Monday, October 4, 2010

قرش الكابتشينو الخارجي













الزمان: يوم الخميس اللي فات
المكان:على سريري ملتقى المذاكرة والنوم
السبب: نومي بحت
..

ياه اخيرا الواحد خلص الاسبوع وهياكل رز مع الملايكة
رز!! الرز من المحاصيل الصيفية التي تزرع في الدلتــ....هشششششش

ايه اللي بقوله ده انا علمي ..علمي مش ادبي
وبطلنا الجغرافيا من سنتين
اهمدي بقى وكملي أكل


أكل!! الاكل ضرورة من ضروريات بقاء النوع
وهو ما يتعاطاه الانسان والحيوان يوميا من الغذاء
ليستعيد بها طاقته أو يجددها.

يبنتي حراااااام عليكي انتي علمي رياااضة..
رياضة مش احياء
وكويس انك مش حافظة جدول الضرب انا مطمنة عليكي كده
لا حافظة جدول 2 كويس
اي نعم بتلخبط بس حافظاااااه اسمعهولك حتى

تررررررن..ترررررررر...


ايه الغتاتة ديه بقى
الواحد مش هينام ف السنة العثثل ديه شكله كده
رفعت السماعة بكل غيظ وبحالة من الاستفزاز المختبيء


م : ايون يابنتي انتي فين اوعي تكوني ناوية تنامي

انا : النوم قضية سخصية اطلعي منها بس وهيا تعمر 
عاوزة ايه في الانجاز الرز ع النار وممكن يتحرق جوا الحلم

م : ايه الاستهتار ده انتي مش حاسة بكم المصيبة اللي احنا فيها؟

انا : هوا اي نعم انا المفروض اسألك مصيبة ايه
بس مش هسأل وهقولك لأ مش حاسة.. تقومي انتي بقى تديني 
عظة في الادب والاخلاق وانا هقعد اقولك
اها..اها..وانا مش مركزة معاكي وفي الاخر 
تقوليلي فاهماني هقولك اه..قصري بقى

م : نعمممممم يعني انا بتقرطس بقالي كام سنة قولي كده بقى؟؟
،مش هرد عشان عاوزاكي ضروري 
بس ..البسي وانزليلي ..موضوع حياة او موت


انا : طب ما تقولي هنا دلوقتي يمكن اطلع ندلة واقولك لأ

م : لا يا فالحة ممكن التليفون يكون متراقب..

انا : مممممممم

م : بتفكري ف ايه انتي دلوقتي؟

انا : ياترى الرز اللي ع النار مين هياكله غيري؟؟؟؟

م : يللا يا بنتيييييييي..

وهكذا يا اعزائي خرجت مذهولة متجهة نحو بيت م
وانا اتحسر على الرز اللي الملايكة هتاكله 
لوحدها وبانتظار الامر العاجل

اللي ينزلني من بيتنا الساعة 7 المغرب 
واخدتني م بنظرة ملهوفة وهي تتلفت حولها..
يللا هنركب المترو وهنكون هناك على 8 يدوبك 

انا :  انا ليه حاسة انك تبع تنظيم القاعدة؟ 
م : هشششششششش هتفضحينا اسكتي خالص 


وخرجنا من المترو في مكان ضلمة سكتم بكتم..
وانا عونيا في وسط راسي مستعدة لخروج جماعة مسلحة
وهمارس عليها حركتين الكاراتيه اللي ن..فضلت 3 سنين اعدادي بتعلمنا فيهم وبرضه مفلحناش نعملهم صح..لكنها حالة طواريء

وفجأة م..التفتت إلي وشدتني من ايدي على جمب
برغم ان الشارع كان فاضي
(لزوم الساسبينس)

وقالتلي والقلق يملأ عينيها:

اصلي ع..قالي انه هيجيبلنا 10 بس الراجل اللي كان بيتعامل معاه طلع غبي وملحقش يروح يجيبهم من المخزن فراح ع..اتطقس وعرف المورد الرئيسي
واحنا ناقص خطوتين ونوصل عنده عاوزاكي ترفعي راسي ومتنطقيش بولا كلمة فاهمة ولا ارجعك تاني بيتكوا؟؟

انا : 10 مين..ايه اللي انتي بتقوليه ده..لا ياختي رجعيني بعد مغامرات دب الباندا ديه رجعيني..

وفجأة اذا برجل يتجه نحونا..:اي خدمة يا آنسات؟

نظرت نحو م..ورأيت على ملامحها علامات ارتباك واضح

ايوه احنا اللي ع باعتنا عشان تدينا الاوردر اللي طلبه وقلت انه عندك

فنظر الرجل بجدية : طيب مش عاوز صوت ورايا


فابتسمت ابتسامة واسعة يبدو انها استفزت انكل.
فرمقتني م.. بنظرة معناها هتموتي يا سوسووو
 فاحترمت نفسيتي وسكت

واخذنا ننتقل بين حواري غريبة وأزقة غامضة
ولا اليكس في بلاد العجائب
واخيرا وصلنا الى مكان يشبه مكتبة في اخر الزقاق

واخرجت م..ظرف ابيض اديته للراجل
واستلمت منه كيس اسود يبدو عليه الثقل والبهدلة
مما يشعرك انه كيس قادم من الضفة الغربية مش من هنا 

بدأ شوشو يلعب ف دماغي واتتني نوبة فزع:

ايه اللي ف الكيس ده انا عاوزة اعرف حالا؟؟
اااااااه اصل انا شوفت الفيلم ده قبل كده
كان شغال على
mbc2
من يومين..وفي الاخر بياع المخدرات اتقبض عليه
ايون.. والبطلة اتحدفت ورا الشمس
وتعرفي مين اللي بلغ عنهم؟؟صاحبتها اللي كانت معاها


لم الحظ ارتفاع صوتي
وفي عز دهشة الرجل اطبقت م..على فمي قائلة:
هششششش مخدرات مين ،انا غلطانة اني اخدتك كنت عاوزة مصلحتك

وفتحت الكيس فاذا بـــ
بـــ
بـــ كتب خارجية طبعة جديدة

فانتابتني هسترية ضحك ملأ صداها الزقاق

انا :هههههههههههههههههههههههههههههههه
كتب؟؟؟ ومحسساني انك تبع تنظيم القاعدة
وتوهتونا في حتت غريبة مش هنعرف نخرج منها
وشغل الساسبينس ده كله..هوا الازمة تفاقمت لهذه الدرجة
وبعدين ملقيتيش غيري يا م..ده انا هعترف عليكوا من قبل اول قلم
يللا يا عمونا رجعنا من مكان ما جبتنا عاوزة انااااااااام
.....


وفي النهاية قامت م برشوتي بكتاب فيزيا
واتفقنا ان اليوم ده محدش هيجيب سيرته

ومن هنا أحب أأكد بدل المرة 20 انا معرفش ع ده  
وم.. ديه قطعت علاقتي بيها من بعد الواقعة
وكتاب الفيزيا اللي اخدته عشان اسكت ..مش مخبياه تحت السرير ولا حاجة

خلاص كده اشطة..انا رايحة انام بقى
وواخدة معلقة عشان ااكل بقايا الرز اللي الملايكة سابوهولي

تصبحوا على خير

:)


Monday, August 30, 2010

ابعد عن الشر..وبطل غنا صدعتنا+مستشفى ابو الريش



فيه مثل مصري قديم..في منتهى الروعة

بيقولك..
"ابعد عن الشر وغنيله"

وهذا المثل لا يعني البتة انه لما يطلع عليك مجموعة قطاعين طرق

مسلحين باسلحة نووية كساطور الجزار بأن تبدأ بغناء سيمفونية لعبد الحليم..أو شادية

و لو حرامية متحضرين..وشايلين مطواة قرن غزال تغنيلهم هيفاء او نانسي مثلا

وتتوقعوا ان هؤلاء الحرامية هيسيبوكوا تنطلقوا..

كده ..نبقى بنغني على نفسنا

واللي يقولك الثانوية العامة مجرد سنة عادية

خاصة في مصر..يبقى بيغنيلك برضه


احكيلكوا انا... كنت اظن قبل دخولي تلك المرحلة

ان الثانوية العامة هي فترة الشباب والصياعة..
عفوا اقصد الشباب والأحلام
قبل أن ادخلها و تتحول لبعبع (نفسيا على الاقل)



تجربتي الأولى مع الثانوية بدأت بدخول
اخي الأكبر الصف الثاني الثانوي
وبدأ شبح المذاكرة وبالطبع يجب تنمية شعور الانتماء لدى الأسرة

فتم اعلان قانون الطواريء وحالة التأهب للحرب
(حالة طواريء جيييييييييييم)

بداية بمنع التليفزيون والكمبيوتر والبلايستيشن..
وما يصاحبها بقى من الاتاري والخروجات والنوادي

عااااااااااا..سبتولي ايه يا جدعان
ظننت ان حالة طواريء ج موجودة في بيتنا فقط
حتى دخلت بنفسي وادركت انه شعار قومي

(في بيتنا ثانوية عامة)..


والمهم عدت سنتين اخويا ف المنفى قصدي الثانوية العامة على خير
ودخل كلية شرطة ..من كام سنة كده


وبالتالي كنت اظن ان دخولي سيكون خفيف خفيف لأن من المعروف

اني مش على عاتقي اي ضغوطات..كما اني نوعا ما بحب اذاكر بعض المواد
فسأنقذ ما يمكن انقاذه والتعليم المصري ماشي بالفهلوة

وفضلت اقول لنفساويتي بت يا مشمهندسة رودي ديه سنة عبيطة عادية
اوعي تستعبطي فيها وبطنك توجعك زي العيال التانيين..

ومن الواضح اني كنت بغني على نفسي وبرد عليا وانا بقول
ابتاااااااااا ثقي فيا..ولن اخذلك ^_^

ولكن ما حدث غير ذلك..فبدأ بقدوم شهر فبراير المدرسين
يدولنا الموشح اياه بتاع لو فشلت في ثانوي

هتفشل طووووول حياتك

ونظام انت مش ابني انت ابن حسن يوووووسف..الخ الخ

لحد ما جالي التهاب في المعدة..فضل اسبوعين محترمين

الفكرة متأصلة بداخلنا المعادلة الحقيرة نفسها


الفشل ف الثانوية = الفشل ف الحياة بأكملها


برغم ان ممكن حد يتخرج من كلية محترمة جدا
وميعرفش يشتغل او يكون غير مؤهل للعمل

الفكرة نفسها غلط...ولو بنبص عليها بحكم الكياسة
ونظرة المجتمع للطبقات التانية

فنبقى بنرتكب جريمة شنعاااء(جهبوزة ف اللغة العربية من يوماتي)

احترامك مش بوظيفتك..احترامك بتعاملك واخلاقك

كفاية غنا على نفسنا صدعتونا....وبصوا للي نجحوا بكل المقاييس
وهما مش دكاترة ولا مهندسين ولا مدينة نصر

فخدوها مني نصيحة..عاوز تعيش مرتاح
شيل 3 حاجات

شيل الزايدة...اسمها زايدة فلماذا نتركها؟؟

شيل اللوز..فلا ينوبنا منها سوى وجع الزور كل شوية..

