Sunday, February 21, 2010

نظرية 1(النفسنة)


على كل طلاب الثانوية العامية..قتل نفسهم كلياً وخاصة شعبة العلمي

(هما ليه سموها شعبة صحيح؟؟)

مش موضوعنا بس لو حد يعرف يقوللي


لقد ابرزت المفاوضات والمناقشات والمهازل انتشار الحقد الطبقي

(والطبقتين والثلاث طبقات أيضا)

في نفوس الطلاب الشاطرين والدحيحة الغيرانين على مجهوداتهم..




فالطلاب يا أعزائي حسب نظرية النفسنة ينقسموا لتلات انواع


(نظرية النفسنة هي نظرية ستدرس قريبا في الكليات والأندية

وستعتبر من أعظم النظريات التعليمية لفهم طلاب الثانوية)



*أولاً النوع الدحيح اللي بيفطر بالكيميا ويتعشى بالأحياء ..


*ثانياً النوع اللي نفسه يبقى دحيح


(وهوا دائماً ما يتظاهر بالشطارة والتحدي وحب النوع الأول

..ميدخلش عليكوا كلهم كدابين وهذا الحب بااااااااااااااطل )...



*أما الثالث هو النوع اللي داخل الثانوية العامية

عشان يتفرج ع الصراع بين النوعين الاول والتاني ويضحك فقط


(وهو النوع الأليف فيما بينهم)..



أما النوع الأول والثاني فتجد الطالب منهم بمجرد ذكر كلمة المذاكرة


وبكل براءة (ياااااه اسكتي ده انا بقالي اسبوع مبفتحش كتاب)



والغريب ان الاسبوع الذي قبله كان يقول

(يااااااه جتنا نيلة مين اللي دخلنا علمي بس بقالي شهرين ما بذاكرش)



وهكذا اعزائي اكتشفت ان معظم الطلاب مبيذاكروش

من قبل ما الدراسة تبدأ ب 3 سنين



أما النوع الثالث الغلبان فعندما يقول أنا مذاكرتش

يبقى مذاكرش فخد كلامه ثقة



ومن أروع الأحاديث التي يمكن أن تجرى في التاريخ

حديث بين النوعين الأول والثاني

فتشعرك في لحظات الاستماع وكأنك في السيرك


تشاهد القرد ومدربه ينطان الحبل معاً في نفس الوقت

ويُفليَّان بعضهما الآخر أحياناً



وانت هو المشاهد المسكين التي تكتفي بالايماء

والضحك الداخلي لأنك لو نطقت هتكون ضحية




(ملحوظة هامة جداً جداً جداً : ضحايا الثانوية العامة ليس لهم ثأر ولا ديه

متعملوش شجيع سيما وتتجرأوا ان تنقدوا هذا الجدال الطبقي اللهم بلغت)



وللبحث في اعماق المشكلة الأساسية وهي الحقد الطبقي الذي يشعر

به الطالب من دول فنجد ان السبب واحد من اتنين..


*إما استعباط يلازمه استهبال فيحدث تفاعل

مكوناً شخصية معقدة والراسب المتكون قلب اسود ومهبب

و لا ننسى الاهل عامل حفاز يزيد من سرعة التفاعل المنطلق بسرعة الصوت..



* أو الخوف الناتج عن سوء استخدام النفسنة وهو ينقسم لنوعين


1-خوف الدحيحة من المنفسنين

(لحسن يكتشفوا انهم بيذاكروا ويقروا ويحسدوا بقى واديله)


2-وخوف المنفسنين م الدحيحة

( احسن الحسد والقر ميأثرش فيهم اوووبس ديه تبقى مصيبة)





السؤال هنا ..


هل تمتلك ما يكفي من المهارات لتصبح سواءاً منفسن أو موس مذاكرة؟؟

أم تفضل ان تقف وتتفرج ...وتضحك




..



3 ملاحيظ بره الموضوع


ملحوظة رقم واحد : لمريم و سارة وكل اللي موصلوش لتانية ثانوي

لا اقصد اعقدكوا نيفررررررر انتوا عارفين كم انا اوبتيمستك

يعني متفائلة ( انا ثقافتي فرنش فبتكلم انجلش كتير)


ولكن كلنا لها ولسه قدامكوا فرصة تحولوا تجاري او تدخلوا شعبة ادبي

مش هقولكوا اقعدوا ف البيت بلا تعليم


لأني عارفة ان الشهادة مهمة في عمل مروحة في الصيف

ده الصيف هيبقى حر اوي




ملحوظة 2: فرحت جداً بتعليقاتكم ع البوست اللي فات

واشكركم للمتابعة مقدماً




ملحوظة 3 : التوبيك الجاي مش هيكون قبل يوم 26-2

الجمعة الجاي..أولا لأني رجعت المعتقل قصدي المدرسة


وثانيا لأني عندي امتحان مصيري ف اليوم ده..


