Monday, October 4, 2010

قرش الكابتشينو الخارجي













الزمان: يوم الخميس اللي فات
المكان:على سريري ملتقى المذاكرة والنوم
السبب: نومي بحت
..

ياه اخيرا الواحد خلص الاسبوع وهياكل رز مع الملايكة
رز!! الرز من المحاصيل الصيفية التي تزرع في الدلتــ....هشششششش

ايه اللي بقوله ده انا علمي ..علمي مش ادبي
وبطلنا الجغرافيا من سنتين
اهمدي بقى وكملي أكل


أكل!! الاكل ضرورة من ضروريات بقاء النوع
وهو ما يتعاطاه الانسان والحيوان يوميا من الغذاء
ليستعيد بها طاقته أو يجددها.

يبنتي حراااااام عليكي انتي علمي رياااضة..
رياضة مش احياء
وكويس انك مش حافظة جدول الضرب انا مطمنة عليكي كده
لا حافظة جدول 2 كويس
اي نعم بتلخبط بس حافظاااااه اسمعهولك حتى

تررررررن..ترررررررر...


ايه الغتاتة ديه بقى
الواحد مش هينام ف السنة العثثل ديه شكله كده
رفعت السماعة بكل غيظ وبحالة من الاستفزاز المختبيء


م : ايون يابنتي انتي فين اوعي تكوني ناوية تنامي

انا : النوم قضية سخصية اطلعي منها بس وهيا تعمر 
عاوزة ايه في الانجاز الرز ع النار وممكن يتحرق جوا الحلم

م : ايه الاستهتار ده انتي مش حاسة بكم المصيبة اللي احنا فيها؟

انا : هوا اي نعم انا المفروض اسألك مصيبة ايه
بس مش هسأل وهقولك لأ مش حاسة.. تقومي انتي بقى تديني 
عظة في الادب والاخلاق وانا هقعد اقولك
اها..اها..وانا مش مركزة معاكي وفي الاخر 
تقوليلي فاهماني هقولك اه..قصري بقى

م : نعمممممم يعني انا بتقرطس بقالي كام سنة قولي كده بقى؟؟
،مش هرد عشان عاوزاكي ضروري 
بس ..البسي وانزليلي ..موضوع حياة او موت


انا : طب ما تقولي هنا دلوقتي يمكن اطلع ندلة واقولك لأ

م : لا يا فالحة ممكن التليفون يكون متراقب..

انا : مممممممم

م : بتفكري ف ايه انتي دلوقتي؟

انا : ياترى الرز اللي ع النار مين هياكله غيري؟؟؟؟

م : يللا يا بنتيييييييي..

وهكذا يا اعزائي خرجت مذهولة متجهة نحو بيت م
وانا اتحسر على الرز اللي الملايكة هتاكله 
لوحدها وبانتظار الامر العاجل

اللي ينزلني من بيتنا الساعة 7 المغرب 
واخدتني م بنظرة ملهوفة وهي تتلفت حولها..
يللا هنركب المترو وهنكون هناك على 8 يدوبك 

انا :  انا ليه حاسة انك تبع تنظيم القاعدة؟ 
م : هشششششششش هتفضحينا اسكتي خالص 


وخرجنا من المترو في مكان ضلمة سكتم بكتم..
وانا عونيا في وسط راسي مستعدة لخروج جماعة مسلحة
وهمارس عليها حركتين الكاراتيه اللي ن..فضلت 3 سنين اعدادي بتعلمنا فيهم وبرضه مفلحناش نعملهم صح..لكنها حالة طواريء

وفجأة م..التفتت إلي وشدتني من ايدي على جمب
برغم ان الشارع كان فاضي
(لزوم الساسبينس)

وقالتلي والقلق يملأ عينيها:

اصلي ع..قالي انه هيجيبلنا 10 بس الراجل اللي كان بيتعامل معاه طلع غبي وملحقش يروح يجيبهم من المخزن فراح ع..اتطقس وعرف المورد الرئيسي
واحنا ناقص خطوتين ونوصل عنده عاوزاكي ترفعي راسي ومتنطقيش بولا كلمة فاهمة ولا ارجعك تاني بيتكوا؟؟

انا : 10 مين..ايه اللي انتي بتقوليه ده..لا ياختي رجعيني بعد مغامرات دب الباندا ديه رجعيني..

