Monday, April 12, 2010

يا بخت المجانين!!!


استيقظ في السادسة على صوت زقزقة العصافير..
اللعنة!! حد يصحي حد دلوقتي هقوم ابيع لبن


نظرت من نافذة حجرتي وقلت لهم:
هششش خلي عندكوا دم عاوزة انام...هلاقيها منكوا
ولا من الثانوية العامية


ومن الواضح انهم كانوا يتحدثوا في موضوع هام جدا
فلم يتوقفوا لثانية ولا حتى عبروني...


ووقف امامي عصفور على اقرب فرع من نافذتي
ينظر إليّ بعينين ينطلق منها الشرر كأنه بيقولي
والله ما أنتي نايمة النهارده..علوا يا ولاد الفوليم...


والولاد اشتغلوا سيمفونية الخيار والعنب بصوت زقزقاتي مزعج 
اغلقت النافذة ويأست من امكانية النوم في هذه الضوضاء..


اتعجب ممن يحبون تلك الكائنات المزعجة
اللي فالحة فيه انها تجيب صداع مزمن وانفلونزا طيور !!


انطلقت لمطبخنا لعمل كوب نسكافيه يعدل الدماغ الخربانة
لعلي استطيع ان اذاكر يمكن افلح ولا حاجة


حاولت اشعال الولاعة ولكنها لم تعمل...
وماله برضه امال هما اخترعوا الكبريت ليه


ابحث في الشقة بأكملها عن عود كبريت فلا اجد خشبايه...
وهنا يأتي إلى ذهني صورة جد جد جد جدي الاعظم
أيام العصر الحجري حينما كان يشعل النار بالحجارة...


وعندما لا اجد حجارة في منزلنا
استشيط غضبا وترتابني حالة من الجنون...


على رأي المثل جت الحزينة تصحى ...ملقتش عود كبريت


حاولت ألا افقد اعصابي فالانسان الذكي المتزن
هو من يجيد التعامل في تلك المواقف هذا ما قيل لي سابقاً..


دائما ما كنت اعتقد ان الانسان زي الكوباية
يفضل يشيل يشيل لحد ما يتدلق
لو محدش شرب الكوباية او فضاها بأي شكل

والآن انا كوباية ولازم اشربني 


لهذا سأفتح التليفزيون واتفرج على اي حاجة
تنسيني بداية اليوم الغير مشجعة بالمرة
مهو مفيش مذاكرة على كل حال

وسأبتعد تماماااااااً اكرر تماماً
عن النشرة الاخبارية
(شخصيتي قوية مش كده)

وافتح الاقي التي في شغال على دريم 2
انه خطيبييييي اللي ميعرفش اني خاطباه احمد المسلماني
اشطة جداااااا

خلص المسلماني ووجدت النشرة تطاردني..
مش هيجرا حاجة
لما نشوف فيه ايه ف الدنيا..
(قوية قوية مش اي كلام )

وقفات احتجاجية..عادي

الاسعار ف الطالع..طبيعي

 مهزلة مجلس الشعب..وايه الجديد

نقيب الاطباء بيشكر في بطرس غالي..
نفاق معتاد لجر ناعم مع الوزير..
خطط سياسية لفقع المرارة الشعبية مليش دعوة بيها


كده انا مطمنة عليكي يا مصر...
انتي في أيدي امينة...
امينة مرات سي السيد اللي عمرها ما بتخرج من وراه


تؤ تؤ مش عاوزة اتنرفز بلاش اتنرفز...
محدش يقدر ينرفزني غير بمزاجي 

هيا بنا نخرج..هوا ده الحل...
اي نعم الساعة 8 وشوية وأي نعم ده يوم في وسط الاسبوع
بس..مفيش مانع انزل ..يمكنني احتمال الزحمة

برغم رخامة مربع المدارس أمام منزلي وكثرة الطلاب
اللي بينطوا السور دائماً

(للي ميعرفش نط السور هي
رياضة تشبه القفز بالزانة مع الاختلاف
انهم بينطوا بدون عصا..رياضيون متمرسون)


نزلت باسرع من السرعة السريعة
وعند اخر سلمة في البيت
شعرت باختلاف في قدمي..بعد ان أهلت نفسي للنظر
 وتوقعت انها هلاوس 
ببص لقيت الشوز اتقطع...لااااااااااااااااا
 
