Friday, July 23, 2010

3 شعورات




النهارده....23 يوليو

تاريخ يبعث بداخلي 3 شعورات (جمع شعور) في نفس ذات الوقت


الشعور الأول الأكثر بهجة وتفاؤل هو...

ناقص يومين على مصروف الشهر..

في الحقيقة لم اتذكر ذلك لولا اخويا الكبير

ربنا يخليه ليا وميحرمنيش من تي-شيرتاته قادر يا كريم


الشعور التاني على العكس تماما وهو بعنوان
خيااااااااااانة..

فشهر يوليو اشتق من اسم القائد الروماني يوليوس قيصر

عمكوا يوليوس في يوم

والمدام داعية عليه من قلبها..

وصباع رجلها الصغير غضبان عليه

عشان موداش العيال دريم بارك

ودعت عليه في ساعة استجابة

فاتخنق منها وقال اما اروح اشقر على مجلس الشيوخ

فاذ فجأة بمجرد دخوله للمجلس وبيقول يا سااااتر

ينهالوا عليه بالطعنات

واحد واحد لتتفرق دمائه بين القبائل

وجاءت طعنة اقرب اصدقائه بروتوس وبمجرد ما شفه قاله

حتى انت يا بروووووووووووووتوس

وعشان نتماشى مع القصة فطعنة بروتوس كانت بتوجع اكتر

يعني الكام عشرين طعنة موجعوش وديه اللي وجعته

(عدوها زي ما عديتها بالظبط)


وبذلك يا اعزائي وقعت اقبح عملية اغتيال في التاريخ

قبل قدومي لتلك الحياة طبعا..احسن حد يقول انا السبب !!



اما عن الشعور الثالث فهو في قمة التضارب

تقريبا كده تم الغاء الملكية واعلان الجمهورية زي النهارده

ارى انه ليس هناك اي فرق منذ 25 سنة

ملكية ..جمهورية..ملكهورية..

كله محصل بعضه

ده بريستيج مش اكتر

اعتقدت قديما ببراءة الاطفال

ان هناك فرق بين الكيكي والكيوي

عفواً اعني الملكية والجمهورية ..


فأيام الملكية كانت هناك عائلة واحدة

تحكم وتنهب وتصلح وتخرب ولكن(على نووور)

كل شيء معروف للعامة

أموالهم ومصروفاتهم..وما يمتصوه من حق الغلابة

معروف ومدروس في العديد من الكتب الموجوده حاليا

فساد علني مباشر ولا من تحت الترابيزة ولا وجع دماغ

ناس واضحة............



لكن الجمهورية بسم الله ماشاء الله

اللهم بلا حسد..

عدة عائلات تحكم مصر وتنهب خيراتها..ولكن

عندهم حياء فده كله من تحت لتحت

وبالنسبة للغلابة..فعندما يمر مسئول على منطقة فقيرة

يعود و يتركها وهي اكثر فقراً

والأهم من ذلك اننا راضيين

ومش محتاجين ولا ضباط احرار ..ولا ملكيين مساجين

واهو عايشيييييين

الحمد لله

الله يرحمك يا جمال 1 ويبشبش الطوبة اللي تحت راسك


وتحيا ملكهورية مصر حرة مستقلة

_____



40 comments:

MR.PRESIDENT said...

علي فكرة رغم وحشية قتل يوليوس إلا أن مصلحة الدولة كانت تستدعي ذلك .

وكان بروتس يتألم لأنه كان شديد الإخلاص ليليوس قيصر . ولكن كانت معشوقته روما أبقي في قلبه من صديقه .

اما حته الملكية ولا الجنهرية فكلوا محصل بعضوا وإن كان الراجل بتاع الفول والطعمية اللي علي أول الشارع هو اللي ماسك لكانت مصر حالها احسن من .,.. اللي ماسكين .

Ramy said...

تعيشى وتفتكرى

يا طالبة (:(:


بس شعور المصروف دة مأثر فيا قوى

بس فيكى الخير

شوفى افتكرتى اخويكى ازاى بالخير (:

دمتى بخير (:

richardCatheart said...