وفجأة اذا برجل يتجه نحونا..:اي خدمة يا آنسات؟

نظرت نحو م..ورأيت على ملامحها علامات ارتباك واضح

ايوه احنا اللي ع باعتنا عشان تدينا الاوردر اللي طلبه وقلت انه عندك

فنظر الرجل بجدية : طيب مش عاوز صوت ورايا


فابتسمت ابتسامة واسعة يبدو انها استفزت انكل.
فرمقتني م.. بنظرة معناها هتموتي يا سوسووو
 فاحترمت نفسيتي وسكت

واخذنا ننتقل بين حواري غريبة وأزقة غامضة
ولا اليكس في بلاد العجائب
واخيرا وصلنا الى مكان يشبه مكتبة في اخر الزقاق

واخرجت م..ظرف ابيض اديته للراجل
واستلمت منه كيس اسود يبدو عليه الثقل والبهدلة
مما يشعرك انه كيس قادم من الضفة الغربية مش من هنا 

بدأ شوشو يلعب ف دماغي واتتني نوبة فزع:

ايه اللي ف الكيس ده انا عاوزة اعرف حالا؟؟
اااااااه اصل انا شوفت الفيلم ده قبل كده
كان شغال على
mbc2
من يومين..وفي الاخر بياع المخدرات اتقبض عليه
ايون.. والبطلة اتحدفت ورا الشمس
وتعرفي مين اللي بلغ عنهم؟؟صاحبتها اللي كانت معاها


لم الحظ ارتفاع صوتي
وفي عز دهشة الرجل اطبقت م..على فمي قائلة:
هششششش مخدرات مين ،انا غلطانة اني اخدتك كنت عاوزة مصلحتك

وفتحت الكيس فاذا بـــ
بـــ
بـــ كتب خارجية طبعة جديدة

فانتابتني هسترية ضحك ملأ صداها الزقاق

انا :هههههههههههههههههههههههههههههههه
كتب؟؟؟ ومحسساني انك تبع تنظيم القاعدة
وتوهتونا في حتت غريبة مش هنعرف نخرج منها
وشغل الساسبينس ده كله..هوا الازمة تفاقمت لهذه الدرجة
وبعدين ملقيتيش غيري يا م..ده انا هعترف عليكوا من قبل اول قلم
يللا يا عمونا رجعنا من مكان ما جبتنا عاوزة انااااااااام
.....


وفي النهاية قامت م برشوتي بكتاب فيزيا
واتفقنا ان اليوم ده محدش هيجيب سيرته

ومن هنا أحب أأكد بدل المرة 20 انا معرفش ع ده  
وم.. ديه قطعت علاقتي بيها من بعد الواقعة
وكتاب الفيزيا اللي اخدته عشان اسكت ..مش مخبياه تحت السرير ولا حاجة

خلاص كده اشطة..انا رايحة انام بقى
وواخدة معلقة عشان ااكل بقايا الرز اللي الملايكة سابوهولي

تصبحوا على خير

:)


56 comments:

Tears said...

طيب يا سيدتى نتمنى لكى نوما سعيدا و فطارا جميلا

و مبرووك على الكتاب :))

راء said...

تيرز :)

اشكرك بشدة يافندم على الامنية ديه :)

الله يبارك فيكي

أنا - الريس said...

وانتي من أهله
ربنا يوفق الطلبة بتوع السنة دي
مفيش غياب
مفيش كتب
فيه ضرب .

ولا عيشنا وشوفنا اللي بيحصل في العصر المبارك .