وثالثا لأني حاسة التوبيك الجاي هيدخلني جوانتانامو

فهودع كل قرايبي الاول وارد الامانات الى اهلها

وابقى انشره :)


..

سلام عليكم






28 comments:

اقصوصه said...

ألحمدلله الله تاب علينا

من الدراسه ووجع قلب الدراسه

عقبالك يا رب :)

عاوز اصحي said...

ايه دا مش معقول انتي عندك 16 سنه انتي اكبر من كدا بكتير

هي الثانويه العامه هتفضل البعبع عند كل الطلبه لان وبسهوله بتحدد مصير البني ادم مفترق طرق زي مابيقولوا

والنظريه اللي انتي قولتيها فعلا موجوده ومنتشره جداا بين الطلبه وكنا بنشوفها كتير

انتي في الثانويه ولا ايه عندي في فضول اني اعرف

تحياتى

بــــ الخطاب ــن said...

ربنا يكون فى عونك وعونهم

لا بس اعلامية محترفه عاملة اعلانات للتوبيك الجديد
هانستناه ما تتأخريش

طالبة مقهورة ..درجة أولى said...

أقصوصة :)

بالعكس يا اقصوصة انا لسه صحيح ف التعليم بس بتمنى اني افضل فيه للأبد بس بطريقتي الخاصة حرية من غير قيود وده عكس الواقع بالنسبالي :)

منوراني

طالبة مقهورة ..درجة أولى said...

عاوز اصحى

مكنتش بحب اقول سني ف الاول عشان نظرات التعجب واللاذبهلال ^_^
بص اعتبر ان 16 ديه عبار عن عمري على الورق لكن بحس ان عمري الحقيقي اكبر من كده وكتير قالولي كده

...
الثانوية العامة اصلا افشل نظام في العالم..اه والله مستحيل من امتحان ممكن ميحصلكش توفيق فيه تخسر كل احلامك!!

ايوه انا في 2 ثانوي
اللهم بلا حسد يعني ^_^

منورني

طالبة مقهورة ..درجة أولى said...

بن الخطاب

امين يارب

هههههههههههههه ايوه شوفت الذكاء بقى خطط رهيييييبة اتصور

(هوا اي نعم انا مفكرتش ف كده وجت باي لاك بس خلاص مش مهم اللي انت عاوزه)

^_^

دمت بكل خير

داليا الجندى said...

ازيك يارضوى
مش عارفه اقلك ايه بس كان الله بالعون
تعرفى بجد مرحلة التعليم دى لذيذه بجد وهتعرفى قيمتها لما تخلصى خالص هتتمنى يرجع بيكى الزمن من تانى وتمنياتى بالتوفيق

وجدتها! اضحك بقى said...

هههههههههههههه اقولك ايه بس يا رودي
عبرتي عن كل اللي عاوزين نقوله...
موضوع تحفة تحفة تحفة

طالبة مقهورة ..درجة أولى said...

داليا الجندي

اهلا يا جميلة منورة
اكيد طبعا المرحلة ديه مميزة للي خلصوا..بس انا بنتقد لاني عاوكزاها تكون احسن بس

ميرسي ليكي

طالبة مقهورة ..درجة أولى said...

الاء

ميرسي يا بيبي اي خدمة :)

Tamer Nabil said...

فكرتينى بالذى مضى قول للزمان ارجع يازمان

بس تعرفى الايام دى احلى ايام وبعد ما الانسان بيعديها هتفضل جواة وهتسيب فية علامة

مع خالص تحياتى

حصان المرجيحة said...

تصدقي بقي انا كانو بيقولو عليا موس
لحد ما في الاخر دخلت كلية تجارة ههههههه
و كان نفسي في هندسة و كنت جايب %92
يبقي انا من الدحيحة و للا المنفسنين؟
هههههههههه
علي العموم الحمد لله خدت نصيبي و راضي بيه جدا
شكرا ليكي

بنت الأسلام said...

ربنا يوفقك
وتخلصى الثانوية على خير

بنت الأسلام said...

ربنا يوفقك
وتخلصى الثانوية على خير

زكرياء said...

