Monday, August 30, 2010

ابعد عن الشر..وبطل غنا صدعتنا+مستشفى ابو الريش



فيه مثل مصري قديم..في منتهى الروعة

بيقولك..
"ابعد عن الشر وغنيله"

وهذا المثل لا يعني البتة انه لما يطلع عليك مجموعة قطاعين طرق

مسلحين باسلحة نووية كساطور الجزار بأن تبدأ بغناء سيمفونية لعبد الحليم..أو شادية

و لو حرامية متحضرين..وشايلين مطواة قرن غزال تغنيلهم هيفاء او نانسي مثلا

وتتوقعوا ان هؤلاء الحرامية هيسيبوكوا تنطلقوا..

كده ..نبقى بنغني على نفسنا

واللي يقولك الثانوية العامة مجرد سنة عادية

خاصة في مصر..يبقى بيغنيلك برضه


احكيلكوا انا... كنت اظن قبل دخولي تلك المرحلة

ان الثانوية العامة هي فترة الشباب والصياعة..
عفوا اقصد الشباب والأحلام
قبل أن ادخلها و تتحول لبعبع (نفسيا على الاقل)



تجربتي الأولى مع الثانوية بدأت بدخول
اخي الأكبر الصف الثاني الثانوي
وبدأ شبح المذاكرة وبالطبع يجب تنمية شعور الانتماء لدى الأسرة

فتم اعلان قانون الطواريء وحالة التأهب للحرب
(حالة طواريء جيييييييييييم)

بداية بمنع التليفزيون والكمبيوتر والبلايستيشن..
وما يصاحبها بقى من الاتاري والخروجات والنوادي

عااااااااااا..سبتولي ايه يا جدعان
ظننت ان حالة طواريء ج موجودة في بيتنا فقط
حتى دخلت بنفسي وادركت انه شعار قومي

(في بيتنا ثانوية عامة)..


والمهم عدت سنتين اخويا ف المنفى قصدي الثانوية العامة على خير
ودخل كلية شرطة ..من كام سنة كده


وبالتالي كنت اظن ان دخولي سيكون خفيف خفيف لأن من المعروف

اني مش على عاتقي اي ضغوطات..كما اني نوعا ما بحب اذاكر بعض المواد
فسأنقذ ما يمكن انقاذه والتعليم المصري ماشي بالفهلوة

وفضلت اقول لنفساويتي بت يا مشمهندسة رودي ديه سنة عبيطة عادية
اوعي تستعبطي فيها وبطنك توجعك زي العيال التانيين..

ومن الواضح اني كنت بغني على نفسي وبرد عليا وانا بقول
ابتاااااااااا ثقي فيا..ولن اخذلك ^_^

ولكن ما حدث غير ذلك..فبدأ بقدوم شهر فبراير المدرسين
يدولنا الموشح اياه بتاع لو فشلت في ثانوي

هتفشل طووووول حياتك

ونظام انت مش ابني انت ابن حسن يوووووسف..الخ الخ

لحد ما جالي التهاب في المعدة..فضل اسبوعين محترمين

الفكرة متأصلة بداخلنا المعادلة الحقيرة نفسها


الفشل ف الثانوية = الفشل ف الحياة بأكملها


برغم ان ممكن حد يتخرج من كلية محترمة جدا
وميعرفش يشتغل او يكون غير مؤهل للعمل

الفكرة نفسها غلط...ولو بنبص عليها بحكم الكياسة
ونظرة المجتمع للطبقات التانية

فنبقى بنرتكب جريمة شنعاااء(جهبوزة ف اللغة العربية من يوماتي)

احترامك مش بوظيفتك..احترامك بتعاملك واخلاقك

كفاية غنا على نفسنا صدعتونا....وبصوا للي نجحوا بكل المقاييس
وهما مش دكاترة ولا مهندسين ولا مدينة نصر

فخدوها مني نصيحة..عاوز تعيش مرتاح
شيل 3 حاجات

شيل الزايدة...اسمها زايدة فلماذا نتركها؟؟

شيل اللوز..فلا ينوبنا منها سوى وجع الزور كل شوية..

وشيل دماغك م الثانوية العامة...

(يعني متتعبش اعصابك ولا تضغط
على حد فيها بقولة ذاكر وهتفشل)


ولأني حتى الان لم انعم بالاولى ولا التانية..
فقررت ان انعم بالتالتة بعون الله :)

وانا داخلة على اعتاب 3 ثانوي....وبدأت احس بكهربة الأجواء عند البعض

لا تبالوا يا أعزائي


.........................