يلا سلام

VÖltaa said...

هههههههههههههههه
ضحكتينى وانا مكتشئب :D

ايه اللى دخلك رياضة بس صدقينى اخرتها تجارة انجليزى
زيي كده
ههههههههههه

اييييييييه دنيا

انا جيت المدونة كتير بس كنت بنسى اعلق :D
يلا ادينى علقت

جايدا العزيزي said...

وانا بعد كل اللى قريته ده

بقولك نوم هادئ واحلام سعيده

وربنايحقق امنياتك وامنياتى معاكى يارب

ههههههههههههههههه

بس ابقى خلينى فى احلامك

وحشانى اوووووووووى


الجميل زعلان منى ولا ايه

ايه

تحياتى

esraa said...

السلام عليكم
فكرتينى بالذى مضى ديناميكا و استاتيكا و الكورة و قعت من فوق الجبل هاتى سرعتها و مين اللى وقعها من على الجبل أصلا ..........
بس عموما ربنا يوفقك و تطلعى مهندسة أد الدنيا و تفرحينا كده و ترفعى من روحى المعنوية :)

sara draz said...

ضحكتينى ههههههههههههههه
المهم تعينى الكتاب ده عشان اخده منك السنة الجاية
^_^
نوما هنيا
عشان كده عرفت ليه بتقفلى الفون لما تيجى تنامى

R-H-S said...

ههههههههههههههههاااااي
انا فرحان فرحان اوي فرحان خالص

والله الراجل بتاع التربيه والتعليم دا ملوش حل داخل دماغي صراحه هيمشيكوا
علي عجين متلخبطهوش

وعلي فكره انا هبلغ عنك مباحث الكتب الخارجية

"طعم النجاح لو دقته مش هتصدقه عايز تجرب حط حلم وحققه لحظت سعادتك لما تيجى بتبداه سرالنجاح ان انت لازم تخلقه "

بالتوفيق ياطالبه وربنا يسترها مع كل الطلبة اللي زييك

راء said...

حضرة الريس

شوفت الدنيا خربانة ازاي ^_^

بس بيني وبينك دهالصح

راء said...

فولتا..

ليه ما انت علقت هنا قبل كده

وبعد الشر عليك من الاكتشئاب

واشكرررررك على جرعة الاحباط انا اصلا هحول ^_^ ماله الادبي وحش؟

راء said...

جايدا

وانتي والله وحشاني بس مش قادرة اتابع والله عديت بسرعة والمدونة عجبني شكلها الجديد ماشلء لببه هشقر عليكي بقى بكرة اجازة :)

راء said...

اسراء

وعليكم السلام

اها انا اللي وقعت الكورة لعلمك ^_^

ربنا يخليكي يا اسراء ويحققلك احلامك

راء said...

سيرو

ههههههههه
اي نعم احنا اخوات بس ده ميمنعش ان اللي هيدفع اكتر هديله الكتاب^_^

شوفتي معاناااتي بقى

راء said...

استاذ مونبه..عشان من شافك يا دفعه

على فكرة ده اول وزير ف حياتي احترمه واحبه كده..راجل بجد عنده نخوة وكلمته مبتنزلش الارض ابدااا

واثبت بقى اني معايا كتب خارجية ^_^

جميلة اوي الجملة ديه يا مونبه تبعث على التفاؤل

ツSmiLeY AnGeLツ said...

السلام عليكم
تحفة
دمك خفيف ياعسولة
هههههههههههههههههههههههههه
مش قادرة اوقف الضحك
دمعت عيني من كتر الضحك
ربي يوفقك بدراستك ويخليك دايما مبسوطة وفرفوشة
سلامي

Ranim Ayman said...

ههههههههههههههههههههههه ضحكتيني اوي يا رضوري كنت حسه اني هموت من كتر الضحك لا بس بجد استمتعت ونوم سعيد وابقي شيلي فيشة التلفون المرة الجاية

وحشتيني

تحياتي مبتسمة دائما

Ranim Ayman said...