انا ايضا تعبت كثير في التانوية العامة
لاكن الحمد لله توفقت
اتمني لك ايضا التوفيق و الافضل

I'm The CraZy One said...

met2a5ara ana dayman keda:)

yaaah ya radwa walahi 3andek 7a2
bas a7eb a2olek 2n adabi 3azab bardo bas 3azab 3an 3azab yefre2 :D
ana 2oltelhom ad5ol sanawii baeriid ba7adesh 3abarni kan zamani now sa3ii bariid ad 2l donya w a3'ani marasil ba2a w alah yenawar :D
w bala sanaweya 3ama balazeft
2naharda kan 2mte7an masiiri bardoo :D bas ma2olekiish 3ala 2l mahzala 2li 7asalet :D 2l group kolo kan f 2l tarawa msa loool
w 7owar mabazakersh men 3 senin dah ana lessa moktashefah kont ya3eni sazga w basada2
bgd ya roudy eslobek too7fa teslam 2deki ya amar

طالبة مقهورة ..درجة أولى said...

Tamer Nabil

اها حضرتك عندك حق وانا معاك تماما
:)

بس نفسي اعبر ع اللي حاساه ليس الا

شكرا جدا

طالبة مقهورة ..درجة أولى said...

حصان المرجيحة

ههههههههههههههه يعيني عليك لاحول ولا قوة الا بالله..

ده انت يبني اتحسدت شكلك كنت دحيح ^_^وشغل المنفسنين اثر فيك

الحمد لله اكيد ده بيبقى فيه الخير ليك

تحياتي

طالبة مقهورة ..درجة أولى said...

بنت الاسلام


ههههههههههههه يارب

ولو اني مظنش حاسه اني لازم اعمل مصيبة قبل ما امشي منها

طالبة مقهورة ..درجة أولى said...

زكرياء

الحمد لله..شكرا على الدعوة الرائعة :)ويارب تتحقق

طالبة مقهورة ..درجة أولى said...

هندوووو

مش عارفة والله بس الاغلب في علمكونوا كده عاني منهم ومجربة وبيتهيألي انتي برضه علمي..


هههههههههههههههههه اتصوري ووامان كنت بقول كده مالهم سعاة البريد ع الاقل عندهم بسكلتة..احنا عندنا الضغط والمرارة

هههههههههههههههه ربنا معاكي ف الامتحان..شكلك فاهم يا نصة ^_^

ميرسي يا قمرررررري :)

ليله شتاء said...

السلام عليكم
بوست جمييييييييييييييل جداااااااااا ربنا معاكى وتخلصى دراسه بتفوق أن شاء الله
دمتى بخير

ليله شتاء said...

عجبنى اوى أسم المدونه يوميات طالبه مقهور بس مستغربتش لما عرفت أنك فى الثانوية العامه
بالتوفيق

MeGltNa said...

يا نهاااااااااااااااار الوان

تحليل فعلا نتيجة القهر المتزايد من جراء عمليات المذاكرة المستمرة و ضرب العقول و ضرب المنبة الدخلي ف الاتسيقاظ وو اخد االبدي لراحة او رست على حسب القول المتعارف علية داخل الاستريتهات و الكفيهات الموجودة و المنتشرة في جميع قلوب و عقول الشباب هههههههههههههههههههههههههه
حلوة اوى اوى اوى اوى اوى اوى

Heba Gamal Emara said...

طالبه مقهورة درجه اولى
دى يا ستى اول مرة اجى مدونتك

وشكلها لذيذ جدا وموضوعاتك جميلة جدا
انا مش هستغرب من كلامك
لإننى من سنتين بس كنت برضه طالبه مقهورة بامتياز
وكنت زيك كده
وطبعا مصدقه كل كلمه بتقوليها لاننى عشت اللى انتى قولتيه ده لحظه بلحظه

ربنا يا رب يوفقك وتجيبى مجموع كبير اوى اوى وتلتحقى بالكليه اللى انتى
نفسك فيها :):):)

واتمنى اشوفك عندى قريب :)
وهستنى كومنتاتك اللذيذه :):):)

طالبة مقهورة ..درجة أولى said...

ليلة شتاء

اهلا وسهلا بيكي يا حبيبتي منوراني :)

طالبة مقهورة ..درجة أولى said...

عمرو وائل

هههههههههههههههه..حلو التعليق ده
ههههههههههههههههههه

بجد ممتاز اديلك 102% عليه

طالبة مقهورة ..درجة أولى said...

هبة جمال

:) كلنا مقهورين يا اوختي والله ^_^

ان شاء الله هكون عندك قريب جدا استنسني