ده الشوز الجديد..ابو 50 جنيه..ده انا عانيت على ما اشتريته
..ده اول حاجة اشتريها من حر مالي..لا لا لا لا


حاولت بكل ما املك من قوة
اني افضي الكوباية اللي بتتملي جوايا غضب
وكل شوية اهدي نفسي .. بس الكوباية ناقصلها شوية وتتدلق


ويا خوفي لو اتدلقت 
احتمال تلاقوا خبر ف الاهرام 3 قتلى و55 مصاب
من فعل طالبة ثانوية عامة اصابتها نوبة من نوبات الثانوية العامية


هنا ادركت انه لا فائدة كل شيء يصيبني بالجنون ،
كل صوت بجانبي يعصبني..يوم سئ اخر
كل شيء ضدي النهارده..

في هذه الحالة أفضل البيات الشتوي في شهر 4..

سأنام حتى اشعار آخر
برغم اني اشعر بالرغبة في الاحتراق
بأعواد الكبريت اللي مش موجودة ف البيت
أو بطريقة جد جد جد جدي الأعظم بالحجارة..


آآآه لكم احسد ذوي الأعصاب البارده على برود اعصابهم
واحسد المجانين على غياب عقولهم..

...

52 comments:

Tamer Moghazy said...

"على رأي المثل جت الحزينة تصحى ...ملقتش عود كبريت"

بجد والله العظيم بتموتيني من الضحك بطريقتك الجميييييييييييييلة..

وعجبني قوووووي تشبيه الانسان بالكوباية.. (والآن انا كوباية ولازم اشربني) هههههههههههه بجد انا ها استعين بالتشبيه ده في المحاضرات بتاعتي بس على الله الناس ما تشربنيش هي بسببك :) :)
خليييييييييكي فاكرة ها تبقي انت السبب اني اسيب شغلي :) :D

Tamer Moghazy said...

"ده الشوز الجديد..ابو 50 جنيه..ده انا عانيت على ما اشتريته
..ده اول حاجة اشتريها من حر مالي..لا لا لا لا"
هههههههههههههههههههههه
والله العظيم انت عسل بجد..
بلاش والنبي حكاية البيات الشتوي دي عشان مش تغيبي عننا :)
اخطفي رجل من وقت للتاني وتعالي نورينا باي بوست لذيذ كده :)

Ahmed Fayez said...




هدئي من روعك
لا زلتِ في مقتبل العمر و لا داعي للإصابة بالأمراض المزمنة في هذا السن المبكر
ممكن يجيلك ضغط و شوجر

إنها مجرد البداية
لا زال أمامك متسع من الوقت لحرقة الدم


حصان المرجيحة said...

ههههههههههههههه
انا اعر واحد عاش بعد الثانوية العامة
بس الحمد لله زي الفل
يعني في امل تعيشي طبيعية بعد الثانوية العامة
هههههههههههه
بس تصدقي انا بحب القصص الواقعية
انا قريتها من اولها حتي ذيلها
و الدمعة كانت هاتفر من عيني
لما الشوز اتقطع
الف سلامة عليه
ههههههههههه
ودمتم

Nouran said...

استني شهر خمسه كمان هيبقي اجمل:)

ربنا معاكي و تجيبي مجموع يدخلك الكليه اللي عايزاها

و علي فكره مش هتقدري تبعدي عن التدوين ده انا كتبت بوست ليله الامتحان:)

R-H-S said...

تنتابني حاله من السعاده والفرح لما بلاقي واشوف طلاب الثانويه العامه زي اللمواخذه مربوطين في ساقيه وعمال يذاكروا

اصل انا بحس ان كل مصيبه بعد الثانويه العامه هينه

وهيييييييييييه انا فرحان فيكي
وش مطلع لسانه


تحياتى

Tarkieb said...

أحمد المسلماني خطيبك؟ ذوقك وحش اوووي دا ياريت كمان شكله هو اللي عذاب دا كمان فكره عذاب.. انا كنت باستغرب اذاي واحد زي ده يبقى صحفي اصلا وهو اجهل من دابة..لكن ان كمان له معجبيين دي والله صدمة كبرى..احتمال يكون ده قبل م تشربي النسكافيية فا اكيد استحملتي جهله.... ربنا يسهل وتلاقى كبريت وتولعي البوتاجاز و في التليفزيون بالمسلماني

R-H-S said...

