Sunday, May 9, 2010

ميس نظيمة قوانين


ميس نظيمة...هي من النوع المحافظ
ذوي المكانة الخطيرة في المدرسة
بل في مربع المدارس بأكمله


كابوس مكتمل ينغص على جميع البشر حياتهم
بداية من المدير والفراش
وحتى المدرسين والموجهين..
لالتزامها الشديد وتزمتها بالقوانين
صغيرها قبل كبيرها


فمثلاً في ورقة الغياب اذا دخل احدهم بعدها
تجدها تدون وقت دخوله ليس بالدقيقة بل و بالثانية
مما اكسبها اسم شهرتها..
ميس نظيمة (روتين) او ميس نظيمة (قوانين)...


حينما يسألك أحد الطلاب بطيب نية
مين اللي بيديلك في الفصل؟
وترد بكل براءة..ميس نظيمة
تجد نظرات الهلع والرعب ظهرت على وجه السائل
وربما يتبرأ منك أصدقائك
لمجرد انك من طلاب ميس نظيمة قوانين


لهذا السبب ولأن التعامل معها محفوف بالمخاطر..
فقد حاولت تجنبها بقدر الإمكان في التعاملات والتنقلات
فقد اغير طريقي اذا رأيتها تسير منه
ربما لأسلك طريقاً أطول بعيداً عنها


كل ذلك للحفاظ على ماء وجهي وبريستيجي
وسط الطلبة كأمينة للمدرسة وامينة مساعدة للإدارة
يجب ان اكون قدوة طلابية..
وهكذا ظللت في أمان الله إلى أن وقعت الواقعة...


ففي ذلك اليوم عندما كنت أسير بجوار صديقاتي
على الرصيف زي باقي البني آدمين
وسرحت في ورقة بها سؤال كيميائي..
فوجئت بأصدقائي يتنحون جانباً بشكل لا إرادي
ويسحبوني من يدي كي أتنحى عن الطريق
ولكن هيهااااات الفاس وقعت في الراس
وسمعت صوت مزعج أتي بجواري...


باشمهندسة رضوى..


وقبل أن التفت
آآآآآآآآآآآآآى يا نفوخي مين جاب العامود ده هنا
صوت ارتطامي بالعامود سبب لي ارتجاج في المخ

مما جعلني اقلق على مستوى كتاباتي
وعلى معلوماتي الدراسية التي وقعت من ذاكرتي
واستقرت على سفح العامود..
ظننت انني احلم لوهلة لولا تكرر الصوت


بنت..!!


اه صح انا كنت فين ميس عامود
قصدي ميس نظيرة!!!!
مش مهم سألملم معلوماتي
عندما اتخلص من هذا الحوار المفاجيء ربنا يستر


ايه اللي حصل امبارح ف الاذاعة ده؟؟
ادب ساخر في اذاعة مدرسية محترمة
كان ناقص تجيبي دينا وسعد الصغير بالمرة
يحيولك الاذاعة


صدقيني حاولت بس للأسف كانوا مشغولين بفرح ليلتها
ومعرفوش يصحوا للطابور
بس ملحوقة يا ميس الجايات اكتر م الرايحات



نظرت إلي نظرة حادة وقالت :


هنهرج!!!


كنت اعلم ان موضوع الاذاعة
لن ينتهي بدون سماع موشحات
برغم عدم خروجي عن اللوائح
في الموضوعات المكتوبة..
وكان الحل الوحيد للخروج من الموقف
هو تقمص شخصية طالبة هبلة فقلت ببلاهة:


ايه ده معجبتكيش يا ميس ده انا طلبوا مني
احضر واحدة جديدة وبدأت اكتب فيها بالفعل
عشان نعرضها قريباً واكسكلوسف..


هنا فقط شعرت بأنني دخلت
في منطقة احترس الاقتراب والتصوير
التابعة للجيش ولم تبشر نظرتها بالخير بتاتاً البتة..


أنا مش هطول معاكي ف الكلام وعاوزة اعرف حالاً
انتي تبع أنهي حزب معارض
ومين مسلطك علينا وداسك وسط الطلاب..