وشيل دماغك م الثانوية العامة...

(يعني متتعبش اعصابك ولا تضغط
على حد فيها بقولة ذاكر وهتفشل)


ولأني حتى الان لم انعم بالاولى ولا التانية..
فقررت ان انعم بالتالتة بعون الله :)

وانا داخلة على اعتاب 3 ثانوي....وبدأت احس بكهربة الأجواء عند البعض

لا تبالوا يا أعزائي


.........................


ملحوظة للي بيسألوا عليا ومبكونش هنا
غالبا لو مش ف المدونة ديه هتلاقوني ف مدونتي الاصلية التانية
افعصوا اللينك هنــــــــــــا هتروحوا على هناك


...........


حاجة اخيرة

بالنسبة لمستشفى أبو الريش والتجمع الرائع

اللي خالد همس الاحباب عملوا بالاشتراك مع الاستاذة داليا


حقيقي انا مبسوطة لمجرد سماع الاخبار

من عند سوني وفقري

وانه كان يوم رائع

معنى انك تسعد او تريح حد تعبان بشكل مباشر او غير مباشر

فده حاجة كبيرة اوووووووووووي

قلبي كان معاكوا ووالله كان نفسي اجي

بس الدروس ووجع القلب ده منعني (بلا ذكر تفاصيل)

يارب المرة الجاية يكون معادها احسن

وهلغي اي دروس ف يوميها حتى


فاتيما كان نفسي اشوفها..واسلم عليها تاني

وكيكي كنت هقولها خسيييييييييييتي 10 مرات
زي ما اتفقنا ^_^


وفقري كنت هقوله الف سلامة فيس تو فيس

وسوني..كنت هشوفها لأول مرة

ومنونة وخالد ورامي طبعا وناس كتييييييير اكيد راحوا

مكنش فيه نصيب المرة ديه

كان هيبقى تغيير اني احضر حاجة زي ديه مع مدونين

ولأول مرة مش هتكون من تنظيمي وابقى شايلة 3 اضعاف الهم

ومكنتش هتعسب خااااااااالص ده انا مؤتبة(وش بريء)

ربنا يعيننا جميعا على عمل الخير
ويسعدكوا ويكرمكوا

مع اجمل تحياتي المقهورية


Friday, July 23, 2010

3 شعورات




النهارده....23 يوليو

تاريخ يبعث بداخلي 3 شعورات (جمع شعور) في نفس ذات الوقت


الشعور الأول الأكثر بهجة وتفاؤل هو...

ناقص يومين على مصروف الشهر..

في الحقيقة لم اتذكر ذلك لولا اخويا الكبير

ربنا يخليه ليا وميحرمنيش من تي-شيرتاته قادر يا كريم


الشعور التاني على العكس تماما وهو بعنوان
خيااااااااااانة..

فشهر يوليو اشتق من اسم القائد الروماني يوليوس قيصر

عمكوا يوليوس في يوم

والمدام داعية عليه من قلبها..

وصباع رجلها الصغير غضبان عليه

عشان موداش العيال دريم بارك

ودعت عليه في ساعة استجابة

فاتخنق منها وقال اما اروح اشقر على مجلس الشيوخ

فاذ فجأة بمجرد دخوله للمجلس وبيقول يا سااااتر

ينهالوا عليه بالطعنات

واحد واحد لتتفرق دمائه بين القبائل

وجاءت طعنة اقرب اصدقائه بروتوس وبمجرد ما شفه قاله

حتى انت يا بروووووووووووووتوس

وعشان نتماشى مع القصة فطعنة بروتوس كانت بتوجع اكتر

يعني الكام عشرين طعنة موجعوش وديه اللي وجعته

(عدوها زي ما عديتها بالظبط)


وبذلك يا اعزائي وقعت اقبح عملية اغتيال في التاريخ

قبل قدومي لتلك الحياة طبعا..احسن حد يقول انا السبب !!



اما عن الشعور الثالث فهو في قمة التضارب

تقريبا كده تم الغاء الملكية واعلان الجمهورية زي النهارده

ارى انه ليس هناك اي فرق منذ 25 سنة

ملكية ..جمهورية..ملكهورية..

كله محصل بعضه

ده بريستيج مش اكتر

اعتقدت قديما ببراءة الاطفال

ان هناك فرق بين الكيكي والكيوي

عفواً اعني الملكية والجمهورية ..


فأيام الملكية كانت هناك عائلة واحدة

تحكم وتنهب وتصلح وتخرب ولكن(على نووور)

كل شيء معروف للعامة

أموالهم ومصروفاتهم..وما يمتصوه من حق الغلابة

معروف ومدروس في العديد من الكتب الموجوده حاليا

فساد علني مباشر ولا من تحت الترابيزة ولا وجع دماغ

ناس واضحة............