ههههههههههههههههههههههه ضحكتيني اوي يا رضوري كنت حسه اني هموت من كتر الضحك لا بس بجد استمتعت ونوم سعيد وابقي شيلي فيشة التلفون المرة الجاية

وحشتيني

تحياتي مبتسمة دائما

زهرة said...

مضحكتش من زمان اوى كدة يا رودى .. يا عينى عليكوا يا بنتى .. بس تصدقى الفيزيا بردوا تستاهل ..أكتر مادة كرهتها فى حياتى دنا يا بنتى كنت بكرهها أكتر من الكوسة .. تخيلى !!

يلا تصبحى ع خير .. ومتكتريش فى الرز بوظتولنا الدايت :)

مها البنا said...

مممممممممم

كل ده على كتاب خارجى واحد؟؟ وفيهم فيزياء؟

انا لو مكانك اروح ابيعهم فى السوق السودا واهى سبوبه برضه تسد تمن درس من الدروس الخصوصيه

بوست رائع وابسط وصف ليه هو

هم يضحك وهم يبكى

تقبلى مرورى

أحمد زاهر said...

لا الموضوع شكلة كبير
هو ايه اللى بيحصل
معلش يا جماعه اعزرونى انا خلصت دراسه ونسيتها اقبل ما اخلصها فا معنديش فكره عن الجديد بس تردد على مسامعى ان وزارة التربية والتعليم عملت إدارة لمكافحة الكتاب الخارجى
عموما لا خارجى نافع ولا داخلى نافع وكده كده مش هنذاكر

يلا بالتوفيق ويارب أحلام سعيدة بعد رحلة المغامرات دى

باحث عن حب said...

منك لله يا بدر
خليك التعليم ضلمه
والكتب
زى المخدرات
ولسه
ياما هنشوف
منك
يا بدرالمصايب
وانتم
ربنا يكون
فى عونكم
ياااااااااااااااااااااااااااااااررب

عمرو يسرى said...

هههههههههههه
الفيلم دا اتحكالى قبل كده من واحد صاحبى كان بيجيب كتب خارجيه وقالى حاسس انى كنت بجيب مخدرات
هههههههههه
مهزله
ربنا يوفقك

حبات التوت said...

ياااااااااااااااااااه
الحمد الله انى خلصت الثانوى قبل موضوع الكتب المتهربة دى

ربنا يقويكى يابنتى

راجية الرحمه said...

وانتى من اهله
....
...
..
.
ربنا يقويكى وتنجحى بتفوق وبمجموع تدخلى بيه اللى انتى حباه
وبعدها ترجعى تقولى يوووم من ايام الثانوى

Anonymous said...

ربنا يوفقك

غريب said...

نامي و دندني بتدوينه لووووز
تتحفينا بصولاتك وجولاتك فيها
مدونتك افيووونايه افغانيه اورجينال



وفقك الله لما يحب ويرضى

لك مني باقه ورد عبيرها احترام وتقدير

admin said...

هذه التدوينة تصلح لأن تكون فيلم أكشن بامتياز

وماتخفيش.. الانتاج على حسابي، وحموتك بالرز إلي بتحبيه

يالله يا بنتي.. تصبحي على خير

كنت هنا

ميلودى سبورت said...

وانتى من اهله

انــــــــ حياتى ـــــــــت said...

بجد المدونه جميله وحلو اوى من تذوق مر التعليم المصرى لتمنى البقاء فى الجهل ههههههههههه عندك حق والموضوع حلو
تقبلى مرورى
دمتى بخير

modcena said...