ملحوظة للي بيسألوا عليا ومبكونش هنا
غالبا لو مش ف المدونة ديه هتلاقوني ف مدونتي الاصلية التانية
افعصوا اللينك هنــــــــــــا هتروحوا على هناك


...........


حاجة اخيرة

بالنسبة لمستشفى أبو الريش والتجمع الرائع

اللي خالد همس الاحباب عملوا بالاشتراك مع الاستاذة داليا


حقيقي انا مبسوطة لمجرد سماع الاخبار

من عند سوني وفقري

وانه كان يوم رائع

معنى انك تسعد او تريح حد تعبان بشكل مباشر او غير مباشر

فده حاجة كبيرة اوووووووووووي

قلبي كان معاكوا ووالله كان نفسي اجي

بس الدروس ووجع القلب ده منعني (بلا ذكر تفاصيل)

يارب المرة الجاية يكون معادها احسن

وهلغي اي دروس ف يوميها حتى


فاتيما كان نفسي اشوفها..واسلم عليها تاني

وكيكي كنت هقولها خسيييييييييييتي 10 مرات
زي ما اتفقنا ^_^


وفقري كنت هقوله الف سلامة فيس تو فيس

وسوني..كنت هشوفها لأول مرة

ومنونة وخالد ورامي طبعا وناس كتييييييير اكيد راحوا

مكنش فيه نصيب المرة ديه

كان هيبقى تغيير اني احضر حاجة زي ديه مع مدونين

ولأول مرة مش هتكون من تنظيمي وابقى شايلة 3 اضعاف الهم

ومكنتش هتعسب خااااااااالص ده انا مؤتبة(وش بريء)

ربنا يعيننا جميعا على عمل الخير
ويسعدكوا ويكرمكوا

مع اجمل تحياتي المقهورية


67 comments:

hend anwar said...

يا دى الثانوية العامة اللى شاغلين بيها
انا بدات التوتر والنبى ياختى ماتجيبى السيرة دى تانى

والله سنة زى اى سنة

والمفروض بردوا اننا نروح عن نفسنا علشان نعرف نذاكر كويس
مش نكبتها

وبالذات كلمة قومى ذاكرى عينك هاتطلع
من الكمبيوتر بجد كلمة تنرفز وانا قلتلهم فى البيت طالما عارفة مصلحتى وماقصرت فيها سيبونى على راحتى وان شاء الله نحقق اللى عايزينه


اما بالنسبة للمستشفى فادا شىء كويس جداا ربنا يجعله فى ميزان حسناتكم

hend anwar said...

اتمنى ان ارى رايك فى اخر بوست ليا


دمتى بخير

راء said...

شمس الحرية

بالظبط انتي جبتي الخلاصة انا كنت مقضياها لعب اساسا اصلا
والحمد لله كنت ماشية حلو

ربنا يتمها على خير

امين ربنا يجعله ف ميزان حسناتهم

وخلاص قولت رأيي :)

Anonymous said...

عسل وسكر ...ايه الجمال ده يا رودى ضحكتينى كتير...

علياء said...

عسل وسكر ...ايه الجمال ده يا رودى ضحكتينى كتير...

راء said...

استاذة علياء

ربنا يخليكي يارب :)

حقيقي منوراني ورافعة من موعناوياااااتي

جايدا العزيزي said...

كل اسرة مصريه

اول ما يدخل حد عندها الثانويه العامه


تبدا عالطول حاله الطؤارئ


كل شئ ممنوع

ويبدا الاستعداد والتأهبات

وكانهم دخلين حاله حرب


ربنا يستر


اما بخصوص ابو الريش


انا تابعت الموضوع

وكنت سعيدة جدا بيه


ربنا يسعد امه رسولنا

ويجمعها دايما على الحب والخير


اجمل شئ اننا نحس باوجاع بعض


نتشارك الالام والمرض


اشكرك غاليتى


تحياتى

قوس قزح said...

ان شاء الله المرة الجاية تكونى معنا
و لو تحبى ممكن نحاول نرتب ميعاد اليوم بحيث يكون مناسب لكى :)

totahabib said...

