات الاستماع وكأنك في السيرك

تشاهد القرد ومدربه ينطان الحبل معاً في نفس الوقت

ويُفليَّان بعضهما الآخر أحياناً

وانت هو المشاهد المسكين التي تكتفي بالايماء

والضحك الداخلي لأنك لو نطقت هتكون ضحية

(ملحوظة هامة جداً جداً جداً : ضحايا الثانوية العامة ليس لهم ثأر ولا ديه

متعملوش شجيع سيما وتتجرأوا ان تنقدوا هذا الجدال الطبقي اللهم بلغت)

وللبحث في اعماق المشكلة الأساسية وهي الحقد الطبقي الذي يشعر

به الطالب من دول فنجد ان السبب واحد من اتنين..

*إما استعباط يلازمه استهبال فيحدث تفاعل

مكوناً شخصية معقدة والراسب المتكون قلب اسود ومهبب

و لا ننسى الاهل عامل حفاز يزيد من سرعة التفاعل المنطلق بسرعة الصوت..

* أو الخوف الناتج عن سوء استخدام النفسنة وهو ينقسم لنوعين

1-خوف الدحيحة من المنفسنين

(لحسن يكتشفوا انهم بيذاكروا ويقروا ويحسدوا بقى واديله)

2-وخوف المنفسنين م الدحيحة

( احسن الحسد والقر ميأثرش فيهم اوووبس ديه تبقى مصيبة)

السؤال هنا ..

هل تمتلك ما يكفي من المهارات لتصبح سواءاً منفسن أو موس مذاكرة؟؟

أم تفضل ان تقف وتتفرج ...وتضحك

..

3 ملاحيظ بره الموضوع

ملحوظة رقم واحد : لمريم و سارة وكل اللي موصلوش لتانية ثانوي

لا اقصد اعقدكوا نيفررررررر انتوا عارفين كم انا اوبتيمستك

يعني متفائلة ( انا ثقافتي فرنش فبتكلم انجلش كتير)

ولكن كلنا لها ولسه قدامكوا فرصة تحولوا تجاري او تدخلوا شعبة ادبي

مش هقولكوا اقعدوا ف البيت بلا تعليم

لأني عارفة ان الشهادة مهمة في عمل مروحة في الصيف

ده الصيف هيبقى حر اوي

ملحوظة 2: فرحت جداً بتعليقاتكم ع البوست اللي فات

واشكركم للمتابعة مقدماً

ملحوظة 3 : التوبيك الجاي مش هيكون قبل يوم 26-2

الجمعة الجاي..أولا لأني رجعت المعتقل قصدي المدرسة

وثانيا لأني عندي امتحان مصيري ف اليوم ده..

وثالثا لأني حاسة التوبيك الجاي هيدخلني جوانتانامو

فهودع كل قرايبي الاول وارد الامانات الى اهلها

وابقى انشره :)

..

سلام عليكم