انا تبع حزب كلمني شكراً
ولو اتصلت بيا من 12 ل 2 صباحاً
هجاوب عليك شخصيا وبنفسي واكيد هنفيد بعض..

حزب مين بس ومعارض إيه ..
بقى بذمتك شوفتي معارض قبل كده بيتخبط ف عواميد

دول بيتخبطوا ف لوريهات على طول

حضرتك أنا لم اتخطى حدودي عندما اتكلمت عن السناتر
لأني مكدبتش..ومش ذنبي أن يؤخذ كلامي
على محمل سياسي عندما تكلمت
عن طابور الكانتين
(المقصف زي ما بيقولوا ف بعض المناطق)

اعتبرالبعض اني بتكلم عن طابور العيش..

او عندما تكلمت عن طول مدة حكم
جد جد جدي الاعظم رمسيس

قارنتوها بالحكم الحالي..أنتوا اللي نيتكوا وحشة!!


حينها فقط شعرت ببركان اندونسيا انفجر ثانيةً..
ولم ينقذني سوى البنت هنادي بتاعت المعادي
لما جاءت تسألها عن معاد الدرس في السنتر..


فتملصت من قبضتها اللعينة
وانطلقت ابحث عن العامود الذي تقبع تحته معلوماتي الثمينة..
فإذا رأيتوا واحدة ماشية ف شوارع القاهرة
تردد : عامود تايه يا ولاد الحلال
لا تتعجبوا واعرفوا ان السبب دائماً وراءه..
ميس نظيمة قوانين

..

24 comments:

Unknown said...

غالبا الأنواع علي شاكلة مس فظيعة دي علاقتي بيها غير محببة علي الإطلاق...
رغم اني لا بهش ولا بنش و دايما ف حالي و من يومي كنت مثال للإنضباط ، لكني أرفض اني انضبط وفقا لمزاج حد فاكر نفسه حاجة كبيرة عشان عاشله في الدنيا كام سنة زيادة عني...
غالبا أمثال الولية دي بتكون دماغها خوخت و فيوزاتها ضربت...
تحياتي الكبيييييييييييييييييرة...

سارة درويش said...

هههههههههههههههه فكريتيني بأبلة جماااااالات

دي كانت مديرة مدرسة البنات الاعدادية اللي انا كنت فيها

لفت نظري اوي موضوع ادب ساخر في الإذاعة المدرسية

بجد برافو عليكي استمري يا رضوى في تطوير الفكرة واعملي حاجة مميزة وما يهمكيش من اي حد اي حاجة

صدقيني ممكن ما تحسيش بقيمة كبيرة لكونك تجددي في الإذاعة بس انا اكتشفت ان كوني بشترك في الإذاعة المدرسية من صغري خلاني في يوم من الأيام اقرر امسك ميكروفون الإذاعة

مدونتك عسولة اوي
بس انا مش فاهمة طبيعة شغلك اوي
انتي طالبة دراسات عليا ولا ايه ؟

حـــــروف متــبعترة " عــمرو الشــايب said...

7elw el post dh awy ya RoKa bs mesh 3arf leh 7aSs Be amn el dawla hay2fshna 3shan keda katbt franko :P tam!!h ya3ny :d

ليله شتاء said...

هههههههههههه
هههههههههه
فكرتينى بميس رئيسة
تقريبا توأم ميس نظيمة بتعتك
هههههههههههه

Tears said...

جميلة اوى يا رضوى و الحمدلله ان البوست ده مقروء عندى لان كتير بتكتبى بوستات لكن بفتحة عندى بيكون على شكل رموز مش حروف بالذات فى المدونة التانية

عارفه زوجة خالى كانت زى نظيمة بالضبط فى نظر الطلبة و كان ده فى مدرسة لغات عريقة جدا و هى كانت جميلة لدرجة مبهرة زى جميلة الجميلات فرجينا بالضبط بس لما كانت تمشى تحسى ان الارض نفسها خايفة و الطلبة لما عرفوا انى قريبتها تجنبونى مع ان والله الست دى فى البيت مع الاسرة غاية فى البساطة و الطيبة و تقريبا شخصية عكس خالص شخصية المدرسة اللى بوش خشب

ما تحطيلنا الشعر الساخر؟

حصان المرجيحة said...