ههههههههههههههههههههههههههههه

والنبى اصيله


افتكرتى اخوكى

ويوليوس بيك قيصر

والبجباشى عبد الناصر الله يرحمه ويسمحه بقى

بس مافتكرتنيش بقى تجيبى سيره الغريب وانا لاء اه صحيح مالي علاقه ب 23 بس بردو
ههههههههههههههههههه

ELMOSTAFZ said...

أمال عيد الثورة كان أمتا ؟
مش 23 يوليو ده كان عيد الثورة ؟ مسمعتش يعني أغاني وطنية النهاردة...
ياااااه ، لو فضلتي تدوري علي البلاوي اللي حصلت في كل يوم بنعيشه مش هاتخلصي ، دانا ساعات كنت بتغاظ من برنامج حدث في مثل هذا اليوم و أقول في بالي كده هوا يعني مفيش يوم من أيام ربنا البشرية أنتخت فيه شوية و معملتش حاجة ؟؟؟
علي كده أنا كل يوم أحتفل بذكري دخولي الحمام يوم كذا و بذكري تلميع جذمتي يوم كذا :)
تحياتي آنسة رضوي...

ELMOSTAFZ said...

بس النهاردة عيد الثورة صح ؟

طالبة مقهورة ..درجة أولى said...

سيادة الرئيس

الفكرة ان الشهر نفسه بيفكرني بالقصة ديه..وبيحسسني بقرب خيانة شخص ليا

وبعدين احنا نجيب ليه حد من بره..امال انت يا رييييس فين اتصرف وشوفلنا حل

طالبة مقهورة ..درجة أولى said...

Ramy

ههههههههه قصدك افتكرته بالتي شيرت بتاعه

:)

منورني جدا

طالبة مقهورة ..درجة أولى said...

قطتييييي

ممممممم خلاص انا كده افتكرتك السنة الجاية اقول قطتي السنة اللي فاتت كانت هنا وقالت افتكرها ^_^ اي خودعة

طالبة مقهورة ..درجة أولى said...

استاذ مستفز

اها ولا انا..اصل الثورة متعتبرش حدث مهم..فيه تعليق محمد غالية قاله
الثورة اكبر كدبة في تايخ مصر!!

وطبيعي ان كل يوم يبقى مليان..كل يوم حد بيعمل لنجاز عظيم بس محدش بيهتم...فشنك

ايون يا فندم النهارده عيد الثورة :)

زهرة said...

ربنا يخلى لك شعوراتك

وتعيشى وتستشعريهم يا أوختى

بس استشعار المصروف دة حاجة جميله .. نفسى أحسه كل يوم :)

سلسبيل said...

و الله عندك حق
وربنا يخليلك اخوكى يارب
ويوليوس قيصر أظن
أنوا هو الى حرق المكتبة
مش كدة

تحياتى لك حبيبتى على مواضيعك الجميلة

ريحانة الاسلام said...

احلى حاجة ان مصروف الشهر قرب ورضوى حبيبتى هتجبلى شيكاليييييييييته حبنا...انا مش راسمة على تقيل اهو هيه شيكاليتاليا
..^_^
اما بالنسبة ليوليوس تصدقى انى اول مرة اعرف المعلومات دى
يمكن درسناها بس لما درسناها درسناها وحفظناها لاجل الامتحانات فقط..^_^
بس الله ينور عليكى نورتينى والعلم نور بردو
...
وتحيا ملكهورية مصر الكيوية...^_^
..بوست جامد كالعادة يا فنااااااااان ..جو اون

أتنين حبيبين said...

تصدقى بالله

انا بحبك كده لله فى الله
ربنا يعزك يارب ويصلح حالك ياعسل
اسلوبك وطريقة كلامك وكتابتك رقيقه بطريق كوميديه


تعيشى وتفتكرى يا اختشى
انا بقا كنت بستنا المصروف زيك كده
الوقتى لما كبرت واشتغلت انا اللى بدى المصروف تعالى يا اختى مع اصحاباك
هههههههههههههههههه
اضحك الله سنك حبيبتى

توتا

R-H-S said...

حلوه ملكهوريه دي جديده لنك

بس معرفتش انتي مع الثوره ولا ضدها علشان انا عاوز اتخانق
مفيش حد عاجبه حاجه

والناس اللي بتهبط جهد ناس ضحوا بحياتهم علشانا

اى نعم الناس بتسرق اكتر بعد ما كانت عيله واحده بس برضن


ماشي ايتها الطالبه
تحياتي

norahaty said...