السلام عليكم
وااااااااااااو
فيلم اكشن جامد جدااااااااااا
انا كنت فاكرك بتاجرى فى الاسلحة ونازلين تجييبو دبابة ولا طيارة

على العموم مبروك عليكى الصفقة الجامدة دى ربنا يباركلك فيها يا معلم

والطلعة الجاية ابقى استعدى كويس

وطبعا كل سنة وانتى طيبة بمناسبة الايام الجميلة دى والعيد اللى قرب لو بتوزعو لحمة افتكرينى ولو مش بتوزعو ابقى فكرينى اجيبلك

تحياتى لاسلوبك الرائع
حلال عليكى الرز
وتصبحى على خيرات وحب وطاعة

Qatarat Nada said...

ههههههههههههههههههههههههههههههههههه
ههههههههههههههههههههههههههه
انا ضحكت لما قولت يا بس
علمي رياضة زيي ؟؟؟
جدعة يا بنتي والله يلا وجع دماغ
شدي حيلك .. وتعالى شدي حيلي معاكى شوية
كل سنة وانتى طيبة
اختك الحجة ،، :)

Tamer Moghazy said...

"ده نبيذ قبرصي..
عملوه القبارصة ولاد القبارصة.."
ههههههههههههه..

بجد يا رضوى انت ديما بتموتيني من الضحك وبتجبريني اقرا الموضوع اكتر من مرة..
بس سيبك انت الحمد لله ان مفيش حد من المكافحة شم خبر (';' )

Tears said...

رضوى بقالك شهر مش متواجدة

اتمنى فقط تكونى بخير

فاروق سحير ( فاروق بن النيل ) said...

طالبة مقهورة بدرجة إمتياز مع مرتبة الشرف ومخدة الغلاسة........
يعنى لازم قرش ( هوه حشيش ) والكاباتشينوا ( بقى ممنوع )
طب ( الخارجى مظبوطة على الكتب
معلش أنا فعلا وقعت فى حارة سد فيها
(م) وصاحبتها (المقهورة)
للدرجة دى كتب المدارس االخارجية بقت تبع " بن لادن " ولما هى كده بتذاكروا ليه حاتطلعوا إرهابيين وحتسافروا عدل على أفغانستان من غير فيزياء ولا أدبى ولا علمى ولايحزنون .
فينك ياطالبة يامقهورة من زمان مادام الرز مع الملايكة أهم مننا ماعندناش مانع نجيب معانا معلقة صغيره ماتخافيش وناكل معاكى شكرا على الأطروحة العنوان عايز شوية تظبيط موش عارف إزاى عندى قضية إنتخابات اليوم جديدة علقى عليها شكرا لكى.

شمس النهار said...

البوست ده جد ولا تهريج
كيس اسود ظرف ابيض
وحواري وازقه
كل ده علشان كتب خارجيه
وبطلة ودوها ورا الشمس
لا بجد
الكلام ده حصل ولا ده تهريج تبع الرز والملايكه
:)

محمد سعد القويري said...

تحية عطرة معطرة
Attention Please >>>>
المعذرة .. هذا تعليق خارج النص ..
دعوة للمشاركة في
مشروع مقروءاتي الثالث
للمشاركة ولمزيد من التفاصيل .. هنا
http://qweary555.blogspot.com/2010/12/1431.html
ــــــــــــــــــــــــ
وإن شاء الله تكون هذي بداية سلسلة من الزيارات :)

راء said...

خواطري مع الحياة

مبتسمة دائما

زهرة :)

مها البنا

بن الخطاب


ميرسي يا جماعة اوي متشنكرة ومنشكحة بالكومينتس :)

راء said...

محمود باحث عن الحب

على فكرة مش منه لله ولا حاجة انا شايفة انه بيعمل اكتر من غيره ..فيه اخطاء كبيرة ف النظام بس هتتظبط اكيد
ولازم جيل يجربوا فيه اللي هوا احنا بلا فخر

راء said...

عمرو يسري
....
ههههههههههه اديني حكيتهولك تاني اهو


ويللا
...
الحمد لله فعلا :)


راجية الرحمة
...
ربنا يخليكي يارب يا اسراء ويسعدك


يوميات شحات
....
ميرسي جدا


غريب
...

