Thursday, February 18, 2010

فلنبدأ بقراءة الفاتحة..



بسم الله الرحمن الرحيم.........آآآآآآآآآآمين


بالطبع المدونة مماتتش لأني لسه عاملاها

وبكل تأكيد هيا متخطبتش..لأن لو جالها عريس ..أنا هخطفه منها

ولكن الموضوع وما فيه اني حبيت أقرأ الفاتحة على روح

جميع الطلاب المصابين بداء التعليم

الذي
أوشك على أن يكون وباءاً يفتك بالشعب المصري
(كان مالها الأمية بس ... ده حتى كان اسمها حلو وعاتشفي)


وقد تتساءلوا..اشمعنا انتي اللي تكتبي في هذا الموضوع

ولهذا قررت ابدأ بـ <السي في> بتاعي
ومؤهلاتي كباقي أبناء جرجيري..




1- وجود كمية هائلة من الأوراق والأقلام اللي عندنا في البيت
بالإضافة لوجود فراغ داخلي وفضاااااااااا وكأنني في صحراء جرداء
تصحى وتنام وتقوم على قرار وزاري مدمر..




2- إنني طالبة مقهورة عانيت من غيابات المدرسة والمدسين المعقدين والدروس الخصوصية والسناتر
(جمع سنتر محدش يبصلي كده يوه)


3- طبقت على جيلي سنة سادسة والجيل اللي بعدي الثانوية العامة سنة واحدة و إضافة الكمبيوتر للمجموع والبرمجة المعقدة

(مع مراعاة انهم مش فالحين أصلاً في لعب الـ جايمز
كتهم نيلة ف حظهم المنيل)



4- مشاركاتي المتعددة بالمسابقات والاتحادات الطلابية جعلتني خبيرة بأحوال الطلاب المنفسنين والذين صاروا على حافة الجنون ومتبعين مناهج التطنيش عند اللزوم..

(سيتم شرح تلك الأنواع وغيرها لاحقاً)



5- وأخيراً لأنني عاصرت 3 وزراء مبجلين فيمكنني الجزم
(مش اللي مفردها جزمة يوووه فضحتوننننا)
أن التعليم والحمد لله في تميز مستمر.


و جميع ما سبق يذكرني بقول
الطالبة المعذبة تحت ضغط الثانوية العامية

(والتي ستظل عامية لا تؤثر فيها عمليات الليزك)


ومن تذوق مر التعليم المصري ساعة..لتمنى البقاء في الجهل مدى العمر


..

31 comments:

محمود رفعت said...

جمييييله

طالبة مقهورة ..درجة أولى said...

أستاذ محمود رفعت :)

اهلا وسهلا بحضرتك ..أول كومينت في المدونة بأكملها

شكرا جدا على رفع معنوياتي

checolata said...

الله عليكى ..

دمتى معبرة عما بداخلنا ..

ومبروك المدونة :)

وجدتها! اضحك بقى said...

رودي
اي هووووووب تكون احلى مدونة ف العالم يارب
وانا مستنية بقى موضوعاتك بفارغ الصبر:)
دايما ناجحة يارب يا قمري

عاوز اصحي said...

هما زودوا عليكوا انتو كمان

انا افتكر اول ما دخلت الاعداديه طبقوا علينا ماده التكنولوجيا وماده كمان كدا ملهاش لزمه كنا دايما نقول احنا نحس

وفي الكليه احنا اخر دفعه تتعامل بالنظام القديم والدفع اللي بعدينا اتعاملوا بالنظام الحديث

كلنا بندوق المر والله

بالتوفيق ومبروك المدونه الجديده

امل الاسلام said...

شكلك بتبشرينى يا دودى احنا لسه قدامنا كام شهر لغاية ماندخل هذا العالم المسمى ب"الثانوية العامة" ولكننا صامدون يا أختاه
اصل بصى يا حنا ياهما
مصرى على مصرى
...
مايرولش
هما هيطلعوا قوانين جديده واحنا ندعى عليهم وان شاء الله ربنا هايستجاب لنا
ودمنا ودمتم سالمين
والسلام عليكم ورحمة الله وبركاته
ههههههههههههههه
اه انا حطيت بوستين جداد عندى يبقى شقرى عليهم

بــــ الخطاب ــن said...

طيب سيبى رقم تليفونك بره عند السكرتيره واحنا هنبقى نكلمك
سى فى ايه انتى مقدمه على شغلانه
بس السى فى ده ينفع تقدمى بيه على طلب اعتقال

Cute Kitty **sookra said...

ههههههههههههههههه
يالهوى على الطعامه من اولها وخفه الدم كدا
لالالالالالالالالالالالالالا
شكلك هتبقى حكايه فى التدوين وطبعا بما اننى احب الحكايات فلازم اقراكى دايما
منوره عالم البلوجرز
وكمان عالم التعليم
ههههههههههه
وميرسى على زيارتك ياسكر
وانتى طيبه يارب

طالبة مقهورة ..درجة أولى said...

شيكولاته :)

ربنا يخليكي يا قمر يارب ويوفقك على طول...اهو بنحاول نبعبر عن فكرتنا وبس

تابعيني وان شاء الله الجديد هيبقى احلى بكتير

والله يبارك فيكي

طالبة مقهورة ..درجة أولى said...