فعلا والله انا بكره الثانوية العامة دى جدا مع انى خلصتها
وفكرة ان الناجحين بس اللى بيدخل طب وهندسة اللى اتزرعت فينا من صغرنا فكرة غبية وسخيفة اوى
امال لما الناس كلها تدخل طب مين اللى هيعيا ؟؟!!

وبالنسبة للمستشفى فده شىء جميل اوى ربنا يجازيكوا خير عليه
بس انا مش فاهمة اوى ياريت لو فى عمل خيرى زى ده تانى تعرفونا المكان والوقت وشكرا

♥ ♥ Amira Samy ♥ ♥ said...

حبيبتى ربنا يستر
احنا دخلين زى ما بيقولوا على
مطحنة يا نترفع يا ننزل علطول
و الله كلامك صح فى كل حاجة
فى ناس كتير نجحت من غير الثانوية
بس نقول اية لازم نتعلم

اما عن مستشفى ابوا الريش
فيارب يبارك فيكم و يجعله فى
حسناتك ميزان
رمذان كريم

R-H-S said...

انا خلصت كلو
هعهعهعههع

وبعدين انتي بتقوليلنا اخوكي في كليه شرطه بتخوفينا يعني ولا ايه ؟ هه؟

بصي ياست الطالبه الثانويه دي قسمه ونصيب زي الجواز كدا ممكن يكون نفسك في حاجه وتجيلك حاجه تانيه عادي جداا ممكن تدخلي الكليه اللي انتي عاوزاها ونصيبك يوديكي في حته تانيه

فانتي اجتهدي كدا زي ما اجتهدي في سنه تانيه وتعبك مش هيضيع علي الفاضي

وانا خلصت كمان مره ووش مطلع لسانه

تحياتي

جوجو said...

السلام عليكم
والله الثانوية العامة دى كارثة
ربنا يهون لسالى سنة ان شاءالله
تحياتى

داليـ ـ ـ ـ ـ ـ ــــا said...

تعرفى يارضوى
انا حاسه انى شايله همك فى الثانويه العامه دى معرفش ليه
اصلك انتى اللى عملتى فيا كده
يالا كلها سنه بالطول بالعرض وهنرتاح

تحياتى يامقهوره

Ramy said...

مش هرد غير بكلمة واحدة

أحنا بلد

غنيلى شوية شوية

غنيلى و خد عنية (:

مع الأعتذار لأم كلثوم ربنا يرحمها

نحن نغنى فنحن شعب موجود

الغنوة البيضا تنفع فى اليو الأسود

على فكرة كنت عاوزك تيجى علشان نشوف الشخص اللى نور المدونة بأول تعليق
و كان فى هدية مخصوصة و كمان شيكولاته كادبورى بس راحوا لصاحب النصيب

بس ملحوقه بأذن الله فى لقاءات تانى

أهم حاجة تعدى الثانوية العادية خالص
ربنا يوفقك دايما

عارف التعليق جه متأخر بس صدقينى لسه لامم أشلائى من السفر (:(:

اقدم عاصمه فى الحب said...

السلام عليكم

كل سنه وانتى طيبه
.
البوست جميل اوى ومسلى
طريقتك فى سرد المواضيع بتعجبنى جدا
بس اللى عايز يكون بيكون
حتى لو ايه الظروف
المهم الاراده حتى لو فى صنايع
*
انا عن نفسى حبيت الثانويه العامه وعلشان كده فشلت فيها
وانا ابشرك بقه وبشده .
طالما مش بتحبيها يبقى هتحبك وهتعدى فى السكه اللى انتى عاوزاها
ربنا معاكى
الله الوطن الثانويه العامه

ودى وإحترامى :)

Nouran said...

لا يا بنتي الثانويه العامه ديه جميللله
استني انت ان شاد الله لما تدخلي هندسه هتشوفي الجنان اللي علي حق
و اهم حاجه اصلا في الثانويه ديه الروقان ثم الروقان ثم الروقان
و هتبقي زي الفل ان شاء الله
:)

Rosie said...

يااه أنا افتكرتك فى هندسة لما قولت يا بشمهندسة..لسه فى البعبع..ربنا معاااااك...
أدعوك لقرلءة هذا البوست
http://lifeeddy.blogspot.com/2009/08/blog-post.html
ملخص تجربتى فى ثانوية عامة و مقولقيش بقى على دى تجربة..
عارفة اللى بيقولك هتفضل فاشل طول عمرك لو فشلت فى ثانوية عامة ..هو الحقيقة بقى و الأكيد ان التدمير النفسى اللى بتسيبه ثانوية عامة فى البنى آدمين اللى بياخدوها على أعصابهم اوى هو ده الحاجة اللى بتفضل معاك طول عمرك أو على الأقل فترة محترمة من الوقت....