علي فكره احمد المسلماني دا الوحيد اللي وانا بقلب في الدش بقنواته الكتيره دي شدني اني ارجع واتابعه
هدوءه في قراءه الاخبار حاجه فظيعه بجد

new-one said...

ههههههههههههههههههههههههههههه
بجد من فترة ماضحكتش كدا:))

Unknown said...

انت عاوزة كتاب (اعصاب من تلج ) بس حتى التلج بيسيح

انت عاوزه كتاب (أعصاب فى الفرزر )لاالكهرباء غاليه ولو اتقطعت الكهرباء هيحصل مشكلة
انتى تاخدى عندى درس احسن
بس هتجننى

يبقى مفيش حل

محمد بدر said...

مدونة تستحق المتابعة
لكم يشرفني ان نكون اصدقاء
ادعوك لزيارة مدونتي
لقراءة موضوع:

انحطاط اللغة العربية وفساد الذوق موضوع في غاية الأهمية يتطرق الي انحطاط اللغة في الاغاني كما حصل مؤخرا في البوم ابو الليف http://badr4all.blogspot.com/

راء said...

تيمو

ربنا يخليك يارب ويعلي مراتبك كمان وكمان ^_^

استعين باللي انت عاوزه بس متنساش تقول نبذة كده عني طبعا وتشكر فيا شوية انت عارف انا متواضعة جداً

وان شاء الله مش هتسيب شغلك ^_^ولو سبته تعالى اشتغل معايا ساعي بريد

راء said...

تيمو

متخفش انا خلصت بياتي الشتوي وجيت تاني باذن الله وبعتذر عن التقصير

راء said...

وينر

متقلقش عليا انا غضبي مهما كان بيروح على طول قبل ما يجيلي الضغط :)الحمد لله

شكرا جدا ونورت البلوج ده

راء said...

حصان المرجيحة

يعني ممكن ابقى طبيعية تاني خير يعني لسه فيه امل يادكتور

الحمد لله انه عجبك نورت

راء said...

نورهان

اهلا يا جميل نورتي...انا عمري ما هبعد عن التدوين بارادتي ..لأن بكل بساطة انا بلاقي نفسي هنا

بس الظروف هيا اللي بتجبرني ابعد شوية

راء said...

عاوةز اصحى


استاااااذ مونبه ازيك وشاخبارك بجد ليك وحشة:)

طيب اشمت فيا براحتك كلها سنة وابقى مقهورة من نوع اخر زيك كده ^_^

راء said...

تركيب


على فكرة انا بحترم جدا جدا جدا الاعلام النضيف وعلى راسهم منى الشاذلي وتامر امين والمسلماني...ده رأيي الخاص واللي بفتخر بيه لأنك لو اخدت بالك انا مش متعمقة في السياسة ولا عايشة ف عيلة سياسية بس انك تلاقي حد يفهمك وتبقى زيك زي المتخصصين ف اقتصاد وعلوم سياسية يبقى معذرة مسمحش لحد يقول عليه جاهل...او يقول نفس اللفظ المستفز اللي ف تعليق حضرتك

من حقك تقول تعليقك بس ياريت بلاش تجريح...

راء said...

عاوز اصحى

طبعا موافقاك..انا شخصيا بستمتع باللي بيقوله بايجاز بس فيه كل المفيد ومدينه ليه شخصيا بفهم حجات كتير

راء said...

نيو وان

يارب يسعدك ويهنيك :)

نورت بجد..

هوا حضرتك استاذ عمرو فاروق؟؟دخلت البروفايل بس معرفتش اوصل لمعلومات خالص

راء said...

العيسوي الصغير

هههههههههههههه..على فكرة انا مجنونة توماتيكي..بس مجنونة بعقل شوية ونرفزتي بايخة

نورتني فعلا وميرسي ع الكومينت اللذيذ ده

راء said...

محمد بدر


شكرا جدا واكيد همر عليك سريعا كده :)

نورت

DoOoOoOdY said...

بجد بجد انتى رجعتينى لايام ثانوى كانت ايام عذاب بس بجد احلى ايام واحلى ذكريات
بجد دمك خفيف جداااا وطريقتك جميلة

Sam Sh said...