لكن الجمهورية بسم الله ماشاء الله

اللهم بلا حسد..

عدة عائلات تحكم مصر وتنهب خيراتها..ولكن

عندهم حياء فده كله من تحت لتحت

وبالنسبة للغلابة..فعندما يمر مسئول على منطقة فقيرة

يعود و يتركها وهي اكثر فقراً

والأهم من ذلك اننا راضيين

ومش محتاجين ولا ضباط احرار ..ولا ملكيين مساجين

واهو عايشيييييين

الحمد لله

الله يرحمك يا جمال 1 ويبشبش الطوبة اللي تحت راسك


وتحيا ملكهورية مصر حرة مستقلة

_____



Sunday, July 11, 2010

النتيجة جت يا رداااالة... واحنا اللي دهنا الهوا دوكو



صباحكوا/مساءكوا شوكولا





زمانكوا افتكرتوني انتحرت



بس الحمد لله جت سليمة المرة ديه



وانقذنا ما أمكن انقاذه




كنت في النادي لا بيا ولا عليا



بدعي على الكابتن وبقوله افتري يا مفتري



بكرة تخش الجيش وافرح فيك



وبالفعل كما تدين تدان



والدعوة جت بالعكس




خرجت لقيت 10 ميسد من صحابي..



عرفت انها جت ....




اصابتني حالة برود غريبة




وكلمت انتيختي اللدودة


رقمي القومي اللي في البطاقة



(ايوه ما انا من اصحاب البطايق)



ورقم الجلوس المميز بتاعي




والحمد لله جابتهالي..



وجبت 96.1% الحمد لله طبعا



الدرجات كويسة على اساس اني متوكستش



غير في الكيمستري لأني بكرهها وده المتوقع




وجبت الفل مارك في الرياضة حبيبتي فقط



هتقولولي بسطانة يا رضوى؟؟




هقولكوا الحمد لله...بس من جوايا عادي




فيه ظلم جامد..بس ده النصيب بقى :)



واخيرا احب اقول كونجرااااااااااتس لكل اللي نجحوا..



وهارد لاك...بس اياك حد يزعل


الحياة مش ثانوية عامية وبس




واحب اقول لكل شاب وفتاة

لم يوفقهم الله لا تنحرف..ولا تنتحر



فالمشرحة مش ناقصة قتلة والجريمة لا تفيد..




ده اولا عشان العساسيل اللي

اطمنوا عليا والمكالمات اللي جتلي




______________________


ثانيا: رحت حفل توقيع كتاب كيف تبحث عن السعادة


لمحمد غالية...


الكتاب جميل على اساس اني فعلا


ببحث عن اي سعادة اليومين دول


بس واضح انها قليلة في السوق



ولسه بعافر



أجمل اهداء في حياتي


اهداء الى الصديقة التدوينية

ارجو في نهاية الكتاب

ان تعرفي انه لا يوجد ما يدعو للقهر

استعدي وانظري
لكي تكوني مهندسة طموحة


محمد غالية

3-7-2010



_________________




ثالثا سؤال الحلقة

انا بقى استخبيت فييييييين ^_^؟؟





ايوه انت ياللي هنا سامعاك..



لأ لسه بعرف اكتب وكتبت حجات



بس مش هعرف انزلها





بيكوووز مش هقدر اتابع الردود



وديه حاجة بتضايقني



مروركوا بينورني ولازمن ارد عليكوا واحد واحد



اسفة اني مش بعدي عليكوا والله غصبن عني



مش هقول ظروفي لأن الاغلب عارفها



دعواتكوا بس..وقريبا هرجع البيت



وارخم عليكوا بتوبيكات مقهورة تاني

هتروحوا مني فين يعني :)







Monday, June 14, 2010

تفشي ظاهرة البصل...


أعزائي المدونين والمدونات..كح كح

عفواً

معكم من قلب الحدث محدثتكم


تنقل لكم حالة الهيستريا البشعة


التي طرأت على جميع مدارس الثانوية


مسببة بذلك حالة بكاء هستيرية للطلاب


او حالة ضحك مستعصية لا يمكن ايقافها


فيبدوا أن البصل تفشي في البلاد وبين العباد


فاصبحت الشوارع سيول من البكاء لم ارها في حياتي


وبرغم من ذلك وقفت في وسط الجموع الهائلة


لنقل هذا التقرير الاستثنائي


ومن الاشاعات التي صدرت من احد المارة عن هذا النويح..


هي ان الريس _اطال الله في عمره كمان وكمان _مات الله يرحمه


ولهذا بكى الشعب كما لم يبكي بوفاة عبد الناصر والسادات


لذا يا اعزائي....


متصدقوش اللي قالوا ان الامتحان صعب..


فهذه سيمفونية الثانوية ..


و علت اصوات توسلات الطلبة البائسين وأهاليهم الطيبين


موجهين كلامهم للثانوية العامية


اللهي ربنا يرجعلك نظرك ما تعملي ف العيال كده


ربنا يطول في عمرك وما يلغوكي ابدا..


وعندما التقينا مع احد الطلاب ابرز تفاؤله تجاه الامتحان قائلاً


انجليزي ده يا مرسي؟؟؟؟؟؟هع


وطالبة أخرى قالت:

انا اول مرة اعرف اننا بنمتحن هيلوغريفي
عااااااااا



اعزائي المدونين...