بيطرية ومش بايدى said...

عجبتنى اوى الفشل فى الثانوية=الفشل فى الحياة
اديتنى بريق امل وبصيص لنور بلا حدوووود:D
حالتك زى حالتى بالظبط بدأت باخويا الاول وقبل منى بسنة واحدة وتخيلى بقى ساعة ماانا دخلت 2 ثانوى كنا احنا الاتنين فى ثانوية عامشة يعنى موت وخراب ديار
بدات كده وختمت ببيطرى ولله الحمد

اما بالنوسبة لابو الريش
فانا كمان كنت هناك كان اول لقاء ليا معاهم بس الصراحة كان اجمل يوم فى حياتى
بين قوسين باغيظك شوية:D
تحياتى وعزائى الحار جدا لقهرك

العلم نور said...

المشكلة أن الشر أطرش ولو غنينا له مش راح يسمعنا وراح يجي يجي

modcena said...

السلام عليكم
طبعا كل سنة وانتى طيبة

بصراحة الثانوية العامة تعمل اكتر من كدة

ومهما غنيت او عيطت او حتى صوتت مش هاتسيب حد فى حاله

وجميل جدا التنويه عن المستشفى
ربنا يجعله فى ميزان حسناتك
ويا رتنى كنت من القاهرة علشان اشارك معاكو

اشكرك على تعقيبك عندى
واتمنى دوام التواصل


تحياتى
سلام

الامير سلطان بهنسى سلطان عدو المراة said...

ونبى اية.



مقهورة من اية بقى

دة مفيش بنت تتقهر ابدا

العكس

تحياتى

سندباد said...

جميل اوي جو السعادة والتفاؤل في بوستاتك ادامها الله عليكي
تحياتي وسعيد بمروري علي مدونتك

راء said...

جايدا العزيزي

اهلا اهلا يا جميل :)

هيا فعلا حالة استعداد شديدة ومبالغة بتخلق رهبة من السنة نفسها

وانا تابعت برضه وكنت مبسوطة باللي بيحصل في موضوع ابو الريش

اكتساب السعادة من سعادة الاخرين ف حد ذاته شيء عظيم :)

منوراني جدااااااااااااا

راء said...

قوس قزح

ياااااااارب يا استاذة داليا

يخبر ابيض معقولة ده كله علشاني..حددوا انتوا بس اليوم اللي الاغلب فيه بيبقى فاضي يعني يوم جمعة مثلا وانا بعون الله اكون رستقت نفسي خلاص والغي الدروس براحتي

ربنا يكرمك يارب ويسعدك

راء said...

توتا حبيب

بالظبط يا توتا نفس فكرتي ورأيي
لازم الثقافة تتغير ونتعلم ازاي نقدر كل عامل من الاصغر للاكبر..للأسف احنا اقتصرنا المتعلمين ع الطبقة العليا بس

بالنسبة للمستشفى يا ستي
من فترة للتانية كه ماشاء الله عليهم قوس قزح وخالد همس الاحباب
الرائعين بينظموا زيارة مثلا لمستشفى وبيكون بعديها لقاء للمدونين..بنتقابل فيه وبنتكلم مثلا بعد ما بنكون عملنا خير

انا حتى الان لم يحالفني الحظ ف حضور اي لقاء من دول..بس ناوية ان شاء الله المرة الجاية اكون معاهم

وعلى فكرة مدونين كتير بيكتبوا ع الحجات ديه قبل تنظيمها بفترة وانا لولا بس انشغالي وحالتي النفسية كانت وحشة اوي كنت كتبت كمان واعلنت الموضوع
ولو فيه اي جديد اكيد هقولك :)

شكلي رغيت كتير بس مش مهم البيت بيتي

راء said...

سلسبيل

الحمد لله على كل حال وكل مرحلة لازم نتعلم نستمتع فيها بوحاشتها قبل حلاوتها :)

امممممممميين يارب بس للاسف انا مكنتش معاهم

راء said...