طب و هتنامي إزاى و العصافير عاملة كل الهيصة دي عند الشباك بتاعك ؟؟
:)
فكرتيني بأيااااااااااام .. كانت أيام بجد حلوة جدااااااااا .. بكرة لما تخلصي دراسة خالص تفتكري الأيام دي و تقولي عليهاإنها كانت أيام حلوة برضه :)
تحياتي القلبية

Unknown said...

لو محطتيش أعصابك في ديب فريزر لبقية حياتك....يبقا تسافري بره البلد دي عايزة حد باااااااااااارد...
تحياتي مقهورة و آسف لأني مش بزور المدونة من فترة كبيرة...

راء said...

دودي..

متشكرة اوي يا جميل..يارب دايما منوراني

راء said...

سامح...

ما العصافير كانت سكتت بقى :)

عارفة انها ايام حلوة وانا بستمتع بيها لانها مش هتكرر

نوررررررت

راء said...

المستفز


تؤ عمري ما هسيبها غير لظروف فوق الخارقة :)

ولا يهمك وانا كمان برضه مكنتش عارفة اتابع

Anonymous said...

ربنا يكون فى عونك
بجد دمك خفيف اخر حاجه
عجبتنى اوى الحته بتاعه علو الفوليم ياولاد بجد جميله
وانتى ايه بس اللى رماكى ع اللى ماتتسمى الثانويه دى انتى ماتعرفيش انها خطر ومفترسه وضحياها بالالاف
بصى انابناشد الجهات المسؤله يكتبوا على مدارس المخفيه دى خطر الموت ويحطوا علامه الجمجمه زى اللى على علب الكهربا دى
لا بجد وصفتى يومك باتقان وعيشتينى حالتك تقبلى مرورى وانشاءلله تنجحى وتحققى امنيكى
تحياتى

اقدم عاصمه فى الحب said...

السلام عليكم

ربنا يصبرك يا اختى يا رب
والنبى ما عارفيين نلاقيها منين ولا منين
على رأى المثل
اللى ايده فى الميه مش زى اللى ايده مش فى الميه
.
.
بينى وبينك كده
فى كل الكلام اللى كتبتيه ما شفتش ركعتين لله اول ما صاحيتى
صح :)
هو ده اكيد السبب اللى خلى الكوبايه
تتملى
.
ودى واحترامى
ودوما اصدقاء :)

راء said...

الشوكة الناعمة

هههههههههههههه..انتي زي السكر

بصي يا بنتي انا قلتلهم يدخلوني ثانوي بريد ..بس هما تمسكوا برأيهم كانوا عندهم امل اني هفلح ^_^يللا بقى الله يسهلهم

راء said...

اقدم عاصمة في الحب

بيني وبينك انت..انا مكتبتش كل التفاصيل بتاعت اليوم

بس انا الحمد لله مادام مرحتش المدرسة يبقى اكيد صليت الفجر على اساس اني هقوم براحتي :)

نورتني يا ريس

فاروق سحير ( فاروق بن النيل ) said...

بقى حتة عصفورة تخليكى مقهورة والله دانتى تستاهلى ماتناميش مادام العصافير
موش لاقية حد يونسها شكرا لك
farouksam.blogspot.com(عصفورالجنة)

♥♥ شذا ♥ الروح ♥♥ said...

ههههههههههههههههههه


دمك زى العسل والله ربنا يسعدك يارب
ويوفقك حبيبتى

Soul.o0o.Whisper said...

مقهورة
بالاوى
.....
:)

تحياتى ليكى يا جميلة على ابداعك فى الكتابة

اول زيارة
و بإذن الله هأحاول اتابعك

تحياتى

داليـ ـ ـ ـ ـ ـ ــــا said...

ههههههههههههههههههه
ازيك يارضوى

والله العصافير الا بتقولى عليها دى بردوا بتجننى كده لانها عندى بتقف على سلوك الكهربا بجوار غرفتى

بس تعرفى هقلك حاجه الا عايز ينام بينام لو فى ايه باللذى

تحياتى ياقمرايه

marmar said...

هههههههههه على فكره انتي عسوله موت وضحكتيني اوي ههههههههههه
معلش تعيشي وتجيبي اشوااااز تانيه
)اشواز = جمع شوز)

بس عايزه اعرف كنوع من الفضول
انتي طالبه ولا معيده ؟

بالتوفيق يا سكره

راء said...