انا من هذه المدونة اناشد سيادة الريس

انه يوقف زراعة البصل اللي سبب سيول من الدمع

جوا المدرسة وفي مربع المدارس كله

ويحل الخيار محل البصل

وهكذا يجعل من اغنية الخيار نشيد وطني في المدارس

حتى يتوقف مس الجنون الذي اصاب الطلبة واولياء الامور

عاااااااااااااااااااااااااا




كانت معكم...من أمام باب مدرستنا



طالبة مقهورة


24 ساعة للأخبار الاكسكلوسف


القااااااهرة





_________
ملحوظة: شكرا على سؤالكوا واعتذر عن عدم الرد على البوست اللي فات حتى الان..


ملحوظة تانية
..وحشتوني جدا كلكوا :)




Tuesday, May 25, 2010

قبل التيستات ببعتلكوا ميرسيهات :)


مش عارفة احتمال تحدفوني بطماطم لو قلتلكوا اني لسه مبدأتش مذاكرة بجد وحقيقي

والامتحان كمان 12 يوم و5 ايام

واحتمال المجتهدين في الكليات يقولولي انتي بدأتي بدري!!!

وانا بحب اوي بتوع كليات عشان بيحسسوني اني مجتهدة ^_^

في الواقعععع لقد قررت يا اعزائي

ان اتبع منهج استاذ


مُنبه صاحب مدونه منبهات
و كيكي عووووو
و حسني (المستفز)
وهند (قلبي ليس للبيع)


واتوقف عن اللعب شوية واذاكر


ولكي اكون واقعية فانا على عكس كثير من الطلاب المصريين والحمد لله

اعلم ماذا كتب في المنهج بعض الشيء

لهذا مش همشي خالص يعني..احتمال اشقر عليكم من وقت للتاني


* * * * * * *

سبب كتابة البوست مش الرغي ده كله

ولأني منمتش وعايشة على النسكافيه البلاك من امبارح

فهقصر ومش هطول عليكوا

نرجع لموضوعنا..انا كنت عاوزة اذكر ناس كتير

أدين ليهم بالشكر

ومهما عملت مش هقدر اوفيهم حقهم هنا على بلوجر

يمكن هما ميعرفوش كم تأثيرهم فيا أو قد ايه

كلامهم او مجرد مرورهم بيعنيلي الكثير

انا واثقة اني هنسى اسامي كتير

بس اعذروني على صغر الميموري بتاعتي

ومن الناس دول ومش بالترتيب طبعا



عاوز اصحى ..صاحب مدونة(منبهات)


هند.. اللي قلبها مش للبيع


حسني.. (ElMOSTAFEZ)


رنيم..مبتسمة دائماً


هبة..همس الارواح..


أحمد (Winner)


الشوكة الناعمة


Timo


داليــــا


حصان المرجيحة


مــي (رحيق الورد)


أحمد(أقدم عاصمة في الحب)


والرائعة Tears


عمرو وائل


ليلة شتاء


لولا وزهراء


marmar


دعاء العطار


richardCatheart


منى سلامة صاحبة مدونة(شوية ورق)


امرأة من ثلج


هاجر صاحبة مدونة(مشاعر صنعت كلمات)


أ/عمرو فاروق


Soul .oOo. Whisper


فاروق بن النيل


Pink dreams


نعكشة


يوسف(ايديا ف جيوبي)


ريحانة الاسلام (سارة)


بـــــ الخطاب ــن


ستيتة حسب الله الحمش


فاتيما(روح قلب ماما)


شــــذا


وناس كتييييييييييير كتيييييييير اوي والله

يمكن ميعرفونيش حتى

ويمكن مخدوش بالهم من اللي عملوه معايا

ويمكن اصلا مش هيقروا الكلام ده

وفيه منهم سابوا بلوجر

بس مش مهم

المهم اني طلعت اللي جواياااااااااااااااا

ميرسي كمان كبييييييييييرة

بحجم البطيخة اللي بابا جبهالي

(مع اني مش بحب البطيخ)

لكل حد بيعدي من هنا ويقرا

ويبتسم ع الاقل من اي صورة او سطر يقراه عشوائي



والآن

فضيت لكتاب المدرسة العقيم اللي عاوز النسف والتفجير..





* * * * * * * *

ما معنى امتــــــــحان ؟؟؟؟

أ : أيام نكد وعــــــــذاب
م : مخ من المذاكــــــــره داب
ت : تعب وزهق واللى يقول غيره كده كـــــــــداب
ح : حاله نفسية هباب
ن : نرفزه وملل من الكـــــــــتاب


******

قمه الهدوء :
انك تقرا كتاب مش فاهمه


قمه التناحه :
انك تمتحن فيه

قمه النفاق :
انك تدعى للدكتور اللى مقررة

* * * * * * * * *



نحن قوم لا تهزنا رياح عاتية
فكيف تهزنا ورقة فيها
أجب عن الأسئلة الآتيه

*************

عروض الامتحانات قويه السنه دى ليه تشيل ماده لما ممــــــــــكن تشيل مادتين .. شيل واحده وخد التانيه هديه .. ليه تشيل لوحدك شيل انت وصحابك .. مع نظام افشل ناس اختار ثلاثه من اصحابك يشيلوا معاك