استاذ مونبه

هههههههههههه مبلاش انت يا دفعة
ايون بخوفك ونسيت اقولك ان بابا كمان ف الشرطة ^_^
وممكن اخوفك اكتر واقولك اني بعد هندسة ان شاء الله هدخل شرطه
هعهعهعهعهعهعععععععع

ربنا يخليك يا جهاد.كله هيعدي مش مهم

منورني يا دفعععععععععة..خلصت الخفيف ناقص التقيل

راء said...

جوجو

اها عندك حق..اختراع فااااااااشل وبااااااااااطل

منوراني وميرسي ع المرور

راء said...

داليا

لييييييه كده بس اذا كنت انا مش شايلة همها ههههههههه

ازيك يا قمراية ليكي وحشة

راء said...

رامي :)

ههههههههههههههههه عندك حق

لا لا لا كله الا الشوكولا اي حد بقابله م المدونين او الناس اللي ع النت لازم يجيبولي شوكولا علامة مسجلة خلاص اتحفظت ^_^ عشان كده محدش بقى بيحب يقابلني هههههههههههه
لا حقيقي كان نفسي ااجي بس النصيب بقى

ربنا يسعدك يارب

راء said...

اقدم عاصمة ف الحب

هههههههههههههه..بتبشرني جدا على فكرة
الحمد لله حتى الان انا مش كاره الدراسة بس كارهة اسم السنة واللي بيحصل فيها من عذاااااب

يللا كله هيعدي :)

راء said...

نورهان

هههههههههههه انتي بتبشريني زي يوسف برضه ..ربنا يستر وتبقى هندسة سنوات بمبي كده مش ناقص الواحد بهدلة

وجاري تنفيذ الوصية اصلا :)

راء said...

هكمل الكومينتات بكره عشان تعبت :)

باحث عن حب said...

السلام عليكم
بالتوفيق التام الكامل باذن الله

VÖltaa said...

المهم انك خلصتى من الثانوية العامة :)

كل سنة وانتى طيبة

راء said...

rosie

لا يا قمر..انا لسه ف ثانوي :)

شوفت البوست وتقريبا نفس اللي انا فيه مفيش اي فرق
ديه سنة مبروكة مبتتغيرش :)

منوراني يا روزي جدا

راء said...

بيطرية ومش بايدي

ههههههههههههههه
البريق اللي انا عايشاه مع كام مليون مقهور

يبختك يبختك يبختك
انا مش متغااااااظة انا هطق بس

على فكرة بيطري جميل اوي مع اني مجربتش بس بحسها مميزة الكلية ديه

:)
منورة

راء said...

ام الخلود

قضاء لابد منه بقى

:)

راء said...

modcena

وحضرتك طيب

هيا مش للدرجة..بس هنعمل ايه هنقضيها بكل شكل

يارب ويقدرك كمان على فعل الخير في اي مكان انت فيه

ان شاء الله متواصلة مع حضرتك دايما

esraa said...

السلام عليكم
أولا ان شاء الله لقب طالبة مقهورة ده هيختفى قريبا و ان شاء الله تنجحى فى حياتك الحقيقية البعيدة عن كابوس الثانوية العامة اللى كنت و لى الشرف من ضحاياه و نلت أيضا الريادة فى عامين متتاليين لأنهم كانوا أصعب عامين مروا على تاريخ البنى آدمين
و مشكلة الثانوية مش فى السنتين المشكلة لما بتدخلى الجامعة و تلاقى كل حاجة اتشألبت 180 درجة و فى الآخر دخول الجامعة عند 99 % من الطلبة تحصيل حاصل لأننا ما اتحضرناش للمرحلة دى
يعنى من الاول كده شوفى ايه بتحبى تشتغليه و انسى المؤهل اللى هتاخديه من الجامعة ده لأنه فى معظم الاحيان بيبقى ضد طموحاتك و احلامك اللى رسمتيها قبل الثانوية أصلا
و أخيرا بعد العك الكتير ده اتمنى ان ربنا يرزقك بجامعة توافق طموحاتك و أحلامك

راء said...

عدو المرأة

انا هنا مبتكلمش عن المرأة

انا بتكلم عن الطلاب ونظام التعليم

وفيه ستات مقهورين جدا يافندم بس بص بحيادية :)

راء said...

sendbad

متشكرة جدا ومنورني بحضورك دايما يارب

راء said...