ههههههههههههه
والله اسلوبك مالوش حل
بس عايزك تتخيلي مس نظيمة دي انها دخلت علي المدونة و شافت اللي انتي كاتباه عنها
ههههههههههههههه
بجد تسلم ايدك

أحمد زاهر said...

هههههههههههه جميلة جدا
تحياتى

إمرأه من ثلج said...

ازيك ياقمر

ممكن تقبلى الهدية وتجاوبى على اسئلة التاج

يلا بسرعة

راء said...

المستفز...حسني :)

اوافقك الرأي اللي يحترم عقلي هحترمه ونص كمان..بس القصة ان ده طبع هيا مش كبيرة اوي ف السن يعني ف الاربعين كده

الانضباط موجود بس لازم يكون فيه استثناءات احيانا..يعني واحد راح لشئون الكلبة بيشوف غيابه مثلا ورجع بعد الفسحة متأخر الموضوع معاها ممكن يتطور ويحصل مشكلة كبيرة...عشان كده لازم الكل يتجنبها

اتقي شر ميس نظيمة :)
ميرسي كتيييييييييير ليك
كومينتك بيبسطني

راء said...

سمو الاميرة سااارة

^_^ عندك حق فيه مدرسين كتير على نفس الشاكلة وكان عندي ميس جمالات بس ده في اعدادي بقى خلاص ..

هوا كانت اذاعة ساخرة عموما..يعني نكت وهزار عملت جو تغيير وفي نفس الوقت الاسم انها اذاعة اتحادات طلابية

وهوا انتي لسه ف اعلام ولا خلصتي يا سارة على كده؟؟؟

ميرسي يا سيروز لزوقك

لا انا في 2 ثانوي عام...مش عليا ولا سفلى ^_^

راء said...

عمرو وائل

ههههههههههههههههههههههههه كومينتك موتني م الضحك

امن دولة امن دولة مكنتش اعرف انك خواف كده يا ابيه هتبعني من أول قلم...

وبتكتب فرانكو تمويه
طب لعلمك يا بتاع امن الدولة عمرو وائل بتاع الفرانكو عاوز يعمل انقلاب هيه وريني هتتصرف ازاي يا زكي^_^

راء said...

ليلة شتاء

رئيسة نظيمة جمالات..كلهم عاملين تحالف يبنتي وحالفين ينكدوا علينا حياتنا

نورتيني كتير

راء said...

تيرز

مممممممم..بسبب كومينتك ده انا غيرت اللايوت اللي ف مدونتي التانية ^_^

ابقي شوفيها وقوليلي كده ياترى اشتغلت ولا لأ

بصي يا تيرز انا مش بعترض على اي حد م الشخصيات ديه..بس لازم يبقى فيه ليونة ف التعامل يعني مش كله جد وروتين وخنقة ولا ف نفس الوقت تسيبنا ع الاخر...خير الامور الوسط

ومعنى كلامك ان تعاملها كده مع الطلاب بس وده غلط جدا...مش بؤيد ان الانسان يقسم نفسه نصين

المقدمة كانت شعر بس مكنشش ساخر..وباقي الحجات هنزلها ان شاء الله كمان بوستين ولا حاجة اكيد ان شاء الله :)

نورتيني جدا والله كنتي وحششاني

راء said...

حصان المرجيحة

يعني انفع ^_^طيب الحمد لله

مين اللي تيجي هنا ميس نظيمة...لا ابوس ايدك انا مش هدور على عواميد المنطقة كلها كفاياااااااا

بس تعرف لو دخلت انا هقولها ان انت اللي مسلطني عليها..واجري

لعلمك انا اهم ميزة فيا الشجاعة

راء said...

بن الخطاب

ربنا يخليك يارب :)

راء said...

امرأة من ثلج

لااااااااااا كله الا التاج ده

مشكلته الوحيدة انه ممكن يكشف عني اسرار قاتلة..ومكنش نفسي يجيلي ابدا

حاتر هنزله لما افضى

ومش هدعي عليكي دلوقتي عشان انا عاوزة انام... وانا صاحية هبقى ادعي بقلب بقى

داليـ ـ ـ ـ ـ ـ ــــا said...