فاروق بن النيل

انا مش ضد العصافير بس المود ساعتها كان مقفل فده جزاتهم ^_^

شكرا ليك

راء said...

شذا الروح


ربنا يكرمك يارب ويسعدك :)

راء said...

Soul.o0o.Whisper

اهلا وسهلا نورتيني وشرفتيني :)

ابقي شأري علينا تاني

راء said...

داليا

ازيك يا دودي عاش من شافك يا جميل منورة :)

بيكون فعلا ازعاج رهيييييييب بس انا نومي خفيف ومش بعرف انام وفيه دوشة كده

راء said...

مرمر

ههههههههههههههه ايه ده انتي بتجمعي زيي كله على نفس وزن ألغاز..

انا طالبة والله في ثانوية عامة ^_^ بس عندي خبرة فبالتالي اصبحت معيدة ...بكل بساطة

marmar said...

ههههههههههه بردو مش فاهمه حاجه
اصل الوقت الوحيد اللي بعرف ادخل فيه المودنه بيكون اخر الليل بعد ما برجع من الكليه واذاكر واخلص
فمخي بيكون هنج وفصل شحن

يعني ايه طالبه وفي نفس الوقت معيده
هيا المعيده دي مش بتكون ف الجامعه زي استاذه يعني؟ ولا انا بخرف
هوا انا مين
انا فين

ايه اللي بيحصل ده

راء said...

هههههههههههه

لا كده كتير كتير اوفر ^_^

بصي يا بنتي انا عندي 16 سنة وشويات..وفي تانية ثانوي عام

ولكن كلمة معيدة ديه المفروض انها للجامعة

بس بما اني خبيرة بالطلاب اللي ف سني والمقهورين..فبقيت معيدة وانا في ثانوية عامة

وبعدين المدونة كلها حجات غريبة ملقتيش غير ديه هههههههههههههههه

marmar said...

بصي انا لسه مش فاهمه هههههههههههههههههههههههههه شكلك هتضربيني
ههههههههههههههه
بس يلا معيده معيده انشالله تبقى دكتوره
هوا حد طايل ههههههههههه
بعدين اعمل ايه انا عجبتني مدونتك وعجبني انك عندك 16 سنه وعسوله كده وبتعرفي تتكلمي هههههههههههههههه
ههههههههههههههههه
خلاص مش هسأل حاجه تانيه اوف ايه ده محدش عارف ياخد راحته لا في البيت ولا في المدونه ولا ف الجامعه
هههههههههههههههههه

راء said...

ايه ده انتي ايه جابك هنا تاني

ولسه مش فاهمة ايه

بره المدونة برررررررررره ^_^

عادي 16 سنة ده العمر الافتراضي

انا عندي 54 سنة وهتم ال55 قريبا

منوراني جدا

ســـهــــر said...

هههههههههههههههههههه
اة يانى يا قلبى
انتى حتت سكرة وصغنونننننننة اوى 16 سنه يخواتى وحلوة كدة وبتقول كلام زى الفل ؟

لا هتتحسدى يا قلبى والله حساكى اختى الصغنونة الشقيه الى مجننا البيت كلة

تحياتى لروحك الحلوة يا بنوتة

راء said...

سهر

متشكرة اوي ربنا يخليكي يارب وانا اطول ابقى اختك واجنن البيت ^_^

منوراني

2otety said...

ههههههههههههههه واضح انك شخصية مشكلة .... ودماغك جمدة على الرغم من سنك الصغير .... بس خدى بالك من نفسك لاحسن الى انتى فيى دة من الاثار الجانبية للثانوية العامة ..... و ربنا يعينك و يخلصك منها على خيييير انتى و كل الى زيك ... و على فكرة انا كمان و الناس الى بتحب المسلمانى و بتايع البرنامج بتاعة .... دة اول تعليق لية بس الالكييييد انة مش هيكون الاخير

Anonymous said...

قطتي

هههههههههههههه مشوفتش تعليقك اسفة
نورتيني بس ديه الاثار كلها مش الجانبية بس


طالبة مقهورة

Marisol said...

سامح... ما العصافير كانت سكتت بقى :) عارفة انها ايام حلوة وانا بستمتع بيها لانها مش هتكرر نوررررررت

Unknown said...

شركة مكافحة بق الفراش بالهفوف