فولتا

لا لسه ناقص سنة ^_^

بس هتخلص ان شاء الله برضه

وكل سنة وانت طيب كمان :)

راء said...

اسراء

القهر بيطارد الطلبة لحد الجامعة مش بس ثانوي
وواثقة ان هيكون فيه مغامرات اكبر كمان مستقبلا

والله الموضوع كله ثقافات يعني ازاي اب يقول لابنه ادخل الكلية وان شا الله تقعد فيها 10 سنين واتخرج على مهلك
ليه؟؟هوا رايح رحلة؟؟

زمان التعلم كنا بنتعب فيه وبنس بقيمته انما حاليا..مفيش باظت الدنيا

اللهم امين ويوفقك في حياتك كلها :)

عيد سعيد

قوس قزح said...

كل سنة وانتى طيبة
و عيد سعيد عليكى يارب

راء said...

وحخضرتك طيبة

ربنا يسعدك ويقدملك اللي فيه لبخير

Qatarat Nada said...

(في بيتنا ثانوية عامة)

هههههههههههههههههههههههه
عثل يا بنتي
برده احنا في بيتنا ثانوية عامة بردك
ومش متفائلين بيها اطلاااقا
ربنا يستر
نورتى مدونتى ومتابعاكي دايما ان شاء الله
كل سنة وانتى طيبة وماتبقيش تيجي على نفسك بالربع جنيه خليها علينا يا ستى ^_^

ميس فلسطين said...

انا مش عايزه ادخل الثانويه العامه والله ده صعب
انا فايته في اكبر كابوس هو الثانويه العامه ان شاء الله السنه الى جايه
وهنحرم من كل حاجه

وكل سنه وانتي طيبه

أنا - الريس said...

واجب اختياري لو مكنتوش حلتوه وأنا غيرت فيه سؤال
لمعرفة إطلاعتكم فلو عايزين تحلو خير وبركه ، ولو مش عايزين متقلقوش الواجب مش هيتحط في أعمال السنة .
ما هي كتب الطفولة التي بقيت عالقة في ذاكرتك؟
مَنْ أهم الكتاب الذين قرأتَ لهم ؟
من هم الكتاب الذين قررت ألا تقرأ لهم مجددا؟
في صحراء قاحلة ، أي الكتب تحمل معك؟
ما هو الكاتب الذي لم تقرأ له أبدا ، وتتمنى قراءة كتبه ؟
ما هي قائمة كتبك المفضلة ؟
ما هي الكتب التي تقرؤها الآن ؟
اللي بعت الدعوه ؟
أرسل الدعوة لمدون واحد علي الأقل من أجل مشاركتنا باطلاعهم في القراءة ؟

Ahmed Fayez said...

رضوى
ليكي تاج عندي
ابقي عدّي و انقليه و جاوبي عليه

راء said...

قطرات الندي :)

ههههههههههههههه
يعني هتتعذبوا حبة حلوين
كويس احساس حلو انك تحس مش لوحدك ف المعاناة وفي قلب الححدث

منورة يا عسلية

راء said...

ميس فلسطين

هههههههههههه
يعيني عليكي يا بنتي
هوا انتي لسه شوفتي حاجة
انا لسه هعقدك في المستقبل اول ما تدخليها

حقيقي ربنا يعينك ويحميكي

منوراني جدا

راء said...

حضرة الريس

وينر

حاضر ان شاء الله هجاوبه قريب :)

The illusionist said...

لازم اجى اصبح وخلاص لانى مكنتش اعرف ان فى تعليقات مفتوحه

سالفل

راء said...

استاذ انا :)

اها خلاص كله اتفتح مفيش حجات مقفولة تاني بقى


مساء النور

حبات التوت said...

اه توتر توتر كهربا ياناس
تعرفى يارضوى
انا دخلت مدونتك كذا مرة
وبقرى ومش بعلق مش عارفة بيحصل اية كل مرة مش اعلق
وكذا مرة اشوفها واقول هقراها بس برضى بقول لا اصلها بتفكرنى بكاوبيسى وتوترى وخوفى ورعبى ااااااااااااااه مش تفكرينى

بس انا بحبك يابنتى فى الله وكمان انتى صعبانة علية انتى وكل صحابك
انا اى حد اعرف انوا ثانوية عامة ببصلة بنظرة عطف وحنان يكفوا شعب كامل