هههههههههههه

رضوى ربنا يقويكى

مش يمكن لو انتى مكانها تعملى اكتر من كده
وممكن لا

تحياتى

راء said...

داليااااا :)

ازيك يا جميل منوراني والله انا هبعتلك هدية كده ياريت تقبليها مني مقدما ^_^ واوعي تدعي عليا

راء said...

اه بالمناسبة..انا شخصية سياسية جداااا
واستحالة لو ف مكانها اتصرف كده
لأني عندي حدود للتعامل مع اي حد لا بتزيد ولا بتقل..يعني ف النص

اقدم عاصمه فى الحب said...

السلام عليكم

افشيتى سر المجموعه
والنبى ده اسمه كلام
احنا المدونين لينا حياه خاصه خالص
اعقل مجانين فى الوجود
بقه تقولى أدب ساخر فى الازاعه المدرسيه ..؟!
طيب عرفيهم فى جريده الاهرام وإتكلمى شويه عن الريس .. عرفيهم ايه اخبار الطقس وايه حاله ( الجو ) مش ادب ساخر ...
ههههههههههههه
يا بتاعت حزب كلمنى شكرا انتى
اه صحيح كنت هنسى
السطرين اللى فى اخر البوست عندى عرفت انتى ليه ما قدرتيش تستوعبيهم على طول ...
ده طبعا علشان ما كنتيش لسه طلعتى من صدمه العمود
.
وعلى فكره سعات لما بزهق من دبانه ( ذبابه ) بقول ربنا ياخدنى ويخليها والمقوله دى تنطبق على الاستاذه المبجله صاحبه العمود
.
ودى وإحترامى :)

راء said...

اقدم عاصمة ف الحب


ههههههههههه..صح اتصور هوا العامود السبب..

ثم وماذا ف الادب الساخر..طب والله الطلاب كلهم اعجبوا بيها جدا ولحد دلوقتي بيحكوا ع اذاعةة الاتحاد بتاعتنا..

اتصور حلوة الدعوة ديه..بس انا لا استسلم ابدااااا

قال نظيمة تغلبني قال

Anonymous said...

ياخربه بيت د خفه دم ياشيخه انا لسه مافوقتش
من البوست ياه طبعا فكراه
هههههههههههههه
طب والنبى ماهى الست زى الفل اهيه وزوقها عالى ع الاخر
وبتعرف دينا وسعد الصغير
وتلاقيها كانت هى عروسه الفرح اللى دينا وسعد كانوا مشغولين فيه
حاسه بيكى والله فكرتينى بالاشكال اللى كانت ارفانى فى عيشتى من كام سنه
لدرجه انى انتقاما من الايام الزفت دى كرهت الراديوا عشان مااسمعش اغنيه يا صباح الخير ياللى معانا الكروان غنى وصحانا
وكان فى واحد زميلنا فى المعهد بيصرخ بعلو صوتوا ويقول دى بتفكرنى بايام المدرسه الهى ماترجعها تانى يارب احنا غلابه
وانا بقى بيعصبنى اوى الست اللى بتقول بالسلامه ياحبيبى بالسلامه تروح وترجع بالسلامه كنت بحس انى رايحه احارب او رايحه ارمى نفسى فى التهلوكه
اااه والله
شويه مرضى نفسين بيطلعوا ارفهم فينا
بس انا بقى ماكنش بيهمنى\
كنت بتلكك عشان اخود فصل وارتاح من الوشوش اللى توجع القلب دى
ايه ها قولك ايه ربنا يريحك وتاخدى افراج
وحشتينى ياعسل
تحياتى

راء said...

الشوكة الناعمة

هههههههههههههههههه حلوة ديه هيا العروسة اللي كانت ف الفرح

ليه ده كله ده انتي شايلة كتير اوي..طلعي يا بنتي متشيليش ف قلبك ابدا ^_^

وانتي كمان يا جميل

نورتي

Sara said...

الأشكال دي موجودة في كل مكان
ربنا يرحمنا منهم D:
دول ناس متخشبة الفكر و عندهم كل حاجة التزام و إلزام ×.×"