ياررررررررررضوى
ياااااااااااارضوى
يااااااااااااارضوى
ياطالبة مقهورة درجة اولى
انتى مالك ومالك الجمهورملكية بس!خليكى حبيبتى فى المصروف الشهرى
ربنا يخلى الوالدين واخوكى
وما يحرمك منهم ابدا
ولا من المصروف طبعاً:)
ومبرووووووووووووووووك
النجاااااااااااااااح:)

طالبة مقهورة ..درجة أولى said...

زهرة

اهاااااا احلى استشعار ويسلام بقى وانتي بتفرتكيه....وووووووو شعور اروع واروع

وبعدها نروح نشحت على باب الجامع

طالبة مقهورة ..درجة أولى said...

سلسبيل

مظبوط كلامك..يوليوس قيصر كان كتحاصر بالمصريين فعشان يهرب حرق السفن والحريق امتد للمكتبة ديه احد الاقوال المرجحة:)

مذاكرة اهووووووو كويس يا بنوتة

ربنا معاكي يارب

طالبة مقهورة ..درجة أولى said...

ريحانة الاسلام

سيروز قيصر ^_*
تصدقي اسم جامد اوي

المصروف استلمناه وخلصناه يا بنتي الشوبينج ده اللي جايبنا لورا

تعاليلي بس انتي كيكي وانا هجيبلك شحنة شوكولا بحالها

طالبة مقهورة ..درجة أولى said...

اتنين حبيبة

توتاااااا
والله وانا بحبك جدا كمان معرفش ليه ولا ازاي..الحب اعمى هعمل ايه ^_^

ربنا يكرمك يارب وينولك اللي في بالك

وان جاية استلم المصروف

طالبة مقهورة ..درجة أولى said...

استاذ مونبه..

مش هغير اسمك مهما انت تغيره متحاولش
بص انا مش ضد الثورة ولا الضباط الاحرار بس الفكرة انها محلتش حاجة ومفرقتش كتير ما بين قبل وبعد الثورة

فيه واحد قالي مرة الثورة ديه اكبر كدبة في تاريخ مصر ..بس انا بحلم اني كنت اعيش الفترة ديه

ع الاقل كان يبقى فيه انتماء

ماشي ايها الخريج :) ابقى طمنا عليك كده

طالبة مقهورة ..درجة أولى said...

norahaty


ميرسي يا جميل
بس انا مصرية اصيلة وبحب السياسة جدا برغم ان فيه فترات سياسية ضايعة عندي
لكن بنحاول نجمعهم :)

الله يبارك فيكي يارب

عبد الله محمد said...

عنجد تدوينة خفيفة دم , اول مرة لي هنا و عجبتني
بالتوفيق بالدراسة

محمد التركى said...

السلام عليكم ورحمه الله وبركاته
طالبه مقهوره درجه أولى
جامد قوى الأسم
والبوست قنبله
سيبك أنتى بالا يوليوس قيصر بالا روما
خلينا فى الجمهوريه المهلبيه الكوساويه على مولوخيه ديه
أحنا طالع عين أبونا من يوم ماأتولدنا ولا شفناش يوم عدل
انا عمرى 27 سنه وداخل على 28
ومن يوم مااتولدت مشفتش غيره ماسكها
ملك برضو
فيها ايه لو كانو سابو الملك فاروق
ماهةى بايظه بايظه

فعلا الله يرحمك يازعيم الامه
لو كان يعرف اللى هيحصل والله لكان باس ايد فاروق وقاله والنبى خليك
انته اولى
ههههههههه
هموم تبكى والباقى تضحك

أنا سعيد جدا أنى شوفت مدونتك الرائعه ديه ومعجب جدا بأسلوبك الجميل
تقبلى مرورى الأول وليس الأخير
ودى وأحترامى لأجمل طالبه مقهوره

محمد التركى

اقصوصه said...

مدونتك جميله

واسلوبك في السرد شيق وممتع

سعيده بمروري من هنا :)

Timo.. said...