يلا يابنتى شدى الحزام وهقوللك نفس الكلام اللى هتعدى تسمعية مليون مرة فى الدقيقة حافظى على المجموع الحلو اللى جبتية فى سنة تانية انا كنت باركتللك وقتها وشدى الحزام على الاخر
يلا معلش تعالى على نفسك اخر مرة وبكرة هستريحى

ولو ربنا كرمك ودخلتى كلية قمة مش هترتاحى من العذاب برضة هتفضللى فى مذكرة طول عمرك بس طبعا من غير خوف ولا توتر ولا اى رعب هتبقى بتذاكرى زى ماكنتى بتذاكرى وانتى فى ابتدائى فاكرة الشعور دة

يلا انا طولت عليكى اوى انا برغى كتير اوى

ربنا معاكى ياعسل

زهرة said...

رضوى يا حبيبتى

كلنا اتعرضنا لدة وللكلام دة .. كنت دايما اسمع كلمة " أهما سنتين هتتعبى نفسك فيهم وبعدين ترتاحى سنتين بعمرك كله " وكنت بسأل يعنى بعد كدة هموت مثلا

ولو مبقتش دكتورة ولا مهندسة هيقيموا عليا الحد

العيب يا حبيبتى مش فى الثانوية ولا فى الاهالى

العيب فى ثقافتنا انه عندنا كليات قمة وكليات عادية وكليات ملهاش لازمة

ودة تصنيف غبى

لان بتاع كليه او معهد مصنف فى الاخر ممكن ينجح اكتر من بتاع ابو قمة وبنحجتاجله اكيد ..

يعنى مش كل احتياجتنا بتقتصر على دكتور ولا مهندس ولا غيرهم

يعنى كله بيكمل بعضة

الحقيقى بقى ان كل اب وام بيقول واشمعنى بنتى ولا ابنى اللى يكون الجزء اللى بيكمل اشمعنى هو ميبقاش احسن من غيرة بردوا تحت شعار عندك كذا وكذا لو مدخلتهمش بعد كدة كله محصل بعضة

عارف

لو اتكلمت فى موضوع الثانوية العامة دة 3 ايام مش هيكفى .. اصلى مبقوقه اوى

وبتفكرينى باللذى مضى يا اختى..

مش هقدر اقولك غير شدى حيلك .. وان الله مع الصابرين
^
^
^
^ وحشتينى على فكرة وكنا فى سيرتك انا وسارة دراز لما اتقابلنا ^_^

قناه ايما said...

الثانويه العامه ماهى الا عفريب يا تخلص عليه لايخلص عليك
ربنا يوفقك ووتجيبى مجموع جامد اخر حاجه

راء said...

ويللا

ربنا يخليكي يارب يا بنتي ارغي براحتك البلوج بلوجك يا قطتي

حقيقي الواحد بيبذل كل جهده

راء said...

زهرة

مهوا ده اللي انا بقوله الثقافة العامة غلط والفهم بتاعنا ليها غلط جدا

ناسين ان ديه قدرات وكل واحد بيكمل التاني ف حلقة مقفولة

منوراني..وحسيت فعلا انكوا جبتوا ف سيرتي عشان شرقت كتير ^_^

راء said...

resalatye

شكرا يا قمراية منوراني

❤ soso ❤ said...

الثانوية العامة كاااااااااابوس في كل الدول العربية مش بس في مصر فقط
ربي يوفقك ويوفق جميع الطلبة والطالبات

Sara said...

احم احم
ربنا يخليكي لمصر يا رضوى
خوفتيني أكتر ما أنا خايفة :D
ربنا يوفقك يا جميل و يوفقني و يوفق كل العيال المتشردة اللي في الثانوية العامة

Marianjmmg said...

شمس الحرية بالظبط انتي جبتي الخلاصة انا كنت مقضياها لعب اساسا اصلا والحمد لله كنت ماشية حلو ربنا يتمها على خير امين ربنا يجعله ف ميزان حسناتهم وخلاص قولت رأيي :)

Sanchezjwgp said...

نورهان هههههههههههه انتي بتبشريني زي يوسف برضه ..ربنا يستر وتبقى هندسة سنوات بمبي كده مش ناقص الواحد بهدلة وجاري تنفيذ الوصية اصلا :)

شركة تنظيف بالجبيل said...


شركة المثالية للتنظيف بالخبر

ندى ابراهيم said...

شركة تنظيف سجاد بالدمام