*******
بحبكوا في الله


Friday, May 14, 2010

مين...انا ...تاج؟؟


احم احم...دستور ياللي هنا
مش عارفة ليه حاسة ان فيه 6 هيدعوا عليا النهارده


زي ما انا هدعي على فاطمة (امرأة من ثلج)


مش هدعي كتير متخافيش متخافيش


بطريقة ما التاج عاجبني
والبوست المفروض انزله في مدونة
نظريات تحتاج إلى اثباتات


حيث أدون من اعماق اعماقي

بس زي بعضه بقى بما ان الدعوة جت هنا

نغير شوية من النوعية المقدمة ونعرض شوية أسرار

مع العلم انها مش اسرار قوية من اسراري

لأني استحالة اعرض حجات جوايا اوي




نبدأ الاجابة

السر رقم 1


شخصيتي..اعقد شخصية ممكن تقابلوها
بس مبتحاولش تحسس حد بكده
..بتضحك وتهزر..

وفجأة تلاقوها بتعيط من غير ما حد يلمسها..
شجاعة جدا..بس الخوف ماليها من جوا..
بتتكلم بثقة بس محدش بيشوف ان شفايفها بتترعش..

جريئة بس محتاجة حد يطمنها دايماً



السر 2

شخصية غير سطحية نهائياً
تحب تتعمق في كل اللي حواليها..

وعكس م الكل متخيل حياتي مش بتدور حوالين الدراسة ابدا


السر 3


يعتبر احد اهدافي ف الحياة ..
نفسي جداً ف يوم م الأيام اعمل كتاب يكون عليه اسمي ..



السر 4

أنا الجندي المجهول..
اللي معظم الاوقات بيفضل يساعد غيره يكون عظيم..
لكن هوا نفسه مبيتمناش العظمة ولا بينتظر الشكر



السر 5

حياتي بتتأثر بالحجات(العبيطة)
اخد على خاطري من حاجة عبيطة
بس بحاجة عبيطة برضه ممكن يصالحوني


السر 6

لولو انا عارفة اني كنت متغيرة شويات
بس بليز فورجيف مي :) اي لوف يو يا بينسل
ومقدرش اعيش من غيرك



اهدي بقى التاج ل 6 بس متدعوش عليا بليييييز

Tears

حصان المرجيحة

(Winner) أحمد

المستفز (حسني)

الشوكة الناعمة

مي رحيق الورد

..
وجاري التبليغ حالا


عاوزة اجابات نموذجية احسنلكوا بقى ^_^



Sunday, May 9, 2010

ميس نظيمة قوانين


ميس نظيمة...هي من النوع المحافظ
ذوي المكانة الخطيرة في المدرسة
بل في مربع المدارس بأكمله


كابوس مكتمل ينغص على جميع البشر حياتهم
بداية من المدير والفراش
وحتى المدرسين والموجهين..
لالتزامها الشديد وتزمتها بالقوانين
صغيرها قبل كبيرها


فمثلاً في ورقة الغياب اذا دخل احدهم بعدها
تجدها تدون وقت دخوله ليس بالدقيقة بل و بالثانية
مما اكسبها اسم شهرتها..
ميس نظيمة (روتين) او ميس نظيمة (قوانين)...


حينما يسألك أحد الطلاب بطيب نية
مين اللي بيديلك في الفصل؟
وترد بكل براءة..ميس نظيمة
تجد نظرات الهلع والرعب ظهرت على وجه السائل
وربما يتبرأ منك أصدقائك
لمجرد انك من طلاب ميس نظيمة قوانين


لهذا السبب ولأن التعامل معها محفوف بالمخاطر..
فقد حاولت تجنبها بقدر الإمكان في التعاملات والتنقلات
فقد اغير طريقي اذا رأيتها تسير منه
ربما لأسلك طريقاً أطول بعيداً عنها


كل ذلك للحفاظ على ماء وجهي وبريستيجي
وسط الطلبة كأمينة للمدرسة وامينة مساعدة للإدارة
يجب ان اكون قدوة طلابية..
وهكذا ظللت في أمان الله إلى أن وقعت الواقعة...


ففي ذلك اليوم عندما كنت أسير بجوار صديقاتي
على الرصيف زي باقي البني آدمين
وسرحت في ورقة بها سؤال كيميائي..
فوجئت بأصدقائي يتنحون جانباً بشكل لا إرادي
ويسحبوني من يدي كي أتنحى عن الطريق
ولكن هيهااااات الفاس وقعت في الراس
وسمعت صوت مزعج أتي بجواري...


باشمهندسة رضوى..


وقبل أن التفت
آآآآآآآآآآآآآى يا نفوخي مين جاب العامود ده هنا
صوت ارتطامي بالعامود سبب لي ارتجاج في المخ

مما جعلني اقلق على مستوى كتاباتي
وعلى معلوماتي الدراسية التي وقعت من ذاكرتي
واستقرت على سفح العامود..
ظننت انني احلم لوهلة لولا تكرر الصوت


بنت..!!


اه صح انا كنت فين ميس عامود
قصدي ميس نظيرة!!!!
مش مهم سألملم معلوماتي
عندما اتخلص من هذا الحوار المفاجيء ربنا يستر


ايه اللي حصل امبارح ف الاذاعة ده؟؟
ادب ساخر في اذاعة مدرسية محترمة
كان ناقص تجيبي دينا وسعد الصغير بالمرة
يحيولك الاذاعة


صدقيني حاولت بس للأسف كانوا مشغولين بفرح ليلتها
ومعرفوش يصحوا للطابور
بس ملحوقة يا ميس الجايات اكتر م الرايحات



نظرت إلي نظرة حادة وقالت :


هنهرج!!!