رضوى يا قمر..
الف مبروك النجاح واسف على التاخير والاختفاء الفترة اللي فات وبلاش ذهنك يروح لبعيد (لأ.. مش فريدة السبب) :) :)
=====================
بوست النهاردة:
- حركة (خيانة)..
- ينتج عنها القيام بـ (ثورة)..
- تنتهي باعادة توزيع الدخل ليصل اليك (مصروفك) كاملا بدون اي خصومات
ومش ها اقول اكتر من كده (';')


ميرسي على سؤالك واهتمامك يا قمر وكل سنة وكل رمضان وانت بكل الخير :)

Timo.. said...

مش عارف ليه انت قافلة التعليقات على المدونة التانية بس حبيت اعلق على اخر بوست هنا :
(من اجمل الرغي اللي شوفته يمكن عشان انا باعمل زيه كده مع نفسي بالضبط فا حسيته شبهي..وعلى فكرة رائع جدا الرغي ده مع نكهة سيلين ديون)

Rosie said...

مملكوهورية ده زى زمهلاوية...واضح ان بقى فى حاجات كتير فى حياتنا كده..
مش باين لها معالم .نص نص
......
..و شعور المصروف هو أهم شعور ركزى عليه..
...

طالبة مقهورة ..درجة أولى said...

محمد التركي

هههههههههههههه
ربنا يخلي حضرتك..ميرسي حقيقي على مرورك

وبلاش نجيب سيرة حد اللهم اني صايمة ^_^

كل سنة وحضرتك طيب

طالبة مقهورة ..درجة أولى said...

اقصوصة


ميرسي انا اسعد بمرورك

طالبة مقهورة ..درجة أولى said...

تيمو

هههههههههههه انا مقلتش فريدة ولكن لا استطيع الانكار ان فكرت ف وهلة انها هي..ربنا يسعدك يارب

حلو اوي تنظيم البوست كده..كومينت مختلف :)

وانت طيب يارب ويجعل ايامك كلها سعيدة

وبالنسبة للمدونة التانية حفاظا على مرارتي فقفلت الكومينتس وهفتحها تاني ان شاء الله قريب :)

طالبة مقهورة ..درجة أولى said...

Roise

فعلا مظبوط كلامك جداااا
النص نص ده اللي مودينا ف داهية

:) وركزت ع الاحساس ده لحجد م المصروف خلص شكلي اتحسدت

يوميات رجل مش عايز يجوز said...

كل عام وانتى بخير

تحياتى

نساء في حياتي said...

مصر تقريبا لسة ملكية

بس الملك مشوة و جابوا ملوك تانيين من عامه الشعب الجعان

اقصوصه said...

مبارك عليكم الشهر

وكل عام وانتم بخير :)

nour shahen said...

والله دمك شربات
اما بالنسبه ليوليوس قيصر فطعنة صديقة كانت الاقسى عليه حب بقى هنقول ايه

اما بالنسبه للتاريخ دا اصلا مش بيفكرنى الا بعيد ميلاد اختى ويفكرنى انى لازم اجيب هديه , برغم ان الاخت ملتزمه بس مش بتفوت حقها فى الهدايا ابدا
والجزء الاخير بتاع البلد ولا كأنى منها
ونقول كالعاده طويل العمر يطول عمره فيخرب بيتنا وينصره علي مين يعاديه هاى هىء

جايدا العزيزي said...

الله عليكى

مدونتك وموضوعاتك راقت لى كثيرا


ايه بحر المعلومات ده


وكتباه بطريقه جميله فكرتنى باحمد رجب


من كتر ما المدونه شدتنى ضفت نفسى للمتابعين


تحياتى يا قلبى

طالبة مقهورة ..درجة أولى said...

شكرا لمروركوا جمييييييعا
وبعتذر عن عدم الرد واحد واحد

منورين :)

شركة تنظيف بالجبيل said...


شركة المثالية للتنظيف بالقطيف

شركة تنظيف بالجبيل said...


شركة تنظيف منازل بالجبيل
افضل شركة تنظيف بالجبيل
شركة تنظيف شقق بالجبيل

شركة تنظيف فلل بالجبيل
شركة تنظيف بيوت بالجبيل

شركة تنظيف بالجبيل said...


شركة كشف تسربات المياه بالجبيل
شركة تسليك مجاري بالجبيل
شركة شفط بيارات بالجبيل
شركة نقل عفش بالجبيل