وجدتها!!

يا اهلا بانتيمتي اللدودة :)

يارب يا لولو وان شاء الله هبذل كل جهدي فيها وطبعا كفاية مساعدتك ووقوفك جمبي

بحبك اوي

طالبة مقهورة ..درجة أولى said...

عاوز اصحى

اها انت كده من دفعة اخويا برضه اول دفعة اتفرضت عليها التكنولوجيا

بص انا احترت معاهم بيلغوا حجات وبيضيفوا حجات اعجب من العجب

ربنا يكون في عونك وفي عونا جميعا

طالبة مقهورة ..درجة أولى said...

أمل الاسلام

ههههههههه يا يومي متستعجليش على رزقك..وبعدين انتي بتاخدي خبرات يبنتي امال انا ادوني لقب معيدة بالثانوية ده بالساهل

هههههههههههههههه
دمتي بخير وشقرت خلاص

طالبة مقهورة ..درجة أولى said...

بن الخطاب

لازم طبعا اعرفكوا بنفسي الله امال ابقى مؤهلة ازاي ^_^

وان شاء الله الاعتقال جاي ادام صبرا بالله

طالبة مقهورة ..درجة أولى said...

Cute Kitty **sookra

ميرسي يا سكراية ربنا يخليكي يارب

ومتقوليش ميرسي ديه تاني مش كفايا مجبناش تورتة ومعملناش عيد ميلاد جامد :)

ان شاء الله هستناكي ع طول
ربنا يسعدك دايما

Sam Sh said...

:))
جميلة جدا
تحياتي القلبية و مبروك المدونة الجديدة

Timo.. said...

ايه ده بقى...؟
دوختينا معاك..يا تقعدي هنا يا تروحي هناك..
انا رايح جاي من المدونة دي للمدونة التانية
بس على العموم (مبروووك)
(';')

طالبة مقهورة ..درجة أولى said...

سامح

ميرسي جدا جدا تحياتي ليك اكتر

ربنا يسعدك يارب

طالبة مقهورة ..درجة أولى said...

تيمو

وانت خايلتني اختارلك مدونة واحدة بس واقعد فيها يوه :P

الله يبارك فيك يارب ويوفقك وعاوزة الاقيلك بوست قريب ;-)

Hossam said...

hello
بجد مدونة فظيعة جدا
انا حبيتها من اول مشفت اسمها
فعلا عندك حق فى كلامك
انا حسيت الكلام ده من اول مدخلت التعليم المصرى يعنى من اول الكلية
والحمد لله مش مرتاح
اكيد مش اخر زيارة
تحياتى

حلم بيعافر said...

ربنا معاكى يابنتى
انا مدرس كيميا
الحقى واحجزى للسنة الجاية بقى

حصان المرجيحة said...

هههههههههههههه
مدونة جميلة بجد
وموضوع جميل
تقبلي مروري

طالبة مقهورة ..درجة أولى said...

Hossam

ميرسي ربنا يخليك على زوقك
بجد من الكومينتات اللي فرحتني جدا
والله التعليم بكل المراحل مش ناقص..

بس انت اكيد حاسس بمشكلة اكبر لاني زي ما فهمت كنت بتدرس بره..فاكيد اتصدمت..ولسه متخفش هتتصدم

اما انا فمبقاش يحوق معايا صدمات ^_^

طالبة مقهورة ..درجة أولى said...

حلم بيعافر

لا حضرتك أنا السنة ديه تانية ثانوي
يعني باخد كيميا اساسا :)


تحية عملاقة لحضرتك

طالبة مقهورة ..درجة أولى said...

حصان المرجيحة

:)
ميرسي جدا حضرتك منورني

دمت بكل خير

لاسع افندى said...

بدايه مبشره لمدونه قويه


مبروك المدونه الجديده


تحياتى

داليا الجندى said...

السلام عليكم
احب اهنيكى على المدونه وكمان اسمها
جميل اوى البوست بتاعك
لذيذ منك انك وخدها كده بروح حلوه وخفة دم المصرين
وتمنياتى لكى بالتفوق دائما

Tears said...

فعلا حبيبتى حال التعليم يحزن زى حال كل حاجة فى البلد

محتاجين انتفاضة
!

طالبة مقهورة ..درجة أولى said...

لاسع افندي
شكرا جدا لحضرتك
واتمنى انها تكون فعلا كويسة

نورت

طالبة مقهورة ..درجة أولى said...

داليا الجندي

ليس باليد حيلة سوى اني اخدها بضحك وإلا هتجيلي المرارة والزايدة

شكرا يا قمراية نورتي

طالبة مقهورة ..درجة أولى said...

تيرز

محتاجين اكتر من كده..بجد حاجة تحزن جدا
ولما بنتقد المشاكل بيكون فقط لأني عاوزة اغيرها

شكرا يا قمر

norahaty said...

وخلينى ابقى الكومنت
ال31فى اول تدوينة
من مدونتك السكر دى
وروووووووحى ذاكرى
بطلى لعب :):):)
وكده بقيتى معاصرة ل4وزراء تعليم رقم قياسى ياتلموووذة