كنت اعلم ان موضوع الاذاعة
لن ينتهي بدون سماع موشحات
برغم عدم خروجي عن اللوائح
في الموضوعات المكتوبة..
وكان الحل الوحيد للخروج من الموقف
هو تقمص شخصية طالبة هبلة فقلت ببلاهة:


ايه ده معجبتكيش يا ميس ده انا طلبوا مني
احضر واحدة جديدة وبدأت اكتب فيها بالفعل
عشان نعرضها قريباً واكسكلوسف..


هنا فقط شعرت بأنني دخلت
في منطقة احترس الاقتراب والتصوير
التابعة للجيش ولم تبشر نظرتها بالخير بتاتاً البتة..


أنا مش هطول معاكي ف الكلام وعاوزة اعرف حالاً
انتي تبع أنهي حزب معارض
ومين مسلطك علينا وداسك وسط الطلاب..


انا تبع حزب كلمني شكراً
ولو اتصلت بيا من 12 ل 2 صباحاً
هجاوب عليك شخصيا وبنفسي واكيد هنفيد بعض..

حزب مين بس ومعارض إيه ..
بقى بذمتك شوفتي معارض قبل كده بيتخبط ف عواميد

دول بيتخبطوا ف لوريهات على طول

حضرتك أنا لم اتخطى حدودي عندما اتكلمت عن السناتر
لأني مكدبتش..ومش ذنبي أن يؤخذ كلامي
على محمل سياسي عندما تكلمت
عن طابور الكانتين
(المقصف زي ما بيقولوا ف بعض المناطق)

اعتبرالبعض اني بتكلم عن طابور العيش..

او عندما تكلمت عن طول مدة حكم
جد جد جدي الاعظم رمسيس

قارنتوها بالحكم الحالي..أنتوا اللي نيتكوا وحشة!!


حينها فقط شعرت ببركان اندونسيا انفجر ثانيةً..
ولم ينقذني سوى البنت هنادي بتاعت المعادي
لما جاءت تسألها عن معاد الدرس في السنتر..


فتملصت من قبضتها اللعينة
وانطلقت ابحث عن العامود الذي تقبع تحته معلوماتي الثمينة..
فإذا رأيتوا واحدة ماشية ف شوارع القاهرة
تردد : عامود تايه يا ولاد الحلال
لا تتعجبوا واعرفوا ان السبب دائماً وراءه..
ميس نظيمة قوانين

..

Friday, May 7, 2010

أحســـن



الموضوع بسيط..عاوز توصل لازم تنافق
ايه اللي انتي مش فاهماه يا بنتي...
تحبي اعيد من تاني؟؟


ها؟؟ لا خلاص


محسساني اني بقول ألغاز
ما انتي كنتي هناك وشوفتي ولا هنستعبط بقى


لا مش قصدي بس انتوا لخبطوني..
ممكن تقرروا عاوزين مني ايه بالظبط
انافق؟
ولا النفاق وحش؟؟ولا اسيبني من الناس كلها
واروح اسرح بعودين جرجير


معرفش انتي حرة كل واحد حسب احتياجاته


احتياجات ولا مباديء لسه برضه بتوتريني بآراءك الغريبة
مش كنتي بتكلمي عن مبادئك ف الكومينت
اللي فات


صدعتيني بقولك ايه..
بترغي ف نفس الرغي من 4 سنين
صراع المباديء عندك مش ناوي يخلص
يا شيخة فكيها متعرضيهاش


نظرت إلى نفسي في المرآة شزراً
وجمعت بعض الأوراق والاتوجراف
وامسكت بحقيبتي
وعندما وصلت عند باب الغرفة
جاء من خلفي صوت مدوي لزجاج متكسر..


فقلت بضحكة مستنكرة :احسن..


_ _ _ _ _ _ _ _ _
(من خواطر الاتحاد العام للطلاب)
25-4-2010

تعريف الاتحاد العام لطلاب الجمهورية:

هو مبني موجود في العجوزة على النيل بيتم فيه المسابقات على مستوى الجمهورية
وبيقضي فيه الطلاب المقهاير امثالي عدة أيام لعمل الانتخابات الطلابية
على مستوى الجمهورية واختيار الامين والامين المساعد


الدروس المستفادة:

1-اتعلمت هناك اول درس شرعي في النفاق

2-اتعرفت على شباب وبنات من جميع انحاء مصر

3-ادركت ان شعار الاتحاد لكل عام هو..الأصوات مصلحتك أولاً

4-قررت أن اتنحى تماماً ونهائياً عن مناصبي في الإدارة..
وان اسرح بجرجير كما اعلنت من قبل..
واترك فرصة للآخرين عشان يسرحوا معايا بخس وفجل وفول حراتي



سلاماتي لكل اللي بيمتحنوا..:)
يارب تنجح يا تتح


Monday, April 12, 2010

يا بخت المجانين!!!