:) ان شاء الله قريب تدويناية جديدة

راء said...

خالد ابجيك

هههههههههههه لا واحلى حاجة انك تبقى البطل بتاع الفيلم انا مش هتنازل عن دور البطولة
نورت

..........
ادمن

وانت من اهله :)

.........
انت حياتي

حضرتك نورتني جدا ميرسي

........

راء said...

modcena

لا لسه بتاجر ف الكتب بس اول علامات الانحراف ^_^

ربنا يخليك وكل سنة وانت طيب

........
قطرات الندي

اهلاااااا زمايل يعني ^_^
ربنا معانا يبنتي
...........
تيمو

ههههههههههههه..ربنا يخليك يارب انت اللي بتنورني

......

تيرز
الحمد لله انتكاسات صحية وبعدها انشغال ف الميد تيرم والامتحانات :)

ميرسي على سؤالك

راء said...

فاروق ابن النيل

ميرسي ع الاطراءات ديه كلها ^_^
ربنا معاكم ان شاء الله ف موضوع الانتخابات ده انا عدجيت عندك وقرأته

منورني

راء said...

شمس النهار

هههههههههههه
حدث بالفعل يافندم

الفجالة وفي حواري وازقة وشنط سودا وكلمات سر كمان ^_^

كان في اول السنة دلوقتي بقى عادي

Anonymous said...

هههههههه

هو الموضوع تأزم للدرجادي

الحمد لله احنا كنا في نعمة بقا

فين ايام ما كان الواحد يروح المدرسة مش معاه غير كتاب لامي

حد كان يقدر يتكلم ؟ ^_^

ربنا معاكي وبالتوفيق ان شاء الله

مدونتك جميلة جدااا :)

Anonymous said...

ههههههههههههههههه
جاااااااااااااااااامدة
اسلوبك رهيييييييب بجد
كنت متشوقة أعرف ايه اللى هيحصل فى الآخر قمت قريت بسررررررررررعة لحد ما عرفت ورجعت أقرا من الأول تانى بتأنى
حقيقى اسلوبك مشوق جدا جدا جدا
انتى موهوبة أوى ماشاء الله عليكى
ربنا يوفقك :)

همزة said...

تصبحى على خير

Unknown said...

هههههههههه

JehadHussien said...

ههههههههههههههههههه =)) =))

Unknown said...

مقهوره

الصراحه وبالغلط طبيت في مدونتك وشخابيطك

اسلوب ممتاز

ثلاثه ايام على التوالي كل ما سنحت الفرصه

افتح النت واقرى يوميات المقهوره


keep it up

لك تحياتي

Unknown said...

هو الرد متأخر بس والله بموت ف حكاوييكى دى عشان خفت دمك يا عثل انتى حسبي النمل هيتلم عليكى هههههههههه

والله حسيت انكو كنتو ف ميشين امبوسيبول

شلة لايكثر said...

هههههههههههه لاتعليق اكثر

Sara said...

ههههههههههههه
بجد بجد أنا حسيت بالجو هههههههه
ايه الرعب دا ؟
فعلا حصلت لي مع كتاب العربي بس مش بالمنظر الرهيب دا xD
ربنا معاكي يا جميل
بس ما تنسينيش من الرز بلبن، اوكش؟

Anonymous said...

Hi there! Do you use Twitter? I'd like to follow you if that would be ok. I'm undoubtedly enjoying your blog and look forward
to new updates.

My web site - alargamiento de pene

Anonymous said...

Hello there, You've done a fantastic job. I will certainly digg it and personally suggest to my friends. I'm confident
they'll be benefited from this site.

Feel free to surf to my website: http://alargador-de-pene.es/xtrasize.html

Anonymous said...

Saved as a favorite, I like your web site!

Have a look at my web blog: http://aumento-de-penis.com

شركة تنظيف بالجبيل said...


شركة المثالية للتنظيف بالدمام