Friday, May 7, 2010

أحســـن



الموضوع بسيط..عاوز توصل لازم تنافق
ايه اللي انتي مش فاهماه يا بنتي...
تحبي اعيد من تاني؟؟


ها؟؟ لا خلاص


محسساني اني بقول ألغاز
ما انتي كنتي هناك وشوفتي ولا هنستعبط بقى


لا مش قصدي بس انتوا لخبطوني..
ممكن تقرروا عاوزين مني ايه بالظبط
انافق؟
ولا النفاق وحش؟؟ولا اسيبني من الناس كلها
واروح اسرح بعودين جرجير


معرفش انتي حرة كل واحد حسب احتياجاته


احتياجات ولا مباديء لسه برضه بتوتريني بآراءك الغريبة
مش كنتي بتكلمي عن مبادئك ف الكومينت
اللي فات


صدعتيني بقولك ايه..
بترغي ف نفس الرغي من 4 سنين
صراع المباديء عندك مش ناوي يخلص
يا شيخة فكيها متعرضيهاش


نظرت إلى نفسي في المرآة شزراً
وجمعت بعض الأوراق والاتوجراف
وامسكت بحقيبتي
وعندما وصلت عند باب الغرفة
جاء من خلفي صوت مدوي لزجاج متكسر..


فقلت بضحكة مستنكرة :احسن..


_ _ _ _ _ _ _ _ _
(من خواطر الاتحاد العام للطلاب)
25-4-2010

تعريف الاتحاد العام لطلاب الجمهورية:

هو مبني موجود في العجوزة على النيل بيتم فيه المسابقات على مستوى الجمهورية
وبيقضي فيه الطلاب المقهاير امثالي عدة أيام لعمل الانتخابات الطلابية
على مستوى الجمهورية واختيار الامين والامين المساعد


الدروس المستفادة:

1-اتعلمت هناك اول درس شرعي في النفاق

2-اتعرفت على شباب وبنات من جميع انحاء مصر

3-ادركت ان شعار الاتحاد لكل عام هو..الأصوات مصلحتك أولاً

4-قررت أن اتنحى تماماً ونهائياً عن مناصبي في الإدارة..
وان اسرح بجرجير كما اعلنت من قبل..
واترك فرصة للآخرين عشان يسرحوا معايا بخس وفجل وفول حراتي



سلاماتي لكل اللي بيمتحنوا..:)
يارب تنجح يا تتح


14 comments:

marmar said...

احجز اول تعليق بقى واقرا بعدين

marmar said...

بالنسبه للخس والفول اللي هتبيعيه هتبيعيه في اي مكان عشان اكسبك
>>>وش بيطلع لسانه
معلش يا بنتي هتعملي ايه هيا سنه ولازم تعديها بأي شكل بالطول بالعرض هتعديها
وبكره تفتكري ولله احلى ايام ايام المدرسه والحاجات دي
احسن من الجامعه والبهدله والمذاكره ولله
ده انتو بتدلعو اصلا
امشي يا بت يلا من هنا
برا مدونتي يلا براااااا

marmar said...

اه صح دي مدونتك انتي مش مدونتي
يبقى انا اللي برا بقى
شايفه انا مطيعه ازاي
يلا يلا انشاااااااااالله ما حد حووووش

ELMOSTAFZ said...

و الله عندك حق...
المبادئ بقت حاجة كلاسيكية ف نظر الناس..و اللي لسة متمسك بقيم و مبادئ لازم يستحمل كل اللي يجراله...
بس حوار الذات عجبني اوي بجد ، أعرف ناس بتقف نفس الوقفة دي قدام المراية كل يوم تقريبا..بس المراية عمرها ما اتكسرت طبعا و إلا كان حرم يبص ف مرايات تاني:)
تحياتي الكبيرة...

عاشق الجنة من الإخوان صلى على النبى said...

أول حاجة
يارب تنجحي يا تتح
وربنا يوفقك
وبعد كده متسمعيش كلامه وأوعي من النفاق
فالنبي صلي الله عليه وسلم قال ( ...فأطلبوها بعزة الأنفس فإن الأمور تجري بمقادير فكل شئ مقدر ) وسيبك من الناس التعبانة دي
مدونة جميلة ورائعة
أول ومش أخر زيارةإن شاء الله
صلي علي النبي

بــــ الخطاب ــن said...

ربنا معاكى ذاكرى كويس
بقالك 4 سنين فى صرا بلاش تدخلى السنه الخامسه
حررررررام

اقدم عاصمه فى الحب said...

السلام عليكم

ربنا معاكى
كل لما ازورك اشوفك بتنقضى فى مصر الحبيبه وفى إداره الدوله وفى ناسها وفى كل حاجه
يا بنتى انتى مش فاهمه
اساسا الراس الكبيره بيجوعنا علشان نعمل رجيم وبيكنز فلوسنا فى سويسرا علشان يمسك على ادينا علشان المستقبل يا بنتى وكون ان النفاق مش عاجبك .. اعملى نفسك بتمثلى وانتى هتعدى .. زى ما كل حاجه بتعدى
أمال زويل بقى زويل ازاى :)
.
وابقى هاتى جرجير كويس شويه مش دبلان..! :)
ودى إحترامى :)

طالبة مقهورة ..درجة أولى said...

مرمررر

ههههههههههه قدام الاوبرا كده على ايدك الشمال..

شكلك مش هتنفعيني ولا هتعبريني

طالبة مقهورة ..درجة أولى said...

مرمر تاااااااني

كفايا عليكي كومينتين..ايه البذخ اللي انتي فيه ده ^_^

ياااه اخيرا طلعتي حسيسة وطلعتي بره بقى يوه ضلمتي المدونة ^_^

طالبة مقهورة ..درجة أولى said...

المستفز

حسني منورني...انا من الناس اللي بتقف كتير قدام المرايات لما مبلاقيش حد اكلمه..ممكن يكون جنان بس ده قمة العقل من وجهة نظري

:)
سلاماتي الكتيرة

طالبة مقهورة ..درجة أولى said...

عاشق الجنة

اللهم صلي وسلم وبارك عليه

لو كنت ناوية انافق مكنتش عملت المحاورة ديه بيتهيألي ادتني نوع من الثقة اني صح

بجد كومينتك نورني..دمت بكل خير

طالبة مقهورة ..درجة أولى said...

بن الخطاب

حاتر متخفش هذاكر كويس ان شاء الله ^_^

يارب تكون كويس

طالبة مقهورة ..درجة أولى said...

اقدم عاصمة في الحب

هههههههههههههههههههههههه

حلوة فلسفتك ديه بجد رهيبة..[س مش بعرف امثل اعمل ايه اهاجر لكولا لامبور ولا ايه ما تشوفلي صرفة ف الموقف الحرج ده ^_^

ومتقلقش عازماك على كوباية عصير جرجير ف الحر ده

أحمد شريف said...

قد تمر بكِ الأيام وتعودين لتقولي يا ليتها تعود لأقف وأنحني أمام معلمتي وأقدر دورها في احترام المثل والقيم

وهي وإن كانت تظهر أمامك الآن تزمت وروتين قد تظهر لكِ بعد أن يشتد عودك بأنها معلمة فاضلة أمينة وصاحبة رسالة وقيمة ومبدأ