استيقظ في السادسة على صوت زقزقة العصافير..
اللعنة!! حد يصحي حد دلوقتي هقوم ابيع لبن


نظرت من نافذة حجرتي وقلت لهم:
هششش خلي عندكوا دم عاوزة انام...هلاقيها منكوا
ولا من الثانوية العامية


ومن الواضح انهم كانوا يتحدثوا في موضوع هام جدا
فلم يتوقفوا لثانية ولا حتى عبروني...


ووقف امامي عصفور على اقرب فرع من نافذتي
ينظر إليّ بعينين ينطلق منها الشرر كأنه بيقولي
والله ما أنتي نايمة النهارده..علوا يا ولاد الفوليم...


والولاد اشتغلوا سيمفونية الخيار والعنب بصوت زقزقاتي مزعج 
اغلقت النافذة ويأست من امكانية النوم في هذه الضوضاء..


اتعجب ممن يحبون تلك الكائنات المزعجة
اللي فالحة فيه انها تجيب صداع مزمن وانفلونزا طيور !!


انطلقت لمطبخنا لعمل كوب نسكافيه يعدل الدماغ الخربانة
لعلي استطيع ان اذاكر يمكن افلح ولا حاجة


حاولت اشعال الولاعة ولكنها لم تعمل...
وماله برضه امال هما اخترعوا الكبريت ليه


ابحث في الشقة بأكملها عن عود كبريت فلا اجد خشبايه...
وهنا يأتي إلى ذهني صورة جد جد جد جدي الاعظم
أيام العصر الحجري حينما كان يشعل النار بالحجارة...


وعندما لا اجد حجارة في منزلنا
استشيط غضبا وترتابني حالة من الجنون...


على رأي المثل جت الحزينة تصحى ...ملقتش عود كبريت


حاولت ألا افقد اعصابي فالانسان الذكي المتزن
هو من يجيد التعامل في تلك المواقف هذا ما قيل لي سابقاً..


دائما ما كنت اعتقد ان الانسان زي الكوباية
يفضل يشيل يشيل لحد ما يتدلق
لو محدش شرب الكوباية او فضاها بأي شكل

والآن انا كوباية ولازم اشربني 


لهذا سأفتح التليفزيون واتفرج على اي حاجة
تنسيني بداية اليوم الغير مشجعة بالمرة
مهو مفيش مذاكرة على كل حال

وسأبتعد تماماااااااً اكرر تماماً
عن النشرة الاخبارية
(شخصيتي قوية مش كده)

وافتح الاقي التي في شغال على دريم 2
انه خطيبييييي اللي ميعرفش اني خاطباه احمد المسلماني
اشطة جداااااا

خلص المسلماني ووجدت النشرة تطاردني..
مش هيجرا حاجة
لما نشوف فيه ايه ف الدنيا..
(قوية قوية مش اي كلام )

وقفات احتجاجية..عادي

الاسعار ف الطالع..طبيعي

 مهزلة مجلس الشعب..وايه الجديد

نقيب الاطباء بيشكر في بطرس غالي..
نفاق معتاد لجر ناعم مع الوزير..
خطط سياسية لفقع المرارة الشعبية مليش دعوة بيها


كده انا مطمنة عليكي يا مصر...
انتي في أيدي امينة...
امينة مرات سي السيد اللي عمرها ما بتخرج من وراه


تؤ تؤ مش عاوزة اتنرفز بلاش اتنرفز...
محدش يقدر ينرفزني غير بمزاجي 

هيا بنا نخرج..هوا ده الحل...
اي نعم الساعة 8 وشوية وأي نعم ده يوم في وسط الاسبوع
بس..مفيش مانع انزل ..يمكنني احتمال الزحمة

برغم رخامة مربع المدارس أمام منزلي وكثرة الطلاب
اللي بينطوا السور دائماً

(للي ميعرفش نط السور هي
رياضة تشبه القفز بالزانة مع الاختلاف
انهم بينطوا بدون عصا..رياضيون متمرسون)


نزلت باسرع من السرعة السريعة
وعند اخر سلمة في البيت
شعرت باختلاف في قدمي..بعد ان أهلت نفسي للنظر
 وتوقعت انها هلاوس 
ببص لقيت الشوز اتقطع...لااااااااااااااااا
 
ده الشوز الجديد..ابو 50 جنيه..ده انا عانيت على ما اشتريته
..ده اول حاجة اشتريها من حر مالي..لا لا لا لا


حاولت بكل ما املك من قوة
اني افضي الكوباية اللي بتتملي جوايا غضب
وكل شوية اهدي نفسي .. بس الكوباية ناقصلها شوية وتتدلق


ويا خوفي لو اتدلقت 
احتمال تلاقوا خبر ف الاهرام 3 قتلى و55 مصاب
من فعل طالبة ثانوية عامة اصابتها نوبة من نوبات الثانوية العامية


هنا ادركت انه لا فائدة كل شيء يصيبني بالجنون ،
كل صوت بجانبي يعصبني..يوم سئ اخر
كل شيء ضدي النهارده..

في هذه الحالة أفضل البيات الشتوي في شهر 4..

سأنام حتى اشعار آخر
برغم اني اشعر بالرغبة في الاحتراق
بأعواد الكبريت اللي مش موجودة ف البيت
أو بطريقة جد جد جد جدي الأعظم بالحجارة..


آآآه لكم احسد ذوي الأعصاب البارده على برود اعصابهم
واحسد المجانين على غياب عقولهم..

...